![](welt_biller/covid_rot.gif)
Breiw van Covid 19
vun Hildegard Tölke
In Lenzmaond 2020 bin ick bi jau ankaomen, icke, Covid
19, dei van Corona.
Ick häbb mi nich vörher anmellt. Aower nu
schriew ick jau ein'n Breiw, dat ick up Weltreise bin, un dat up jau
masse taukummp, wat gi nich för möglick holt. Väle
häbbt dat nich glöwet, jüsso at inne Bibel dei Thomas
aohne Glowen: Hei wull seihn un feuhlen! Un dat häbbt gi nu uck.
Schaulen,
Kitas un Karken wüdden schlaoten. Kinner missen ehre Frönde
un Lehrers. Kien Beseuk mehr in Alten-un Pflägehüser. Kien
taosken mehr. Väle seeten alleine tau Huuse, mössen in Quarantäne
inhäuen. Inne Krankenhüser harn Dokters un Krankenschwestern
Dag un Nacht dei Hannen vull tau daun. Kiene Hochtied- off Goldenhochtied
wüdd fiert. Koppels, dei Musik off Theaoter spälten, kunnen
sick nich mehr draopen. Kien Schützenfest, kiene Karmste, kien
Stoppelmarkt, kiene Fautballspille mit Fans un kien Karneval. Aals
solange ute, bit ick mi trüggetrecke. Uck bi Kooplüe un
in Hotels bleew dei Kundschaft wäge. Inne Luft un uppe Ern, äöwerall
häbb ick jau miene Tähn'n wiest. För aals häbb
ick jau ein P vörsettet.
Angela Merkel un dat ganze Koppel vanne Regierung wassen
mangers dei reinsten Nachtuulen. Dei häbbt drocke Regeln un Gesetze
maokt, dat jau dat bloß nich noch leiper draopen dö. Sei
häbbt masse Geld inne Hand naohmen, süss käöm
dei Wirtschaft ganz ünnere Räöe. Mähl un Rullen
van Papier schläpten gi nao Huus. Wecke wassen all an 'Hamstern.
Väle Lüe häbbt sick gägensietig holpen un Maut
maokt. Aower dat lätt nu all sinnig nao.
So
langsaom häbbt gi jau bekrägen un begräpen, dat 'ne
flaue Tied kummp. Dat Rümmeaosen, dat Windken un Pirrewaihen
un immer höger rupp, is eierstemaol daon. Jederein drägg
nu fuchtig sien Schnuutenpulli up Mund un Näsen. Dat hang jau
aale alllange taun Halse rut. 'ne tiedlang knuust gi noch doran. Vör
un an väle Dörns staiht nu: "Bloß mit Maske rinkaomen!
Affstand 1,5 m holl'n! Bloß bit 3 Lüe in 'n Laoden! Hannen
wasken!" Dei välen Tests wiest jau, wor ick äöwerall
bin un weckern ick up'n Kieker un tau packen krägen häbb.
Middewiel
willt dwerige Klaukschieters nich ümliek. Bi Schluck un Beier
vergätet sei drocke, dat ick noch dor bin. Schluck un Beier maokt
lichtfarig. Aower ick häbb dormit räket. Un väle fäuhert
un fleigt tau ehr Vergneugen in Urlaub. Mit wecker Querköppe
bin ick stiekum trüggekaomen.
In Berlin un woänners loopt Paddjacks mit Schiller
uppe Straoten, larmt un willt jau wiesmaoken, dat Corona ein "Fake"
off Gespenst off Aopenkraom is. Laot jau nich dissen Floh in 't Ohr
setten. Ick bin alltied noch dor. Ick kann jau krank un schlapp maoken
as'n Plünnen.
Aower
ick häbb uck all market, dat gi langsaom strammweg un hölkernd
mit Maske un Affstand wieterkaomt.
Laotet nich dei Flittkes hangen! Gi packt dat! Ick weit,
dat nimmp jau aale noch 'ne tiedlang heller mit.
Covid 19
28.12.2020
|