En Bank för öllere Lüüd!

vun Hannes Frahm


Na, nu jüst in de Corona-Tiet sünd männich Bänk in de Parks un in de för all togänglichen Steden deelwies komplett un deelwies to'n Deel afboot. Wi ölleren Lüüd, bi't Spazerengahn oder bi't Inkopen, hebbt keen Steed, woneem wi mal wedder to Puust kamen köönt.
Bi dat Impen hebbt de Politikers an uns dacht, aver wieder hebbt de bito noch nich dacht. Un mit de "Bank" dor hebbt de nie nich över nadacht.


En Sofa geiht ok...

In uns Regeren in Berlin, is je vun de öllern Lüüd ok bannig wiet weg, dor gifft dat ok en Ministerin för Familien! Ja, jüm mööt nu nich lachen, ja dat gifft dat wohrhaftig. Aver wenn een nipp un nau mal dörchkieken deit, wat de so maken doot, denn is dor nich veel mit Utnahm vun de Pleeg.

Wokeen kümmert sik denn üm uns, wi ölleren Lüüd? Ok de Jungen warrt mal oolt! Aver dor denk de doch nu nich an. Europa-, Bunns-, Lanns- un Kreis-Regeren so as ok de Gemeen denkt nich an uns öllere Lüüd mit uns Puust. Corona mimmt uns nu noch de letzt Puust mit ehr Viren un mit de Parkbänk weg.


Foto: Katja Renfert

Un nich blots dat! Keen vun de Politikers hett denn de olen Lüüd mal fraagt? Woneem in düsse Lobbypolitik is denn de Lobby vun uns öllere Lüüd, de ehr Arbeitsleven achter sik hebbt? De den Staat vöranbrocht un oprechtholen hebbt? Verpuusten? Ne, dat dörvt wi, so as dat utsüht, för de Politikers nich!

Jüst 2020, wonehm dat noch nich so recht togang weer mit Corona, dor kunnst al in de Dagblööd nalesen, dat de Banken dat Lüttgeld afschaffen wüllt. Jüst dor heff ik mi al fraagt, of de Bänker keen Geweten hebbt? Weet de överhööft, wat dat heten deit?

Keen Spenn mehr op de Straat an de "Kriegsgräberfürsorge", an "DRK", "Johanniter", "Malteser" un ok de Klingbüdel in de Kark blifft leer. Dor klingt nix mehr! Do heff ik mi al fraagt, of de ni in de Kark un op de Straat mit en Koortenleser mit WiFi oder Bluetooth oder "G5" ünnerwegens sünd. Na ja, ok de mööt sik denn ümstellen, heff ik dacht, oder de kriegt keen Lüttgeld mehr. De Bänker warrt dat denn je wull för de Allgemeenheit övernehmen!
Aver de Bänker schiet di wat, de verbrennt doch lever Geld bi Wirecard oder bi CumCum! Na de Narichten warrt dat ja sogor dörch de Politik föddert!


De Teddy bruukt keen Geld, aver doch en Bank

Nu hebbt de Bänker wedder en groot Problem. Un dat kummt dorvun, dat de nich wiederdacht hebbt! Tja, ok Bänkers schüllt ehren Bregen in'n Loop holen, sünst warrt ok de Bänker oolt un mööt dringend uttuuscht warrn.

Aver jüst düssen Bregen hebbt de nich in de Gäng holen! Ne, nu wüllt se de EC-Koort afschaffen. Denn dat gifft Banden, all sieht mehreren Johren, de plünnert mit Breekiesen, Gasexploschonen un rutrieten mit Autos de Geldautomaten. Bet vundaag hebbt de Bänkers nich gegenstüert. Worüm ok, kost doch de Banken Geld!
De lütten verdröögten Bregens vun de Bänker nehmt nu den beteren, körtern Weg, ahn Natodenken! Ja, de nehmt de Lüüd nu de EC-Koort!


Sooo schöne Bänk gifft dat — aver da gifft't keen Geld!

Hebbt de Bänker würklich keen Geweten? Hett uns Regeren dorto ehr Inverstahn geven? Is dat mit de Bunnsministerin für Familien so afsnackt un afsegent worrn?
Dat heet, keeneen kann mehr Geld an den Bankautomaten kriegen, keeneen kann mit de EC-Koort in de Geschäften betahlen, keeneen kann mehr tanken! Un dat nich bloots wegen de Priesen... — Dat allens geiht blots noch, wenn een en Smartphone hett!

Wenn dat so is, denn mööt de Bänker oder de Regeren de Lüüd dat Smartphone praat stellen un ok de Geller dorför betahlen! De Bunnsgerichtshoff hett rutgeven, dat jeedeen en Recht op en Bankkonto hett. Un dorto bruukt jeedeen ok den Togang. Un jüst düssen Togang maakt de Bänkers mit ehren lütten Bregen un de Politikers as Afnehmer un Biplichter vun dat, wat de Lobby will, twei, eenfach twei!


Ut de massiven Breder, de de Bänkers vör'n Kopp hebbt, kunnst gode Bänke maken!

Un nu kaamt wi, de ölleren Lüüd! Wi schüllt nu al wedder uns Bregen afmarachen för dat, wat de Bänkers sik mit ehren lütten Bregen utklamüüstert hebbt! Wi schüllt wedder ne'e Saken, Tallen un PINs butenkopps lehren, ne'e Saken anschaffen, blot wiel de dat so an'n besten in Kraam passen deit. Wiel de nich rechtiedig gegenstüert un nadacht hebbt?

Nu warrt dat hööchste Tiet! Wi Ölleren, wi bruukt en Bankinstitut för uns Olen. En Bank, de uns versteiht. En Bank, de ok uns mit eenfachen Middeln to uns Recht op en Konto verhölpen kann un nich all en poor Johren wedder allens övern Hupen smieten deit.
Wo is de Lobby för uns Öllere?


11.3.2022


na baven