Un so warrt dat mookt!

Wienproov

vun Antje Heßler


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

"Wat hest du denn dor för en Buddel up den Disch stellt? Enen roden Wien?" Mien Mann keek mi mit grote Ogen an.

"Tscha, un dat is Wien ut Sleswig-Holsteen. Hüüt is Wienproov bi uns!", verkünn ik. "Mal kieken, up uns de Wien ut Slewig-Holsteen smeckt! Hoffentlich is dat keen Muultrecker."

"Wo hest du denn blots upstövert?", fraag mien Mann.


Dat Plakat

"Du müsst even dien Ogen ümmer överall hebben", grien ik em an. "As ik vunmoorn bi Famila inköfft heff, full mi in de Eck bi de Wienbuddels en Werbeplakat up! Neuer Jahrgang! Wein aus Schleswig-Holstein. Wieder stünn dor noch in Plattdüütsch "So mookt wi dat, Wien för Binnen un Buten oder för enen Klönsnack". Dor müss ik doch en Buddel vun mit na Huus nehmen! Den mütt wi tohoop pröven!, dach ik furts. Heff aver kenen witten Wien mehr kregen, de weer al utverköfft. Aver de Rode steiht nu bi uns up den Disch! Nu haal du man den Proppentrecker un twee Glöös. Mal sehn, ob de Wien ut Slewig-Holsteen uns smeckt!"

 

 

Den Proppentrecker bruken wi gor nich. De Buddel harr al so'n niemodschen Schruuvdeckel. Mien Mann bekeek sik de Buddel. Up den Upklever stünn: "So mookt wi dat!" De Wien weer vun den Grebiner Möhlenbarg. 2011 weer de Wienlese, un nu 2012 keem he in den Verkoop. Dor de Wienoorn nich gor so rieklich utfull'n weer, wöörn de Buddeln limiteert, dat heet, se wöörn mit en Nummer versehn. Up mien Buddel stünn de Tall 177, Johrgang 2011. Wi hebbt bannig Glück hatt, dat wi noch en Buddel afkregen hebbt.

"Nu dreih endlich den Schruuvdeckel af!", reep ik mien Mann to. Vörsichtig dreih he de Buddel up un snüffel an den Wien. Sacht schenk he den eersten Sluck vun den roden Wien in un swenk em in't Glas. Wedder snüffel he an den Wien un verdreih de Ogen dorto.


De Wienbargen vun Grebin, da wasst de gode Drüppen

Intwischen weer de Sünn mank de Wulken to'n Vörschien kamen un leet den Wien in't Glas düsterrod uplüchen. Endlich keem: "Na, denn Prost!" Na den eersten Sluck reep ik: "Oh, de smeckt ja, denn kann man ja drinken. Dat is keen Muultrecker!" Mien Mann leet em noch up de Tung vergahn un nickköpp!


De Grebiner Möhl up den Möhlenbarg


Twee Rebstöck vun'n "Roden Regent"

Nadem wi den Wien pröövt harrn, wullen wi weten, 'nehm de Wien in uns Land anbuut warrt. Höört harrn wi al vör eenige Johr'n dorvun. 2009 kregen de Sleswig-Holsteener dat Plantrecht för teihn Hektar Wien vun Rheinland-Pfalz. De Intressenten müssen Boden- un Klimagootachten för de Eegnung vun ehr Land upstellen. In de Hauptsaak kregen de Ingenhof in Malkwitz un de Hof Altmühlen bi Grebin den Toslag. Över 5000 Rebstöck vun den "roden Regent" wöörn up den Grebiner Barg anplant. Dorto müss dat Land ümbraken warrn. Een vun de Arbeider meen to en einheimschen Tokieker: "So mookt wi dat!" Schon weer de Naam för den Wien boorn. Siet 2011 warrt de Wien verköfft. Dormit is Sleswig-Holsteen dat nöördlichste Wienanburebeet in Düütschland.


De Rode wasst


De Rode is riep

De Grebiner Möhl mit dat Schild "Wagria Anno 1851" kennt wi al lang. Se liggt up den 54 m hogen Möhlenbarg in Grebin. Dat is en herrlichen Utsichtspunkt in de holsteensche Schweiz, in de bucklige Welt! Wohld un Seen wesselt sik af. Un dor baben gifft dat ok en Möhlencafé. An de Döör steiht en lütt Schild mit de plattdüütsche Upschrift: "Kum rin, snack di ut, go rut, un hol din Snut." To geern kehrt wi dor in. In dat Café backt se wunnerboren Koken. Wenn de Sünn schient, gifft dat Kaffee un Koken buten in'n Goorn.


De Witte süht ok nich slecht ut


Hoffcafé in Grebin

Wi weern lang nich dor. Aver na unsen Wieninkoop güng dat glieks na de Grebiner Möhl. Wat hebbt wi uns wunnert! Up den Möhlenbarg, en grote Koppel, grasen fröher de Peer. Nu stünnen dor dicht an dicht Wienreben. Bi den Blick över den Wienbarg dachen wi an de Pfalz, dat weer doch nich in Slewig-Holsteen! Sehg ok goot ut. Aver wi kennen den Wien in uns Heimat blots as Spaleer an de Huuswand.

Hoff Altmühlen

Uns Fohrt güng denn noch na Hof Altmühlen. Ok dor weern noch Feller mit Wienanbu to sehn. An Ingang stünn en Wienfatt. En Buddel mit en Upklever "So mook wi dat" stünn babenup. Wi seggt tohuus ümmer: So mookt wi dat, wi drinkt den Wien!

Wat uns besünners freut hett, dat uns överall de plattdüütsche Spraak begegent is. De neegst Wienproov maakt wi ganz seker up den Ingenhof.


To'n Anhören hier klicken:

Lesen deit Antje Heßler in holsteiner Platt.

7.10.2012


na baven