Winterlinge
Eranthis
vun Antje Heßler
Se köönt de Fotos per
Klick vergröttern! Trüch kaamt Se denn mit den Zurück-Knoop
op de Browser-Symboolliest.
Se sünd wedder door, de lütten Winterlinge! Luder lütte
gele Sünnen kiekt dörch den witten Snee. Ok wenn de Bodden
noch hart froren is. Mi warrt vör Freud ümmer ganz warm
üm't Hart. De Winterlinge bringt de eerst Farv in mien Goorn.
Nu duurt dat nich mehr lang, bit dat Fröhjohr door is.
Allens vullzählig antreden!
|
An'n Enn vun den Januarmaand hebbt sik de lütten Winterlinge
al künnig maakt un enen Weg dörch de Eer na baven funnen.
Toeerrst kannst blots enen lütten hellgrönen Bagen wies
warrn. En beten later warrt he gröter un gröter. Denn kümmt
en'n gröön Bläderkranz to'n Vörschien. De wiest
aver mit den Kopp na ünnen. Bi den ersten warmen Sünnenschien
kiekt he aver mit sien gelen Kopp na baven.
Un he is nich alleen! Vele Winterlinge kiekt to glieke Tiet ut de
Eer. Ünner de Büüsch is en richtig gelen Teppich. Se
hebbt all en gröne Halskruus üm den smucken Kopp. Dat is
richtig goot antosehn. Bi goot Weder kannst menen, dat is en Blomenchor
de altohoop singt: "Kumm doch, leev Fröhjohr, wi töövt
up di!"
Winterlingparade in'n Snee
Knubben vun'n Winterling
|
Aver af un an kümmt de Winter mit Snee un sien kole Luft. Denn
maakt se ehr Blöden gau to un leggt de gröne Halskruus eng
an ehr'n Stengel. Kannst richtig sehn, dat se freert. Se sünd
aver taag un köönt de Küll verdrägen. Bi den neegsten
Sünnenschien strahlt se wedder üm de Wett.
Na de Blööhtiet warrt de gröne Kragen gröter
un ut de Samen wasst lütte Planten na. De Winterlinge deckt de
Eer nu mit enen grönen Teppich to. In'n Fröhsommer verdröögt
de Planten. Vun de Winterlinge is nix mehr to sehn. Eerst in't neegst
Fröhjohr smückt se wedder de Goorns mit ehr smucken gelen
Blöden.
De ganze Pracht
Blattwark vun'n Winterling
|
De Winterling (Eranthis) is en Knollenplant un bildt in de Eer niege
lütte Knollen. Ok ut de Samen wasst lütte Winterlinge. De
Plant is ut Südeuropa to uns kamen un is al siet vele Johr'n
bi uns to Huus. Se warrt besünners geern in Parks anplant.
Neven den wilden Krokus (Elfenkrokus) bringt se oftins al an't Enn
vun den Januarmaand un Februar de eerst Farv in de Anlagen un uns
Goorns.
Wohraftig, dat gifft al Kundschaft!
|
De Winterling is en Hahnenfußgewächs. He is en robuste
un tage gröne Plant. In't Fröhjohr levert se as eerst Bloom
Nektar un Pollen för de Immen un Hummeln.
För de Minschen is de Winterling sehr giftig. Alle Plantendele
vun de Plant hebbt Giftstoffe. Ganz besünners giftig is de Knoll,
de ünner de Eer sitt. Hett man en Plant anfaat, sull man sik
achterna de Hannen waschen!
Wenn dat Bestöven klappt, hett sik dat
fröhe Blöhn ja lohnt!
27.2.2011
|