Push Pop — dei Blasenknaller

vun Behrend Böckmann


Luftpolstertaschen sallen den Breifinhalt säkern un Noppenfolien finnen wi oft as Inpackmaterial för Såken, dei licht kaputt gåhn kœnen. Un wecker hett sik noch nich den Spaß måkt un disse välen Noppen orrer Blasen as 'n Flöh knackt, sotauseggen den "Blasenknaller" spält?

Nu sünd Ünnernähmen, villicht sogor son'n "Startupper*sch — Jungünnernähmen" up den Infall kåmen, ut disse Blasenpolsterfolien 'n nieget Modespältüch, dat Zappelspältüch orrer up dinglisch dat "Pop it" orrer "Push Pop Bubble-Spältüch" up'n Markt tau bringen. Un dit Spältüch sall nich blot ünnerhollen un Kinner von'n Klappräkner afhollen, sonndern as 'n Method' helpen, Minschen mit 'n autistisch Syndrom, so as Greta Thunberg dat hett orrer anner, dei ut luder Geschäftigkeit (ADHS) as 'n Zappelphilipp gellen, sik sülben wedder so in'n Griff kriegen sallen, dat's mit anner Minschen wedder gaut utkåmen, ehr Bang un Unrauh linnern, dei Nerven schonen...

Dei Reklåme nå ward man all 'n anner Minsch, wenn man blot son'n Zappel-Blasenknaller-Spältüch sien eigen näumen dörp. Måkt ut Silikon as dei Backformen, höllt dat lange Tiet, is ümweltfründlich, backst nich an un — dat Allerwichitgste: Dei Blasen knallen ümmer wedder un nich blot einmål, as dat bi dei Noppenfolien dei Fall is. Un dei Blasen knallen los, wenn man't nå't "Touchscreen-Prinzip" anrööcht. Un denn ierst dei välen Formen mit 29 bet tau 225 Blasen: geometrische Formen as Quadrat, Dreieck un Kreis in Rägenbogenfarwen (villicht as Taugeständnis an dei Gennerbewägung) un unifarwen; Dinos, Einhüürns, Elefanten, Katten un anner Dierten; lütter Gnibbelkråm för't Späl up'e Geburtsdachsfier orrer dei Inschaulungsparty. Ok Kosmetiktaschen, Feddertaschen un lütte Stadttaschen gifft dat ut "Knall-Blasen-Polster-Silikon".


Blasenkraam in all Foorms un Farven!

Un ward dei Minsch hippelig, denn sall hei sik dei Polsterblasen vörnähmen un dei ümmer vonne ein Sied up dei anner Sied knallen låten. Un dat, solang hei Lust dortau hett un em dei Bang nich mihr œwerföllt. Denn man tau: dörch dat "Push Pop Bubble-Spältüch" taun nieget Läben finnen un dormit glücklich warden!


Bild 2: Melofors/Wikimedia Commons
11.1.2022


na baven