Smusen un nett sien hülpt! Wer in't Leven tau wat kåmen will, bruukt Frünnen!

vun Behrend Böckmann

Dat is ierst korte Tied her, dor hett Wolodymyr Selensky dei EU-Uschi warmhartig „Ursula“ näumt un sei in sien Arms nåhmen — wohrschienlich in den Globen, dat dei Ukrain so fixer Maat inne EU un NATO warden künn. Un denn güng Wolodymyr in'n Maimånd klammheimlich up Europareis un flööch œwer Rom, Berlin, Aachen, Paris un London wedder taurüch nå Kiew. Hei wier ok bi'n Papst, doch dei hett em kein Waffen verspråken, sonnern den Rat gäben, dörch Verhanneln taun Fräden tau kåmen, dormit dat Starwen 'n Enn' nimmt. Dat hett Wolodymyr nich so recht gefollen. Dorför secht em dei niege italjensche Regierungschefin Georgia Meloni Hülp tau, noch ihrer as dat hei dörch dei Nacht in Berlin lannt.

Un dor hett DFB-Vizepräsident Hermann Winkler denn as Unmaut von sik gäben, dat wägen den einstigen Spälmann väle Stråten dicht sünd. Dat wier tau vieniensch, un nu möt hei uppassen, dat hei nich ok as Gerhard Schröder as 'n Russlandfründ gellen deit. In Berlin rullt Bundspräsident Steinmeier den roden Peddich för em ut. Nee, nich för Winkler oder Schröder, man för Selensky.

Wolodymyr is em ok nich mihr gråm wägen sien einstig Verbinnungen tau Russland, denn hei will ja wedder wat von Düütschland. Un denn is hei bi Olaf dei Gast, üm denn in Aachen den Korlspries för sik un sien Land antaunähmen. Wier Olaf inne Ogen von Wolodymyr mit Waffen nich ümmer gliek so spendabel un son'n bäten langtööchsch, so hett hei nu nocheins 2,7 Milljarden Euros för den Sieg gägen dei bösen Russen rutrückt; un von nu an is Olaf dei beste Fründ von Wolodymyr un Düütschland dei beste Fründ vonne Ukrain.

Dat süht so ut, as wenn dei twee Frünnen den Handslag jichenswie vermasseln wöörn;
oewer ik denk ehrder, sei kloppen sik wesselsiedig up den Rüch

Von Aachen güng dat denn wieder tau Macron in Paris. Hier würn em panzert Fohrtüüch un lichte Panzer tausäkert, äbenso dei Utbillung von mihrere Batailljons ukrain'sche Soldaten. Von Paris flööch hei noch nå London un schudert dor üm niege Raketen för dei Fleigerafwehr un Marschflauchkörper, dorünner ok weck, dei up'e Krim rünnergåhn kœnen.

Taufräden wedder in Kiew ankåmen, hürt hei gliek wedder wat von'n niegen Korrupschonsskandal: bi sienen Gerichtspräsident Knjasjew würn drei Milljonen Dollars funnen, dei hei as Smeergeld annåhmen harr.

Un wenn nu dei beste Fründ un dei annern Frünn noch mihr schwore Waffen lewern
un dei ölleren „MiG 29“-Kampfjets taun Insatz kåmen, denn jankt Selenskyj all nå
niege westlich F-16 Kampfjets un is dorbi, mit sienen inglischen Fründ Rishi Sunak 'n „Kampfjet-Koalitschon“ tau schmäden. Un wenn allens nå Plan löppt, will dei Ukrain mit all dei Frünn' noch wihrend dei Amtstiet von Joe Biden den bösen Russen dat Fell garwen. Denn in Kiew is ok all ankåmen, dat för den Fall, dat Trump noch eins Präsident ward, hei — Trump — dorför sorgen ward, dat dei Krieg inne Ukrain in twei Dåch orrer 24 Stunnen tau Enn' is.

För wat sik schämen?

Vör Johren wier all Striet utbråken
un af un an wür Schmok all råken;
man künn nich taueinanner finnen
un kreech sik düchtig inne Plünnen.
Un in Moskau wür beschlåten
Up dei an'n Dnepr ward nu schåten,
dei Spälmann is doch lütt tau kriegen,
man ward em ganz fix besiegen.

Doch dei Spälmann ward dei Held.
Hei wennt sik anne westlich Welt
un deit mit den Düwel wedden,
dat hei dat Åbendland wür redden.
Un uns Spälmann is sik wiss,
dat Düütschland solidarisch is,
doch 'n Tietlang hett dat duert,
dat man up düütsche Waffen luert.

'N Hart sik denn Strickliesel* nähm,
un mit Stahlhelms in Kiew ankeem:
fiefdusend Stück, weck Wunner —
höll 'n dor för gröttsten Plunner.
Ne, dor wull man anner Såken,
üm dei Bösen Bang tau måken:
Waffen, Panzer un Raketen,
dortau noch düchtig väl Moneten.

Sachtens leep dees Hülp ok an,
dei Westen däd, wat hei so kann,
denn Rüstung deit sik wedder lohnen
bet hen tau Ünnerwåderdrohnen!
Sülfst Gräune, dei för 'n Fräden wiern,
däd dei Kreml dull verfiern,
doch dor sei nich verlägen sünd,
richten sei sik nå den Wind,
daun von'n Fräden sik afwennen,
dei nu mit 'n Krieg künn ennen.

Denn för Gräune is dat klor:
Putin is dei niege Zor,
un üm em ut'e Welt tau schaffen
sünd ok nödig düütsche Waffen.
 Gräune daun nich blot verspräken,
mit ehr Hülp is ok tau räken,
Fix gåhn sei up Ukraine-Tour:
dei Baerbock un dei Nouripour,
ok Hofreiter un Beck un Roth
daun sik mit 'n Reis ganz grot,
vör Urt wull Göring-Eckardt seihn,
wat  an'n Dnepr is gescheihn
un ok Habeck harr't nu hild,
wull sik måken sülfst 'n Bild.
Hei verkünnt in aller Nåmen,
dat düütsche Hülp tau låt is kåmen
un grote Schåm em œwerföllt,
doch nu hei sien Verspräken höllt
un ward, åhn grot sik tau besinnen,
gaude Wür för Hülp erfinnen.
Hei will sik nich länger schämen,
will Atomstrom denn afnähmen,
wenn bi uns dei Wind utblifft,
dei düütsche Strommœhlen andrifft.

Lücht achter sien so fründlich Larv
villicht ut Schåm ok rode Farv,
dor Habeck von Rousseau** all weit,
dat, wenn dei Minsch wat Böses deit, 
un hei dat Böse denn vernimmt,
noch grött're Schåm em œwerkümmt?

Schämen süll hei sik vör allen,
dat in'n Krieg Soldaten fallen,
dat dei Klimaschutz, o Wunner!,
ward Opfer in'n Kanonendunner.

Ok wenn man dat nich glöben mach:
Pistorius von'n annern Schlach
treckt as nieger Kriegsminister
ok ganz nie dei Hülpsregister
un fäuhlt dorbi kein bäten Schåm,
denn Düütschland hett soväl all dån***.
Worüm sallen wi uns schämen,
wenn's giern unse Waffen nähmen!

* Ökelnåm för Christine Lambrecht (Kriegsministersch 2021-2023);
**Jean-Jacques Rousseau (1712 – 1778): "Die Scham wächst mit der Erkenntnis des Bösen"
** Die Bundeswehr lieferte schließlich bis Mai 2022 ein größeres Arsenal an Waffen, darunter 3000 Panzerfäuste, 500 Stinger-Flugabwehrsysteme, über 2000 Strela-2-Flugabwehrsysteme, 8 Millionen Schuss Munition, 100 Maschinengewehre MG3, 50 Fahrzeuge für den medizinischen Transport, 14 gepanzerte Fahrzeuge, 23.000 Schutzhelme, 2600 Schutzwesten, Nachtsichtgeräte und weitere Waffensysteme. Weitere Lieferungen folgten.