Dei bösen Russen

vun Behrend Böckmann


Tau Tieden von'n Kollen Krieg un denn Iesern Lappen twüschen Ost un West keem in'n Osten dei Gefohr ümmer von den Klassengägner ut'n Westen; un dei Westen hett dat ja ok so henkrägen, dat mit dei Wenn' för dei "diktatursozialisierten" Minschen in'n totalitären Osten dei Marktwirtschaft un Demokratie as Phönix ut'e Asch upsteech un so dei olle Planwirtschaft un Parteidiktatur 'n Enn' fünn. Klauke un gelihrte Lüd näumen dat Paradigmenwessel, man künn œwer ok ganz einfach seggen, dat Läben leep un löppt nu nå 'n anner Muster af. Un tau dit Muster passt ok dei Russenhass, denn Russland, dat wier totalitäre Diktatur, Bolschewismus, Kommunismus... Russland, dat is Verbannung in'n Gulag von Minschenrechtler un Minschen, dei nich eindüdig heterosexuell sünd orrer sik nå't Enn' vonne Sowjetunion tau dull an't Volkseigendom vergräpen hemm'. Un dor gifft dat noch 'n wietlüftige Romanow-Verwandte, dei up Putin sienen Stauhl in'n Kreml spekeliert... Un tau giern wür man Putin von sienen Thron schubsen, so as man dat in Libyen mit Muammar al-Gaddafi un in Irak mit Saddam Hussein måkt hett un wat 'n in Syrien ok mit Baschar al-Assad giern måken mücht. Œwer siet den "Sputnikschock" vermengeliert sik Hass mit Anseihn, dei Drom von 'n Siegesparad' in Moskau, von wecker einst Napoleon un ok düütsche Herrscher dröömten, ward sik nie nich erfüllen.

Liekers möt 'n Russland in'n Schach hollen, un so ümzingelt dei Weltschandarm Amerika dat gröttst Land up uns Ierd un schüfft Moskau jedwede Maless inne Schauh. Dorbi hett Amerika ok ganz väl Schiet an'n Hacken. Wo bleef dei Minschlichkeit in'n Ümgang mit dei Ur-Inwåhners un dei Sklaven ut Afrika? Worüm würn Ethel un Julius Rosenberg mit jüd'sche Afstammung wägen nie belechte Atomspionåsch för Moskau up'n elektrischen Stauhl henricht't, wür dei Börgerrechtler Martin Luther King dodschåten, hett dat FBI in Angela Davis as Kommunistin vonne Schwatten Panter 'n Terrorristin seihn, sei up'e List von dei teihn an'n miersten söchten Verbräker inne Staaten sett't un süll ok henricht't warden? Warüm wür dei Sänger Paul Robeson as Kommunist schikaniert, nådem hei 1934 Verwandschaft inne Sowjetunion besöcht hett un 1936/37 för dei Internatschonalen Brigaden in Spanjen sungen hett?


Ein Hart un ein Seel?

Nå buten gäben sik dei Staaten anners. Care-Pakete un Marshall-Plan helpen, un as dei Westverbünneten gägen dei Afmåkung mit Stalin dei "Trizone" as Vörlöper vonne olle Bunnesrepubblik grünnen un dei Westsektoren von Berlin afriegelt würn, dunn wür den Russen allens inne Hacken schåben un westliche "Rosinenbomber" as Redder vör't Späukel Kommunismus taujubelt. Dei Korea- un Vietnamkrieg güng nich gaut för Amerika ut, denn keem noch dei Sputnikschock — dat Weltrebeit vonne Kommunisten möt noch mihr ümzingelt warden.

Alaska un Hawai as Bundsstaaten sünd dortau nütt, œwer man möt noch dichter ran. Un so warden ut dei amerikan'sche Besatzungstruppen inne Trizone nå un nå utlännisch amerikansche Kontingente un man buucht ut Verbunnenheit tau Düütschland dat Hauptquartier vonne US-Armee för Europa in Wiesbaden ut, statschoniert ca. 35.000 Mann inne Bundsrepublik, dorvon 'n Grotdeil inne Luftwaffenbasis Ramstein, wo Militärs un ehr "Entouråsch" denn 52.000 Amerikaner utmåken un sik dat so as in'n amerikan'sche Lüttstadt komodig inricht hemm'. Von Rammstein ut stüern dei Militärs taun Bispill Drohnen inne Höhlen an'n Hindukusch, üm Talibans ümtauleggen, orrer ok Akschonen gägen den IS in'n Irak. Un denn schäpern noch schwemmende Fleigerlannebåhnen as dei "USS Harry S. Truman" up'e Ozeane.


Harry S. Truman frontal

Blåchögig hett Gorbatschow annåhmen, dat dei Westen sien Verspräken höllt, dat, wenn denn dei DDR Deil von't NATO-Mitglied Bundsrepublik is, disse Militärverbund nich dichter an Russland ranrücken ward. Œwer dat kümmt nich so. Nå dei Devis' "väl schnacken, wenn dei Dach lang is" warden dei Afspråken mit Gorbi nich iernst nåhmen, dei einstigen Ostblockstaaten un dei Sowjetlänner in't Baltikum plinckögen mit Brüssel, warden EU- un NATO-Maat un hemm' ok den Euro œwernåhmen. Un nu willen dei Ukraine un sülfst dei Kaukasusrepublik Georgien EU-Maat warden. Dat will dei Russ Putin nu nich so hennähmen un sett't den Westen 'n "P" dorvör — un hei is wiederhen dei lege Böse, denn hei verlangt nu von Amerika dat, wat hei sülben måkt hett: Dat amerikan'sche Militär sall ok so as dei sowjetische Rode Armee Düütschland verlåten!

Œwer in'n Momang süht dat ut, as wenn dei NATO allens ünnernimmt, dat Putin dei Geduldsfåden ritt, üm in'n Gägenschlach niege Waffensysteme uttauprobieren, taun Bispill Drohnen, dei nich utmåkt warden un up'n Punkt genau angriepen kœnen...


"Tschüß! Wi Drohnen köönt dat allens allein!"


20.2.2022


na baven