Wenn Demokratie tau demokratisch ward

vun Behrend Böckmann

Dor läs ik, dat unse Demokratie nich ganz so gaut is as dei Demokratie inne Schwiez, œwer bäten bäder as dei Demokratie inne Vereinigten Staaten. Un dat wull nich blot wägen dei Dodesstraf in den einen un annern Bundsstaat dor. Nå 75 Johr Demokratie in'n Sinn'n von uns Grundgesetz sünd wi dor ankåmen, dat vör luder Demokratie dei Äsel up't Ies danzen geiht, nå Goethe dat Demokratiespäukel taun Hexenmeister wür orrer dei Pier dörchgåhn, wenn dei Kutscher dei Tögel tau locker höllt.

In uns Zivilgesellschaft wür nå un nå ümmer mihr ünner Henwies up't Grundgesetz "liberalisiert", ein Stråf nå dei anner afschafft, dei Dodesstråf wür gägen 'n Säkerheitsverwohung utschudert, dei Uhren lang trecken un Koppnœt gäben is Schaulmeisters un Öllern verbåden, ut'e schönste Såk vonne Welt ward "sexuelle Belästigung". Stråken is ansecht un dat, wat einst Zucht un Ordnung näumt wür, sall nich mir gellen. Tauminnst nich, wenn Minnerheiten un feministisch Spinner mit 'n Rägenbågenfåhn ehr Vörstellungen von't taukünftig Läben mit Geller von'n Förderfond Demokratie, den dei gräune Ministersch Lisa Paus ünner sik hett, ludhals up'e Stråt verkünnen.

Bi 'n groten Deil von uns Zivilgesellschaft — un nich blot bi dei Ollen, sonnern ok bi dei Jungen — hürt dat Verständnis för dissen Ansichtenwannel up. Sei verståhn den Energiewannel up Düwel kåm rut nich, un sei verståhn nich, dat dei Wirtschaft nich vörwarts kümmt, dat 'n Milliarden för dei Ukrain verschwennen deit un wenig Geld för Krankenhüs un Schaulen hett, dat Düütschland inne Ogen von Frömde un Fule 'n Schlaraffenland is, dat 'n Selenskyj för den Weltenredder un Putin för den Düwel höllt.

Un denn kümmt noch hentau, dat dörch dat Stråken keinein vonne jungen Minschen mihr weit, woans man 'n annern Minschen weih daun kann. So geiht in Pragsdörp 'n Föfteinjohriger mit 'n Metz up 'n Sössjöhrigen los un måkt em mit pormål Taustäken dod. In Bad Schmiedebarch (Sassen-Anhalt) kriegen twei Frünn' dat Strieden, dei ein langt nå 'n Stein un schlöcht dormit sienen Fründ Fabian dod. 'n staatenloser Palästinenser, dei all wägen Gewalt- un Sexualverbräken inseet, stäkt in'n Toch twüschen Kiel un Lübeck 'n Pärchen dod un verletzt noch anner Reisende. Un annerletzt geiht 'n Frömder ut Afghanistan mit 'n Metz denn Schutzmann Rouven Laur an un verletzt em so, da hei nå twei Dåch von uns güng. Un nu al wedder — wieldess dat Eröffnungsspäl von'e Fautball-EM leep!

Un wenn denn secht ward, dat Respekt un Anerkennung fählen, wenn dat üm den Ümgang mit Schandarmen geiht, denn is dat nauch.

En gewaltbereite Jungkeerl mit'n Waff, redig, den Schandarm tau haun:
Falsche Erziehung!

Männig Börger is bedeint von disse moderne Oort von Demokratie un wünscht sik, dat Tucht un Ordnung unser Läben wedder läbenswiert måken. Un dei Europawåhlen hemm't ok wiest, dat dei Börgers nich blot ut Gnaz dei AfD — ut'e Sicht von Bundspräsident Steinmeier "extremistische Rottenfängers" orrer mit Wür von SPD-Baas Klingbeil dei "Nazis" — wählt hemm'. Un so sünd nu Ampelpoletiker, dei noch anne Macht sünd, dorbi, den Wähler tau verkloren, dat blot knapp sössteihn Purzent dei Rotten orrer Nazi ünner dei Wählers sünd, un dat sik dei Rest vonne Wählers gägen dei rechten Populisten utspråken hett.

Wat sall 'n dortau noch seggen?

"Naja, de Keerl dormalen in Hameln hett feine Musik måkt —
oewer von allns un jedeen låten wi uns ja nu nich infangen!"