Bio
vun Dieter Guderian
An wat denkst du, wenn du dat Wort Bio hören deist? Wokeen veel
fernkieken deit, denkt amenn an Alfred. Du weest jå, Alfred
Biolek, de alltieds op de Schiev to sehn is. Ne, den meen ik nich.
Ik meen: Wenn du inköpen geihst, denn wüllt se di allerhand
feine Såken andreihn, von de se di vertellt, dat du allemol
tolangen dröffst. Ob du dat wohl glöven kannst?
Richtig, dor möten wi er's eenmol düchtig op'n Kien sien.
Mennicheen will di wat vörmoken. Ton Bispill: Wenn se di vertellt,
dat de Kantüffeln "ut kontrolleerten Anbuu" sünd,
denn hett dat för di går nix to bedüden. Dat heet
nix anners, as dat de fründliche Landmann von Tied to Tied an
sienen Acker vorbie fohrt. De sülve Sååk is dat,
wenn se schrieven deit, dat dat Grööntüüg "von
staatlich anerkannten Bauernhöfen" kümmt oder dat dat
ünner "unabhängige Kontrolle" steiht. Dat is Lögenkraam.
Ik nenn di noch een poor Wöör, mit de se di wat wiesmåken
wüllt: "ungespritzt", "ohne Spritzmittel",
"aus alternativer Haltung", "aus umweltschonendem Anbau",
"aus integrierter Landwirtschaft". Keeneen kontrolliert
dat.
![Bio orr nich bio?](welt_biller/bio_1.jpg)
Heff
ik di nu dörnanner bröcht? Ne, dat will ik jå gor
nich. Ik segg di lever, an wat du di fasthollen kannst: De EU, also
de europäische Gemeenschop, will uns bistahn, dormit wi de beste
Utwohl drepen und gesunne Kost inkopen köhnt. Se hett förwiss
un seker mokt, dat di dat goot deiht. In dat Johr 2001 hett se dat
"Bio-Siegel" inföhrt. Nu is seker: Wo "Bio"
oder "Öko" op steiht, is ok "Bio" oder "Öko"
bin. Disse twei Wöör dröfft nu nich mihr för wat
anners brukt warrn.
Un
wat bedüüd "Bio" und "Öko" denn
nu? Verbåden is, dat Öko-Lebensmittel bestrohlt ward, verbåden
is ok, dat de lütt Moleküle verännert ward. In de Öko-Verordnung
seggt se dorto "Verbot gentechnisch veränderter Organismen".
Hento kümmt, dat se för "Bio" un "Öko"
keen "Pflanzenschutz mit chemisch-synthetischen Mitteln"
oder mit "leicht löslichem mineralischen Dünger"
moken dröfft. Æver dat is noch nich allens. Wenn de Buer
sin Feld bestellen deiht, dennso mööt he nich jümmers
datsülvige op sienen Acker utseien. He schall alle Johr wesseln
un gehörige Tied töven, bit he wedder vun vörn losleggt
("Abwechslungsreiche, weite Fruchtfolgen"). Dat Veehtüüg
schall optrocken warrn, as em dat no siene Natur tokümmt ("Flächengebundene
artgerechte Tierhaltung"). Un denn mutt dat Veehtüüg
so fodert warrn, as wenn dat een Minsch weer, åver keen Rennradfohrer
("Fütterung mit ökologisch produzierten Futtermitteln
ohne Zusatz von Antibiotika und Leistungsförderern").
![so richtig bio föhlt de sik ok nich](welt_biller/bio_4.jpg) ![ganz bestimmt nich bio!](welt_biller/bio_5.jpg)
Wenn dat nu allens stimmen deiht, denn dröfft se di in' Supermarkt
Såken verköpen, de wo to'n Bispill heeten: "biologisch/ökologisch
kontrolliert ökologisch/biologisch biologischer/ökologischer
Landbau biologisch-dynamisch biologisch-organisch".
Kannst
du nu glöven, dat du, wenn du "Öko" inköpen
deihst, dat ok dor binnen is? Wohrschienlich jå. De EU hett
in ehr Regeln ok bestimmt, dat to kontrolleeren is, dat allens mit
rechten Dingen togeiht. Se hett ok bestimmt, woneem dat to kontrolleren
hett. Du muttst nu no eene "Kontrollnummer" kieken. Wenn
op dat Etikett "DE - 000 - Öko-Kontrollstelle" steiht,
denn kannst du tolangen. Is di to düer? Is ober gode Qualität.
Wenn du mihr weten wullt, kiek no ünner www.bio-siegel.de.
![...kraftvull tobieten köönt!](welt_biller/bio_9.gif)
|