Häbentouristen

vun Behrend Böckmann

Üm uns schöne Welt tau redden,
süll dei Minsch oft sachter pedden,
doch hei deit sik sülfst beleigen,
wenn hei in dat All will fleigen,
üm por Runnen dor tau dreihn,
von Båben up uns Ierd tau seihn.

Vör twinnig Johr wier't all so wiet,
dat mit twei Russen anne Sied
flööch Tito* up dei ISS
in den schöönsten Weltrumdress;
por Milljonen hett hei gäben,
üm por Dåch in't All tau läben.

Geldverswennen, Ümweltsünn?
Du büst bloots niedsch, flöögst sülvst geern hin!

Dornå keem't Branson** in denn Sinn:
Kiek in't Wulkenriek mål in.
Dor Bezos*** hett noch väl mihr Geld
un hei flücht ok üm unse Welt,
un so hemm' sei för düre Stunnen
in't Binnelste ehrn Fräden funnen.

Dei Fohrt in Häben is noch nie.
Is't Krüzfohrtöller nu vörbi?
Blifft dat Schäp för 'n lütten Mann,
dei 'n Kapsel nich betåhlen kann,
för all dei välen Kunnen,
dei't Geld nich up'e Stråt hemm' funnen?

Mit Hinz un Kunz op so en Kahn?!
'keen riek is, denkt dor gor nich an!

Nu sall't drei Dåch nå båben gåhn
noch achter dei IS ehr Båhn —
un Mister Musk**** von SpaceX weit,
wohen dei Reis mit Dragon geiht
un hett 'n Milljonär***** ok funnen,
dei betåhlt dei välen Runnen.

Dörch't Dragonfinster kieken hüt
twei Manns- un ok twei Frugenslüd;
as würn's von'n Fichtelbarch ut seihn,
wat up Rügen is gescheihn,
denn son'n Enn' is't allemål
von båben tau uns Ierd hendål.

Dålkieken doot s' op jedereen,
in't All is't avers duppelt schöön!

Dei Milljonär is Kommandant,
ein Fru hett't Stüer inne Hand,
un dei Geldgäber befünn,
dat einer, dei dörch't Los gewünn,
ward Injenör in siene Kru,
un dei Viert is eine Fru.

Dei ierst Fru måkt dei Minschheit klor:
mit düster Huut un kruset Hoor
måkt sei ehr Arbeid ok so gaud
as jeder anner Astronaut,
dat's in nicks denn Kierl nåsteiht,
wenn't üm minschlich Klaukheit geiht.

As tweit Frau wür 'n Schwester nåhmen,
üm so an't nödig Geld tau kåmen
för kranke Kinner, dei in Not,
in denn Wettlop mit denn Dod.
Sei måkt dat ut luder Dank,
sei sülben wier all dodenkrank.

Dei Mannslüd, sei befåten sik
mit dat wiede Häbenriek,
mit dat All un Ümlopbåhnen,
üm up Månd un Mars tau kåmen,
doch ihrer dat is denn so wiet
hemm' dei vier noch bäten Tiet.

Man den Rieken danken deit,
wenn dat nu nå ünnen geiht;
man jubeliert "Hurra, hurra,
wi sünd œwer Florida!"
As Laurentiustrånen gliek
wådern sei in't natte Riek!

Dei Ierd is hin, dat is bekannt.
'keen riek is, köfft sik nieges Land!

* Dennis Tito (Jahrgang 1940), US-Unternehmer, flog 2001 für ein Woche zur ISS und ließ sich das 20 Millionen Dollar kosten;
** Richard Branson (Jahrgang 1950), engl. Unternehmer in der Musik-, Luftfahrt- und Eisenbahnindustrie, flog 2021 mit seiner Virgin Galactic in den Weltraum; sein Vermögen wird auf 4 Milliarden Dollar geschätzt;
*** "Jeff" Bezos (Jahrgang 1964), amerikanischer Unternehmer und Investor, Gründer des Onlinehandels Amazon, mit einem Vermögen von über 200 Milliarden Dollar der reichste Mensch der Welt;
**** Elon Musk (Jahrgang 1971), als Unternehmer mit südafrikanischen, amerikanischen und kanadischem Pass gehören ihm und seinem Bruder z.B. PayPal, SpaceX, Tesla Motors u.a., sein Vermögen beläuft sich auf 195,5 Milliarden Dollar;
***** Jared Isaacman (Jahrgang 1983), amerikanischer Geschäftsmann, Pilot und Hobbyastronaut, sein Vermögen beläuft sich schon auf 2,4 Milliarden Dollar