Pelz-Imm an Lupine

Dat Wildimmen-Hotel

Se köönt all Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

Anfang Mai hebbt wi so'n Kassen kregen — en Insektenhotel. Wüsst hebbt wi eentlich meist gor nix. Immen kennt ja jedereen, nämlich de Honnig-Immen; se sünd en weertvull Nutzdeert, angeevlich dat drüttwichtigste na Rind un Swien, un in Wohrheit villicht noch wichtiger. Aver wo is dat mit ehr willen Verwandten bestellt? De gifft dat ja ok. In ganz Düütschland angeevlich in mehr as dusend Aarten — dorvun leevt in Neddersassen üm un bi 380. Nipp un nau kannst dat nich seggen. So heff ik dat in en Vördrag höört.

Dat gifft dor Jager-Immen, Bestöver-Immen un sogor welk, de dat liek as de Kukuuk maakt un ehr Brood anner ünnerschuuvt. Avers dat is Theorie. Ik warr hier mal versöken optoschrieven, wat wi sülven mit uns Hotel beleevt un entdeckt hebbt.

In dat Bild linkerhand hebbt wi den Kassen tosamenbuut un schruuvt nu bloots noch dat Gestell an. Dat Gestell heff ik sülven trechtmaakt, dat höör nich dorto.

Hier seht ji dat Ganze opbuut in'n Goorn. De Kasssen is rechtkantig mit 9 Afdelen, dorvun sünd 3 vun Lehm, 3 vun Binsen, holle Stöcker, un 3 sünd vun Holt mit ünnerscheedlich Bohrungen. En groot Dack hett he natüürlich ok — uns Gäst schallt ja nich in'n Regen stahn! — un dat sülven buute Gestell. So'n Hotel brukt en sünnigen Platz. In'n Achtergrund blöht de Hollerbusch, dat is ok nich slecht.

Dat güng mehr orr minner ruckzuck, un de eersten Bewahners kemen al an. Ümto blöh de Hollerbusch, de Schaapsgarve un de Brombeer, later ok de Klee; wi weern vun Höpen, dat wi dor noog potentielle Mieter finnen kunnen

Aver wat se ok all bi uns intrecken wöörn...?

Neegbi woor ik en olen möören Boomstamm wies, de harr ok al Löcker; wohrschienlich sluppen dor binn al de jungen Wildimmen!

Hett he nich richtig Charakter, meist en Gesicht? Ik glööv, he lacht.

In de nafolgen Biller seht ji, wo ik de Kamera vör den Kassen opbuut heff, allens to dokumenteern un gode Snappschööt to scheten. De Insekten stören sik nich an de Kamera. In'n Achtergrund sünd uns Immenkörv för de Honnigimmen. Dor hebbt wi annerletzt söss Kilo Honnig vun aarnt.

Un hier is ok al de eerste Interessentin an en Lock to kennen. Dat is, so vermoodt wi, en Sandwöps. Goot to kennen is op dat Foto, dat se en lütten Brocken Lehm mang de Bieters höllt. Dormit maakt se wohrscheinlich de Bruthöhle dicht, se sett also den Lehm as Deckel op. Ja: Knapp is uns Hotel eröffnet, fangt de Gäst an, dat ümtobuun!

Dat Ümbuun güng munter wieder, as mehr Gäst kemen. In de nafolgen twee Biller kannst en ganzen Koppel Löcker kennen, de al nipp todeckelt sünd. De Wildimmenaart op de Fotos kennt wi nich nau, aver se kladddert jümmers rückwärts in't Lock, also mit'n Moors toeerst. Denn leggt se sachs ehr Eier dor rin!

In de veer Biller, de nu kaamt, seht ji Wöpsen, wohrschienlich Wegwöpsen. Se sünd de Aart, de an uns Insektenhotel an'n mehrsten to sehn weer. Ok de Schadden vun de slanken Wöpsen seht schön ut.

In düt Bild rechts kannst richtig sehn, wo so en Wegwöps vorwärts wedder ut dat Lock kümmmt, nadem dat se in'n Trüchwartsgang rinkrapen weer. Dor binnen, seker verstaut in dat warme, dröge Holt, sünd nu ehr Eier. — Hoochintressant is, dat de Wegwöpsen ehrn Nawuss mit Spinnen fodert. De Wegwöpsen, de ehr Eier in Nester leggt, packt dor denn noch en Spinn as Proviant för ehr Lütten rin. Dat heff ik noch nich beobachten kunnt!

Noch so en Schöönheit!

Op de twee Bilder baven seht Se, wo en Goldwöps de Löcker besichtigt. Se schillert in Smaragdgröön bit hen na Pink un Violett. Ehr sühst al vun Wieden, wenn se in de "Hotel-Lobby" ankümmt!

Rechterhand is en Graavwöps mit ehr spektakuläre Rückenteknen to sehn. Se kleistert jüst en Lock to.

Op de Schaapsgarv blangenan versorgt sik en ole Bekannte, de slichte Sweevfleeg (Foto nerrn). Ok se kann schöön utsehn!

To de Wildimmen- un Wöpsenaarten kemen noch anner Insektengäst, etwa düsse lütte Mottenaart, de wi för en Wachsmotte hollen doot. Mit ehrn smuck tekenten Achterliev sweevt se över ehrn Schadden.

Tja, sietdat wi dat Hotel hebbt, is hier noch mehr los as fröher! Wenn Se sik ok so een toleggen wüllt, sorgt Se för en sünnigen, good schuulten Standoort un sett dat dor eenfach hen. De Natuur helpt sik sülvst. To'n Wunnerwarken is, dat de lierlütten Deerten dat allens in ehr Gene hebbt — se brukt nich nadenken, nich een Momang, un köönt dat ja ok gor nich. Un se hollt mit ehr Bestöven den ganzen Natuur-Laden hier ingang!