vun Behrend Böckmann

O wat is dei Welt doch mall,
denn warrst du för dei Plääch 'n Fall,
schlööcht dien Konto fix Alarm:
Pass up, bald büst du beddelarm!
Dat Ollenhus måkt di nu wies,
dat dei Plääch hett ok ehrn Pries,
dat näben all dei Öllersquålen
noch düchtig is hentau tau tåhlen,
sülfst wenn dei Pläächkass di wat gifft,
von dien Rent di nich väl blifft:
kannst för dien Gräffnis sotauseggen
'n Schonvermœgen taurüchleggen!

Senjoren mit ganz gaut Pangschonen
daun in Residenzen wohnen,
doch hett 'n Minsch blot wenig Geld,
dat hei den Euro tweimal tellt,
un wenn hei nich mihr wieder weit,
tau dei Suppenkœk hengeiht
un ok noch tau dei Kleiderkåmer,
denn is dat mihr as blot Gejammer!

Kann hei nich mihr ornlich gåhn,
up eigen Bein nich säker ståhn
un ward 'n Fall för 'n Rundüm-Plääch,
denn geiht em dat besonners leech,
denn dei Rent geiht nu taun Pech
gliek as Eigenandeil wech;
so as hei künn't as Kind beläben,
ward bäten Taschengeld em gäben,
un schlöcht sien Hart denn mål Alarm,
is dei Notraupknop an 'n Arm.

Un ümmer wedder sünd's dei Ollen,
œwer wecker ward herfollen:
Man kann dei Ollen doch nich trugen,
dor's ümmer wedder Unfäll bugen,
doch fohrt 'n junger Spund 'n Wågen
un demoliert sien Karr bi't Jågen,
un wenn hei denn in'n Gråben licht,
'n Oller oft dei Schuld noch kricht.

Dor hemm' sik in uns Tippschnack-Welt
Bedreiger up dei Oll'n instellt,
dei Olle inne Fall denn locken,
üm sei düchtig aftauzocken.
Linksradikale seggen sogor:
"Dei Demokratie is in Gefohr,
denn Olle wählen Populisten,
åhn Bedenken dei Faschisten,
dei hollen nix von Wokeness
un finnen "Gennern" groten Mess.

Wat dei Ollen so giern wählen,
deit Rod-Gräun ganz bannig quälen,
doch Olle, dei nich beinig sünd,
hollen nix von'n gräunen Wind,
denn wecker an'n Rullator geiht,
nich up't flotte Tweirad steiht.

Künnen Dokters un Apteiker läben,
wenn't nich däd dei Ollen gäben?
Lange läben sall'n dei Ollen,
un üm sei denn gesund tau hollen,
bläuht dei Hannel as noch nie
mit dei Gesundheitsindustrie.
Dormit dei Knåken nie nich stief,
gifft dat för den Kopp un Lief
Naturkostsåken so gesund
för den Minsch — un sienen Hund.

Wecker sik dat leisten kann,
hüert tau 'ne Krüzfohrt an,
un up Schäp mit dulle Nåmen
sünd dei Ollen sihr willkåmen,
un sei kåmen gaut taurecht,
mit lange Reisen — öllersgerecht,
un beläwen för ehr Geld
väl up't Schipp un inne Welt.

Männig Vadder von hüt Ollen
is för brunen Irrsinn follen;
Krieg süll dat nie wedder gäben,
wull furtan in Fräden läben.
Un as dei Höll wier œwerståhn,
süll't dei Kinner bäder gåhn —
twei, drei Kinner un noch mihr
måkten Öllern grote Ihr,
un sei sünd in unser Land
as "Babyboomer" gaut bekannt.
Doch't gaude Läben hett 'n Kihr
bi dei "Boomer" boomt't nich mihr,
blot dei Ollen hemm' noch Spaß
tau Lasten vonne Rentenkass,
denn dat gellt as all dei Johren:
Man möt den "Besitzstand" wohren!
Doch dei Boomer harrn kein'n Maud
tau ein grote Kinnerhaud;
hüt fählt all männig Kraft,
dei dörch Arbeit Geld ranschafft,
dat wiederhen dei Rent dat blifft,
dei dat nå Arbeitsjohren gifft.

Väle Minschen nägenklauk,
an'n Lief mit allerfienstet Dauk,
rüken nu den Rentenbråden
un daun tau Reformen råden,
denn dei Ollen sünd sik wiss:
Wenn dei ierst denn Rentner is,
ward't dei Tweit un Drüdd ok bald,
un Rentner olt un Rentner frisch
sitten nu an einen Disch
un futtern rin up ehre Oort
'n wunnerbore Sahnetort.
— Doch jeder föfte Rentner weit,
wat Powertäh bedüden deit,
un is dat Geld denn binå all,
gifft dat noch von Fall tau Fall
lütte Kauken, mannomann,
bi'n Diskaunter näbenan.

Inne Kniep oft bannig mau
un inne Måch oft bannig flau —
doch wecker Rentner glöwt doran,
dat ein Reform dat ännern kann?
Von Reformen deit dei schnacken,
dei nie nich för dei Rent möst racken,
dei gaut von sien Diäten läwt,
as Privatjäh an'n Häben schwäwt
orrer för Beamtenplicht
'n Pangschon in't Öller kricht.
Fiete Merz, dei will dat wågen,
geiht den Arbeitsdach an'n Krågen:
wech mit den Acht-Stunnen-Dach!
Doch schlöcht dei Gewerkschaft Krach.
Wecker hunnert Johr will läben,
süll bet söbentig düchtig kläben,
un dat Schönste is dorbi:
dat gifft por Piepen stüerfrie.
Ok Ministersch Reiche secht:
"Disse Infall is nich schlecht!"
Doch sei deit wull nich bedenken,
ob man ehr ward Globen schenken...
Wecker in Bayreuth Wagner ihrt,
finnt dat gor nich so verkihrt,
dat all, dei von ehr Rent gaut läben,
sall'n 'n Rentensoli gäben,
denn dat wier gor nich so schlecht,
wiel generatschonsgerecht.

Üm dei Rent tau reformiern,
süll man doch mål utprobiern,
ok von Beamten wat tau hålen,
dei nich för dei Rent intåhlen.
Ward man Lüd mit Pangschonen
ok von dissen Deinst verschonen:
'n Klauker* deit't för sinnvoll hollen,
geef't 'n Plichtdeinst för dei Ollen,
villicht den brunen Volksstorm gliek
ut dat verdammte Drüdde Riek.
Ja, nu schalln dei olen Knackern
in ein "Soschaaljahr" wieder rackern!
Wer fit is un noch lopen kann,
hett sülven Schuld un mutt nu ran!
— Dei Infall wier woll doch nich geil
un landet forts up't Olendeil.

Dei Rentenkass up jeden Fall
schrifft Johr üm Johr ein rode Tall.
Dat warrt nix miehr, wenn wi nix wågen.
Dor kannst ja mål dei "Boomer" frågen!

* "dei Klauke" is Klaus Hurrelmann (Johrgang 1944), Sozial-, Bildungs- un Gesundheitswissenschaftler, langjöhrig Professor an dei Uni Bielefeld