Controlling

vun Heinz Tiekötter

Manne is een vun uns Stammdischbreuders. He hett en fiene Karriere mookt. Studium, Angestellte un dree Johr loter keem de Wessel to een grote swedische Konzern. Nu stunn op siene Visitenkoort: Leiter Controlling.

Wi seten bi Ossi in Kroog un fierten mit Manne sien neen Bohntje un leten em för siene Runnen hoochleben. Op miene Froog, wat denn so'n Controller to doon hett, keken em alle neeschierig an. He smuster un verkloor uns de Opgoov an een Bispeel: Stellt ju mol vör, dor gifft dat een weltberühmten Künstler, segg wi mol een Geiger, un loot em ruhig Jehudi Menuhin orr mit en annern liekso beropen Naam heten. De Geiger gifft op de hele Welt Konzerte un verdeent so veel Geld, dat he dat gornich utgeben kann. He mutt dat anleggen. Un jümmers kümmt wat hento. Dat ward mehr un mehr. Eerst hölpt em noch siene Bank un verköfft em Bedeligungen. Man bald mutt he 'n Manager instellen, denn he hett markt, dat de Bank jümmers toeerst an sik sülmst dinkt. De nee Manager is vigelienschen Keerl. De hett veel Erfolg. He köfft hier ne Firma un dor en Bedeligung an en Konzern. Dat ward jümmers mehr un düchtig wat in de Kass. Un denn kümmt jo ok wiederhen dat Honorar vun uns Geiger sülmst dorto.

Lang blifft de Manager nich alleen. Bald sünd Lüüd to'n Finnen vun Koop-Gelegenheiten ünnerwegens. In de Bookhollung sütt nu all fiev Domens öber de Böker un tellt un schrieft op, wat rinkümmt. De Manager meent, dat dat Tiet ward, nu en Holding för de Verwaltung vun all den Riekdoom un de Bedeligungen vun unsen Geiger to grünnen. De weet siene Verwaltung in gode Hannen, is in de Welt ünnerwegens un fiedelt jümmers wieder för noch mehr Geld.

Dormit se den Öberblick nich verleert, mutt de Firma nu ok noch'n Controller instellen. De sall den Manager beroden, woneem orrnlich wat rutspringt un wo dat Geschäft mau is. De nee Controller hett de neegsten Weken goot to doon, üm sik mit all'ns vertruut to moken. Denn kümmt de eerste Vörstandssitten. Weet ji, froogt Manne uns nu, wat en Controller as Eerstet frogen ward? Pass goot op. He ward frogen: "Woför bruukt wi in uns' Konzern egentlich noch düssen olen Geiger?!"