Öllere Daagbook-Notizen vun Marlou


3.2.03.... To'n Afschrecken...

..., seggt de britische Butenminister, wüllt se sik den Insatz vun Atoomwaffen vörbehollen. To'n Afschrecken. Den Insatz. — Vör stückerwat 15 Johr (in'n kolen Krieg) weern potenschielle Angriepers noch afschreckt vun't Vörhannenween vun Atoomwaffen. Woans de funscheneeren, wüß een ja. Insett wurr keen. (Oder heff ik wat verpasst?) Man nu: Insatz — to'n Afschrecken. — Sünd wi alle so veel robuster worrn, dat us nix mehr afschreckt? Orrer sünd wi verdöösbaddelt? Hebbt wi vergeten, wat Atoomwaffen maakt? — Midücht, Vergeten un Verdöösbaddeln hett dor wat mit to daan... dat schreckt mi bannig af.


26.1.03.... Frünnschap

Min Chef, Friedemann, denkt ja nu heel anners as ik över'n Krieg gegen Saddam. Wi kabbelt us ok. Letzt sä he, wi Düütschen harrn nu de Frünnschap mit Amerika (d.h. de USA) totaal verratzt, un dat allens för so'n Swienshund as Saddam! Dat weer doch 'n Unding! Un leisten köönt wi us dat ok nich!

Hm. Mit den Swienshund hett he Recht. Avers woans is dat mit de Frünnschap? Wenn wi meent, dat uns Fründ Schiet buut, schullen wi denn liekers mit em gahn? Is dat Frünnschap?

Frünnschap steiht nich för sik alleen. Se steiht op en gemeensame Werte-Basis. Düsse Werte mööt beed Frünnen so wichtig ween as de Frünnschap sülvst — oder wichtiger.
— Dat gifft Saken, de würr ik mit min besten Frünnen nich mitmaken. De Fründ, de de gemeensame Basis verlett, kann op mi tellen, dat ik em segg, wenn he na min Menen in de Irr geiht. Dat ik em de Wohrheit segg. Em hölp, wedder klaartokamen. Wenn he dorvun nix weten will un liekers min Ünnerstütten för sin Schietbuun feddert, bringt he de Frünnschap in Gefohr. — Angst heff ik nich in en Frünnschap, min Fründ de Wohrheit to seggen. Vun "leisten könen" kann nich de Reed ween. Woans denn?!?!

De Frünnschap, de bloots sik sülven kennt un keen Werte, op de se steiht, is de "Frünnschap" vun de Mafia, 'neem dat bloots op ankümmt, dat de "Familie" tosamenhöllt, egaal för wat. Dor kümmt dat ok op an, sik nienich gegen de mächtigsten "Familien-Mitleder" to stelln. In en echte Frünnschap gifft dat keen Macht.

Bi de USA un de Düütschen weer dat doch nau so: As de Düütschen mit de Nazis deep op Irrweeg weern, hebbt de USA dörgrepen. Dat weer hart för de Düütschen, avers dat weer de Wohrheit, se hebbt't insehn, un achterna hebbt wi't de USA dankt. Dat is Frünnschap. De kann't af, sik de Wohrheit totomoden.

Nich för Saddam würr ik (wenn't denn so weer) de Frünnschap to de USA riskeern. För de Frünnschap sülven würr ik't daan. För Saddam würr ik keen Höhnerdreck riskeern. De Keerl, Saddam, is doch keen Schuss Pulver weert.


23.1.03.... Newspeak

Newspeak heet in Orwell sin Vertelln "1984" de Spraak, de sik de Diktatuur to'n Verdummdüveln vun de Lüüd utdacht hett. "Freden is Krieg, Leev is Hatt, Frieheit is Slaaverie" — na düsse irre Logik funscheneert Newspeak. Na, wi kennt dat ja meddewiel. Unwort des Jahres? Dat gifft nix as Unwöör mehr. Man dat warrt ja noch dicker kamen. Komisch — midücht, op Platt is dat Verdummdüveln nich so licht as op anner Spraken. Villicht schullen wi so veel as mööglich vun den Polit-Praat op Platt översetten, dat wi klaarkriggt, wat dat heten schall. Poor Newspeak-Unwöör to dat Kriegsgetümmel heff ik mi al mal översett:

"De Tied för Saddam löppt af" (Bush, Cheney, Rice, Powell u.a.) = In de Wööst is us dat in'n Summer to hitt.

"Präventive Sülvstverteidigung" = Angriffskrieg

"De irakischen Suldaten schullen man beter ehr Befehle verweigern, süß warrt se na de Befreiung vun Irak as Kriegsverbreker behannelt" (Bush) = 'keen nich för us is, is'n Verbreker.

"In Tokunft warrt wi mehr Rüchsicht op nehmen, uns Verbünndte to övertügen" (Powell) = För'n neegsten Krieg maakt wi mehr Reklaam.

"Düütschland is en Problem. Frankriek ok." (Rumsfeld) Hm. Dat krieg ik noch nich översett. Wat heet "Problem"? Dor seh ik noch nich klaar. Man wohl föhl ik mi nich, so as Problem.


17.1.03.... "Kein Feuer, keine Kohle"...

...heet dat in een Vulksleed, un schoonst dat 'n Leevsleed is, schient doch de Titel tominnst op uns Regeern maakt. Denn Füür hebbt se ja nich veel, un Kohle, Knete, Schotter, Kies — dat hebbt se ja nu ganz un gor nich. Borgen dröfft se sik wieder keen, süß gifft't Arger mit de EU vunwegen de Stabilitätskriterien för'n Euro. Dor is Düütschland ja an'n Poller, wat dat Schuldenmaken angeiht. Wenn se sik mehr borgt, kriggt de EU nochmaal poor Milljarden Euro an Straaf babenop! Man bet Enn Mai schallt se liekers bi de EU op'n Disch leggen, woneem se dat Geld hernehmen wüllt. Nu is gode Raad so richtig düür.

Avers midücht, dat geiht dochen. Denn bi en anner Kriterium, dor staht wi opstunns gor nich slecht dor — un düt Kriterium is de Inflaschoon. Wi harrn verleden Johr mit 1,3% de ringste Inflaschoon in de EU. Dor sünd wi also al lang noch nich an'n Poller; so bi twee Perzent hebbt wi dor noch Luft. Un nu heff ik en Fraag; vun Weerschap verstah ik ja man wenig. Kunn uns Regeern nich eenfach Geld drucken? Bet wi bi de Inflaschoon ok an'n Poller kemen? Denn mööt se natüürlich ophöörn; avers denn harrn se doch wedder'n beten Geld un bruukt sik keen borgen. Se kunnen ja ok welk an de armen Kommunen utdelen, de nu binah op'n Rest gaht. Geiht dat? Kann mi een seggen, worüm dat nich gahn schall?


16.1.03...."Intressante Tieden"

Twee Düsenfleegtüüch suust över Holsteen. Se öövt ehr rasen Flegerie. — Ik heff keen Krieg beleevt, bün veel to jung. Man wenn mal in't Kiekschapp histoorsche Biller kaamt vun Bomben, de ut Fleegtüüch fallt — sachen dalrieselt as lüchen Pünkt — , denn mutt ik jümmers wegkieken, denn warrt mi slecht. De Dood — vun baven — ut Fleegtüüch — anonym op Minschen dalregnen — dat schall nie nie nie nie nie nie nie nie nie nie nie nie nie nie nie nie nie nie nie nie nie nie nie nie nie nie nie nie nie nie nie nienich wedder kamen!

"Muchst du in intressante Tieden leven!" (Chineeschen Flöök. (Ja, Flöök.))


12.1.03....Nich satisfakschoonsfähig

Nee ok, dat harr ik ja nu nich dacht, dat Nordkorea so en povern Vereen is. Dat de Lüüd dor verhungert, weet wi ja; man de sünd apensichtlich sowat vun pover un plebejisch, dat se de USA glatt den Krieg verklaarn kunnen, un de würrn dor gor nich op achten!

Nordkorea — mit sowat geevt de USA sik ja nich af. Bloots diplomatisch, versteiht sik. De Bottschafter vun Nordkorea vertellt jüm, dat sin Land twoors den Atomwaffensperrvertrag un den Raketenteststopp opkünnigt hett, avers opstunns keen Atoomwaffen buun will. Un wat deit de US-Diplomat? He glöövt em!

Dat is Ignoreern as hoge Kunst, meen ik. Dat maakt mi Indruck. Ik warr dat öven. Opneegst ignoreer ik mal dat Glatties bi't Autofohrn — oder de Vörfohrtsregelung — oder wat anners, wat ik minnachten do. Hmm... an wat erinnert mi dat allens? En Melodie heff ik in'n Kopp... en Leed: Dat Leed vun Pippi Langstrumpf!

Zwei mal drei sind sechs — widdewiddewitt! Und drei sind neune;
wir machen uns die Welt, widdewiddewie sie uns gefällt.

Un dat gefallt us nu mal nich, dat de Habenichtse in Nordkorea een realere Bedrohung sünd as Irak, 'neem dat dat schöne Eerdööl to halen gifft. Dorüm is dat ok nich wohr.


5.1.03..Popstars, Hexen, Saddam

Kennt Se de Kunst, wat ut to maken, woneem nix is? Popstars to'n Bispill. Bestimmte Agentuurn köönt dat. Se wählt een ut, de würklich nüms is — en Dutzendminsch. Se erfinnt en Story un konstrueert en Image för em. Dorop warrt he drillt. Se betahlt poor Bläder dorför, dat de Interviews mit em föhrt un em groot rutbringt. Mitmaal reedt allens vun em — a Star is born. Un denn löppt de Medienmaschinerie vun sülvst.

Liekso weer dat ok domalen in de Tied vun'n Hexenwahn. Dor wurr ut dat blanke Nix en Levensgefohr konstrueert — mit Story un Image un allens. De Lü vun de Inquisischoon domalen glöven dor sogor sülvst an, schoonst se dat allens erfunnen harrn.
Un mit de "Hexen" weer dat so: Wenn du eenmal as "Hex" bezichtigt weerst, denn weerst du een. Geev keen Torüch. Wurrst henricht't. Tovöör harrst du de Gelegenheit, din Schanddaten to "gestahn". De Hex gesteiht — dat is de Bewies. Oder du gesteihst nich. Denn weerst "verstockt". Dat weer noch leger. De Hex lüggt — dat is de Bewies. Dat Urdeel stunn fast, vun de Minuut an, dat du as Hex utschreegn wurrst.

Dat Urdeel steiht fast. Würr Saddam gestahn "Ja, ik heff Waffen buut", denn keem de Krieg. De Hex gesteiht. — Deit he dat nich un kaamt de Kunnerlöörs ut Irak trüch un seggt "dor weer nix", denn kümmt de Krieg ok. De Hex lüggt! Se is verstockt!

Rumsfeld erklärt: Sollte sich bei den Inspektionen herausstellen, dass der Irak gar keine Massenvernichtungswaffen habe, sei dies nur ein Zeichen dafür, dass die Inspektoren bei ihrer Arbeit behindert worden seien, betonte Rumsfeld. (nz)

Saddam is'n Verbreker. Ja, dat is he. Man hett he Massenvernichtungswaffen? — De Anschülligung sülven is de Bewies. Mehr bruukt't nich. — Un de Gefohr, dat Irak de USA angriept? De grote Mehrheit vun de US-Börger glöövt doran — angeevlich. Kann't wahr ween? Wa reell is de Medienwelt? So reell as'n Popstar — so reell as Hexerie?


28.12.02....Klonen? Nee — Sex!

Dor vertellt welk nu, se harrn en Baby kloont. Dat Baby is denn en exakte Kopie vun dat eenzige Öllerndeel, dat dat hett. (Twee Öllern hett dat ja nich mehr. Bloots noch een Sorte Arvgood.) Allens plaanbaar, berekenbaar, kunnerleerbaar. Stolt sünd se dorop. Düsse Idioten seggt sogoor, so weer de Minschheit tostann kamen. Is se avers nich! De Minschen hebbt nu dat Klonen erfunnen, Gott avers hett sik den Sex utdacht, un dat dücht mi denn doch de veel göttlichere Aart, Babies to maken (wenn överhaupt). Gott will nämli gor nich kunnerleern un bereknen. He leevt den Tofall, dat Vertruun un de Lust — allens dat, wat düsse Idioten hassen daat. He will niege Minschen, nich jümmers desülvigen — he will keen Klone. Dor warrt he faken missverstahn, dücht mi; ok Einstein (de keen Idiot weer) sä "De Ole wörfelt nich." Dat sä he vun de Quantenmechanik, un ok dor is verkehrt. De Ole wörfelt geern, överall; un wi schallt ok wat wagen, wat nich kunnerleerbaar un berekenbaar is.


12.12.02....De "Achse vun't Ööl"

Ik kunn mi weglachen! Nordkorea hett jüst ankünnigt, ehr Kernenergieprogramm wedder optonehmen. Heel driest hebbt se't seggt; Angst harrn se keen mehr. Vör poor Weken keem rut, dat se an Kernwaffen forscht; dor harrn se villicht noch Angst. Amerika rünkel de Stiern. Man nix passeer. Gifft nix to halen. "Achse des Bösen" ja, avers keen Ööl. De Erkenntnis güng de nordkoreaansche Regeern op: De, de keen Ööl hebbt, köönt so böse ween, as se Lust hebbt. Un de Nordkoreaner hebbt Lust! Villicht verkünnt se us morgen fröhlich, dat se Giftgas in groten Stil produzeert. Passeern warrt jüm nix. Bloots de, bi de dat wat to halen gifft, mööt oppassen. Bloots de köönt mitmaal so "böse" ween, dat Amerika ingriepen mutt.

Is't nich afsurd, to'n Lachen? Weer't en Kabarett, würr ik dorför sogoor Intritt betahlen! — Man bloots, Kabarett is dat keen.


6.11.02 ....Wat seht Se denn, Herr Präsident?

Oha! Nix to sehn! Man bloots nix merken laten...Hüüt wüllt wi George W. Bush graleern, dat sin republikaansche Partei nu ok de Mehrheit in'n Kongress wunnen hett. Much Se dat to'n Goden gedeihn, Herr Präsident!

Op düt Foto hett Mr. Bush jüst nu nich so den Dörblick. De Schutzklappen vör de Linsen vun'n Fernkieker sitt dor nämli noch op, un he kann nix sehn. Dat lett he sik avers nich marken, nich? Dat maakt em gor nix. En starken Mann maakt sowat nix!

— Se köönt dat Foto vergröttern, wenn Se op klickt. Trüch kaamt Se denn mit'n Trüch-Knoop in SeEhr Browser-Symbolliest.


23.10.02 ....De Overkill

Dusend Geiseln! Nu hebbt wi dat. Dusend Geiseln in Moskau. Vör poor Johrn kunn een noch vun sik reden maken mit een entföhrten Fleegtüüch; dat is lang vörbi. Dat is reinweg Nostalgie, is dat. Keen Minsch, d.h. keen Feernsehsender, kiekt mehr na'n entföhrten Fleegtüüch. — Dusend Geiseln! De Overkill, us ole Bekannte ut'n kolen Krieg, lett gröten. Düt is de terroristische Overkill.

Un Terror is dat je nu. Liekers wat de Krieg in Tschetschenien de gröttere Terror is, is ok düt Terror. Liekers wat sik de Welt een Schiet üm de Tschetschenen scheert hett, jüm alleenlaten hett, is düt Terror. Nu scheert se sik üm jüm. Nu sünd se groot in de Medien. Dat deit de Gewalt. Gewalt gifft di Opmarksamkeit, Gewalt maakt wichtig. Mark op! Vergitt dat nich. Vergitt allens annere, man nich de Gewalt!

'keen Gewalt deit, hett betere Kaarten as de, de freedvull sin Saak bedrifft. (Mark di dat! segg dat na!) De Kurden, de Palästineeschen, de Tschetschenen warrt wohrnahmen as ünnerdrückte Völker, un se kriggt Sendetiet in't TV. Gewalt warrt belohnt, se warrt medial un politisch feddert. (Lehrt dat, Kinner un Völker!) In poor Johrn kann jedereen an nukleare Waffen kamen — de "dreckigen Bomben", na, avers dat geiht doch! Warrt Tied, dat alle kujoneerten Völker, Schichten, Lü sik dat to Harten nehmt un op de Welt een groten Weltbörgerkrieg enfacht!

Wat, leve Weltgemeenschap, dat wüllt ji nich? Dat schall nich so ween? Denn köönt ji nu fix wat daan:
Wiest de Geiselnehmers op de ganze Welt, dat de freedliche Weg an't Teel föhrt! Sett en Teken! Maakt Tibet frie!


12.10.02 .."Ich töte, also bin ich"

In Finnland hett en junge Mann sik sülven, en Inkoopszentrum un 6 Lü in'e Luft jaagt. In'e USA scheet en anonyme Heckenschütt elk Dag een Minsch doot — bloots so. Kinner warrt vergewaltigt un ümbröcht — bloots so. Dat is Gewalt "bloots so", Gewalt as Sinnen-Stimulaschoon, Gewalt för sik sülven. Gewalt is anschienen de eenzige Aart, lebennig to ween, dat eenzige Levensteken vun mennig Minschen. Gewalt is dat, wat in uns frömd worrn Welt nableven is vun't Leven. —

Natüürlich is Gewalt een Aart, lebennig to ween. Avers se schull en Teel hebben. Un dat Teel schull nich wedder Gewalt ween! Avers so is dat nu nich. Wi sünd afsneden vun de natüürliche Levenswies, sünnerlich in de Grootstädte mit ehr künstliche Ümwelt ut Asphalt, Beton un Metall; dat maakt aggressiv; ik weet dat; dat maakt mi aggressiv. De natüürliche Regulaschoon vun de Sinne geiht perdü. "Extrem" mutt allens ween, dat een dat överhaupt noch föhlen kann. Togliek is düsse künstliche Welt heel anfällig — överall kann een ehr verletzen — Fleegtüüch, Hoochhüüs... överall sünd Minschen anonym, avers in grote Massen tosaam... Un op düssen Borrn fallt de Saat, de nu rieklich in'e Welt utstreit warrt: Gewalt is OK, Gewalt is Recht, Gewalt is sogoor schick. Gewalt is en legitime Weg för allens, wat du wullt. — Dat predigt de mächtigsten Staaten in'e Welt (natüürlich de mächtigsten, de wat swackern gefallt dat gor nich). — Gewalt is dat eenzige Levensteken ok mang de Staaten.

De eersten, de düsse Lekschoon begriept, sünd de Kinner.


12.9.02 ....George W. Bush seggt:

"Regeern, de ehr Legitimität verlaren hebbt, warrt nu ok ehr Macht verleren." Hett he würklich seggt, jüst nu, vör de UN. Ganz wat Niegs! Güllne Tieden kaamt! Dor fallt een doch glieks so een Dutz Regeern in, de al lang keen Legitimität hebbt orrer nienich hatt harrn, nich? Wenn de USA dat würklich utrichten wüllt, dat de dör legitime Regeern ersett warrt, överall op de Welt, dennso warrt se swupps op Platz 1 vun de Ranglist vun de nettesten Naschoonen vun de Welt huppen. Alle Welt warrt jüm leven. Woso hebbt se denn dormit so lang töövt?


Noch öllere Notizen: Hier klicken


na baven