vun Katja Renfert Se köönt de Fotos per
Klick vergröttern. Trüch kaamt Se denn mit den Zurück-Knoop
op de Browser-Symboolliest.
Friedag dacht ik, wat maak ik denn Pingsten?
Nadem ik Sünnavend Middag mien lecker Grööntüüch-Pott mit Mairübchen, Tomate un Zippel, wat ik op'n Wochenmarkt inköfft harr, mit een Tofu-Würstchen un natüürlich frische Petersill opeeten harr, bün ik glieks mit 'n Bus un de U-Bahn na de Landungsbrücken fohrt. Dor weern al 'n Barg Lüüd, un an de Landungsbrück
7 wull ik glieks rop op dat Schipp. Töven is nu nich so mien Ding, aver ik weer froh, dat ik för
den nächsten Törn mit dorbi weer. Un in'ne Twischentied
heff ik de Lüüd vertellt, dat ik al Fridag de Petition
online ünnerschreven heff gegen dat Ölbohren in dat
Wattenmeer in'ne Nordsee. Blangenbi beten Reklaam för de gode
Saak maken, dat is mien Ding! Un denn gung dat los. Toerst sünd wi rechte Siet en Trepp hochklattert, un de junge Fru vun Greenpeace hett uns de Netten wiest. De meisten vun de Netten sünd nich mehr ut Hanf, sünnern ut Plastik un ward Geisternetten nöömt. Dat hett sienen Grund: Hanf verrott nämlich noch, düsse Netten aver nich. Allens över düsse Netten is op de Website von Greenpeace to lesen.
An Bord vun de "Arctic Sunrise" sünd natüürlich uk en poor Slauchbööt, de ward mit en Kran to Water laten.
Op'n Weg na de annere Siet sehg ik den hoogen Utsichtsturm, wo een vun de Besatzung hochklattern mutt, üm to'n Bispeel in de Arktis to kieken, wo in dat veele Ies en Weg is, dörchtokamen. Op düsset Foto sünd uk poor vun de velen Gerätschaften to sehn. De "Arctic Sunrise" is ja nich bloots en Iesbreker, üm dat Ies to breken, se is ok to'n Erkunden vun de arktische Ümwelt dor. In dat Föhrerhuus hett uns Kim, en jungen Mann ut Südkorea, de ganzen Apperaaten wiest un verklaart. De Böker un annere Saken in den Ruum sünd all fastmakt, denn wenn dat Schipp op See is, fallt sünst allens dörchenanner.
Ut de Finster kunnen wi uk de veelen Lüüd buten an de Landungsbrücken sehn. Dor töven uk al wedder welk op den nächsten Besichtigens-Törn.
De Arctic Sunrise ward siet 1995 vun de NonProfit-Organisation Greenpeace nütt; de Heimaathaven is, as op'n Rettungsring to sehn, Amsterdam.
In den ganzen Frachtruum is 'n Barg to kieken, un ik heff mi wunnert, wokeen sik dat utdacht hett, dat Schipp so to buen.
Buten weer en Döör: To be closed at sea. De Döör harr uk gode Dichtung un en Barg Griffe. Dor warrt di klor, dat dat op See jümmer heel eernst is! Op düsset Foto is noch eenmal de Utsichtsturm to sehn. As ik wedder vun dat Schipp gung, heff ik dat Glieke seggt as düsset Schild in den Frachtruum! Greenpeace hett uk 'n multimediale Duurutstellung in de Hafencity, Hongkongstraße 10. Natüürlich köönt Se bi'n Kulturlotsen wat doröver lesen. Ankieken lohnt bestimmt! Jüst as düsse Besöök op den Iesbreker. |