L'amour toujours: 'n Lied hett Pech

vun Behrend Böckmann

As dei Tekstschriewer, Komponist un Disko-Muskant Gigi D'Agostino (Johrgang 1967) inne 80er Johren mit sien Lied "L'Amour toujors" bekannt ward, wüsst hei noch nich, wat mit sien analoget Leiweslied inne digitale Welt von 2024 passiert. Dat Lied woor annerletzt mehr berüchtigt as berühmt, wieldat utrekent up dei Partyinsel Sylt utrekent junge Minschen ut dei Gewinner-Schicht von uns Sellschaft utrekent "Butenlänners rut, Düütschland bloots för Düütsche" dortau gröölt hemm.

Smieten wi ein Blick taurüch op dei Geschicht von Party-Exzesse.

Ihrer as dat dei Disco in Mod keem, vör mihr as hunnert Johr, güng man up 'n Ball orrer taun Dörpdanz. Doch denn keem dei Dach, an weckern man nich mihr Wiener Walzer orrer Polka un Galopp danzen wull, un inne Güllen Twinniger keem dei "Charleston" up, 'n Danz ut Amerika, dei 1923 in 'n Broadway Show vörmåkt un bald inn alle Welt nåmåkt wür. 1925 kümmt Josephine Baker (1906-1975) as dunkelhütig Dänzerin mit dissen niegen Danz in ehr weltbekanntet Bananenkleid nå Berlin un furtsens keem dei niege Danz in Mod. Man künn von nu an näbeneinanner un sogor allein danzen, Frugens hemm' sik dei för dei Flappermod typischen Charlestonkleider taulecht un düchtig dei Charlestonfiguren as "Scheibenwischerfuß", "Knieknicker" un "Schleuderbeine" up't Parkett lecht.

Denn keem dei brune Tiet un man wull dat Volk bi dei Stang hollen. Dat süll un künn ok mit Lieder as "Es geht alles vorüber" orrer "Lili Marleen", anfangs sungen von Lale Andersen (1905-1972), passieren. As denn rutkeem, dat Lale Andersen 'n Breifverkihr mit jüd'sche Emigranten inne Schwiez ünnerhöll, dunn wier't mit denn Gesang vörbi. Un männigein, dei nich "Es geht alles vorüber / Es geht alles vorbei / Auf jeden Dezember / Folgt wieder ein Mai...", sonnern "Auf Abschnitt Dezember / Gibt's wieder ein Ei..." süng, dei künn sik ok 'n Zigarr anstäken, wenn dei Blockwart tau grote Uhren harr. Œwer dei Soldaten künnen ja mit Hengåf "Erika" orrer "Es zittern die morschen Knochen" singen…

As disse Spuk ut wier un dat Volk wedder Lust taun Danzen kreech un 'n Drei-Mann-Kapell upspälen däd, hett dei Gesellschaft nich selten so af Klock elben 'n Marschwalzer bestellt. Un dei füng denn mit "In einem Polenstädtchen..." an, ihrer sik all taun "Schneiwalzer" dreihten. Un wat wür grölt? Nich "Ich hab einmal geküßt / Und schwer gebüßt", sonnern "Ich hab's einmal probiert un bin krepiert". Œwer disse analoge Gesang leet sik noch nich digital verkünnen, un so künnen dei Frünn von Paul Horch ('n Œkelnåm för dei Stasi) tau dei Tiet gägen dei Sänger kein Fatt upmåken. Mit 'n analogen Apparat för 6x6 un 6x9 Rollfilme künn man twors wat aflichten, œwer nich as hüt mit dei digitale Technik 'n Beläwnis in Bild un Ton upnähmen un gliek œwer't Internet utposaunen. So passiert up Sylt, wo up 'n Pingstparty por junge Lüd vör dei Promi-Bar "Pony" in Kampen wull bäten mihr drunken harrn, as sei afkünnen, un sik in enthemmten Taustand dat vonne Seel sungen hemm', wat sei villicht gor nich wirklich denken — denn dei Reiz tau provoziern, Grenzen tau verletzen, is ja bekannt —, œwer väle Börgers denken wirklich so, un dor ward dat gefährlich. Poletikers as Bundspräsident Steinmeier, Vizekanzler Habeck un CDU-Baas Merz hollen dit Gegröle denn ok glieks för Naziparolen, för rechten Populismus, un furtsens is dei olle Party-Klassiker "L' amour toujours" 'n Nazilied. Dormit trecken sei immer dickere un engere "rode Linien" — för besåpene Jungspunde un Teenies ein unwiderstehliche Mautproov, dei tau œvertreden. Ik bün meist vermauden, dat is mit den Antisemitismus ganz ähnlich.

Dei liberale Demokratie is dörch disse Poletikers dor ankåmen, wo sik jederein Luft måken kann un dat 'n, wenn man't tau dull måkt, mit dei Fastsstellung von sien Personalien un/orrer 'n Bewährungsstråf dorvon kümmt. Up'e Wiesn tau München sall "L'amour toujours" nich mihr spält warden, annerswo will man dat äbenso måken. Up Fehmarn, in Mäkelnborg un Vörpommern un noch anner Urten höllt man nich väl vonne Anschulligungen.

Un dat Lied "L'amour toujours" is ganz unverschüllt as dat "Horst-Wessel-Lied" von't 21. Johrhunnert afstempelt.