Wenn't Böllern tauväl ward

vun Behrend Böckmann

Dat wier  dei Bilanz von 'n verläden Niejohrsnacht:

• gaut 120 Milljonen €uros hemm' dei Böllerfabrikanten ümsett't  (nich inräkent dei Böller ut Polen un annere Länner);
• dei Böllerfreudigen hemm' 2000 t Fienstoff inne Ümwelt friesett't,
• in'n Stadt as Dresden legen inne Niejohrsnacht 20 t Böllermüll up'e Stråten, in Städt' as München, Hamborg, Köln, Berlin orrer Frankfort wiern dat anne 200 t;
• in Leipzig böllert sik 'n 17-Johriger dod, in Thüringen hett 'n 42-johriger Kierl dörch Böller sien Ünnerarms verlurn, inne Gägend von Schleiz ritt 'n Böller 'n 21-johrigen Kierl 'n Hand af, in NRW kläben por Böller tausåmen un rieten 'n jungen Kierl von 27 Johr twei Finger af, in B-W kricht 'n 38-jöhriger Kierl 'n Böller in't Gesicht un möt in't Krankenhus, bi 'n 8 Johr ollen Jung ut NRW lannt 'n Böller inne Kapuz, knallt em an'n Kopp un hei möt ok in't Krankenhus;
• Kriminelle hemm' in Nordhurn (NS) inne Nacht tau Oltjohrsåbend Böller in'n Wiert von 10.000 Euros klaut;
• Vermummte fallen in Berlin œwer Schutzmänner, Füerwihrlüd un Krankenwågens her, Randalierer setten Mülltunnen un Autos in Flammen;
• in MV dörf nå §23 vonne ierst Verordnung taut Sprengstoffgesetz böllert warden, also œwerall, blot nich inne Neech von Karken, Kranken-, Ollen- un Kinnerhüs orrer von historisch wiertvolle Buwarken;
• in Grabow hemm' sik por Knallköpp nich an disse Vörschriften hollen un dat historisch Rathus so beböllert, dat 'n Schåden von 30.000 Euros tau beklågen is,
• in't ganze Land geef dat anne 40 Verletzte un ok männig Füer.

Testosteron + Adrenalin + Alkohol = Chaos

Wat sünd dat för Minschen, dei sik so dornäben benähmen? Orrer hett uns liberale Demokratie disse Minschen måkt? Orrer wür dei Scholzsche Tiedenwenn' mit Böllern willkåmen heiten as 'n lütten Wumms för dei Böllerindustrie?

Böllern is ok gaut för dei Wirtschaft, denkt sik dei gräune Wirtschaftsminister, denn Böllern lött dei Volkswirtschaft gräun warden un lött sei prosperiern. Por klauke Lüd schnacken all von 'n Böllerverbot, œwer dat is wull noch 'n langer Wech, denn Börger un Poletikers sünd sik uneins. Männigein höllt Böllern för 'n Traditschon, anner plädiern för 'n Füerwark, as wi dat von't Inselseefest her orrer von anner Stadtfiern kennen; un noch anner willen, dat dat liese, gräune, äben ümweltfründliche Böller gäben sall, un denken dorbi wull an Fleisch von'n „Strohschwien“ orrer vegane Woren.

Blot dei Hersteller sünd sik einig: Ganz åhn Chemie geiht nich, denn chemische Substanzen möten mihr as den liesen Knall ut uns Kinnertiet hergäben, den dat geef, wenn wi dei achtern Åben dröchte Schwemmblås von'n Karpen ünnern Schauh zerpedden dän. 

Insichtiger as Poletiker wiesen sik Bumarkdiskaunter as OBI, Toom, Globus Bumärkte, Buhus u.a., dei in Taukunft ut Rücksicht up Minsch, Dierten un Ümwelt Böller nich mihr anbeiden willen.