So weer dat Wedder in Dezembermoond

Dat Wedderdaagbook vun Uwe Mohr.
All Biller: Uwe Mohr

Winter-, Christ-, over ok Jul- un Heelmoond weern ohle Noom för Dezember. An 1. to'n meteorologischen Winteranfang geiht dat mit Duerfrost los. Dorto jümmers en gräsigen Oostenwind.

Iesmikado: Moderne Kunst vun Vadder Frost

Matthias Claudius hett sik ok Gedanken över de Winter mookt. In'n eersten Vers in sien Gedicht över de Winter heet dat: "De Winter is en rechte Mann, kernfast un op Duer. Sien Flesch föhlt sik as Iesen an, he schucht nich sööt noch suer. Wenn Steen un Been von Frost tweibreken, un Diek un Seen dröhnen — dat mag he hören, dat vertöörnt em nich, denn will he doot sik lachen!" (Platt: Uwe Mohr.)

Ok de Kinner freut sik över dat Wedder. Gern' wörrn se sik in Snee vergnögen. Wat nich is, kann noch warn. Vull Spannung geiht dat nu dörch de Advents- un Vörwiehnachtstied. In de Köök rüükt dat no Plettenbacken un anner smackhafte Wiehnachtskoken. Dannbööm stoht verenzelt al in geschützte Huusecken, proot to'n Smücken för Wiehnachtenovend.

Uns Heiland is boren

Noch hebbt wi kohles Winterwedder. Dat verdankt wi Hoch "Robin". Von Oosten her sorgt he för iesige Luft. Bloots, em geiht över Russland de Puust ut. Dat ward wedder wärmer. Stimmt: no veer Doog Duerfrost, hüüt, an Barbaradag, plus 1,4°C. Nix mit Snee, Regen is fullen! Un an Nikolausdag? Sledenfohrn güng nich bi plus 7°C. Wat doon? Nikolaus keem enfach mit Wogen un Sünnbrill! Mit Achterbohn-Temperaturen, grau un natt, sorgt Deep "Zoe" dorför, dat wi hüüt Nomeddag en gemütliche Adventsstünn in uns Stuuv moken künnt.

Sölvst buut — Wenn se in de Stuuv steiht, ward Wiehnachten

An teihnten will Orkandeep "Alexandra" de letzten Bläder von de Twiegen pusten. Eerst an de Nordseeküst, dorno in't Binnenland. Is hier over nich so dull worn, dorüm will Deep "Billie" wiesen, wat he in de Backen hett. To Instimmung schickt he an 11. Regentrude al mol mit Schuerwedder vörbi; mit Pusterich güng hier allens goot. Küll harr he noch in Weddersack. Von gestern plus 8°C, hüüt, an "Luzia", op plus 2,7°C rünner. "Kümmt de hillige Luzia, is flink de Küll ok al dor."

Liekers, Winterwedder is nich in Sicht. An 18. +10,4°C, dor kann Fruu Holle nich gegenan schüddeln. Dorför speelt sik Regentrude mächtig op. Anfang drütte Dekode nachts Gewidder, ok an Morgen noch Gerummel mit ersten Sneefall düssen Winter un veel Regen. Worüm? — Üm Wiehnachten dreiht de Wind meistens Richtung W un bringt warmes, naddes, windiges Wedder. Uns Wiehnachtswedder!

Utsoog in mien Warksteed

Deep "Freia" reist von Norwegen an. Hett Duerregen un Wind — Schietwedder! — in de Bagoosch. Petrus: "Dat is nu noog!" He hett verstohn. Wiehnachtsovend Snee un sogor Sünnschien. So ok an 1. Wiehnachtsdag. Allerdings ovends Sneeregen, de poor wittpuderte Placken op Land bröcht hett. 2. Wiehnachtsdag dröög, dorför mit Duerfrost. So geiht dat wieder twischen de Johr'n.

Afsünnerlich sünd de Doog twischen 25.12. un 6. 1. De Ruuchnächte. Üm düsse Tied ranken sik vele Legenden. Fruu Holle is Schutzpatronin för düsse Spökeldoog. De Tiet twischen 21.12. un 6.1. is ok günstig to'n Holtoorn. De Säfte sind opstegen un dat soogte Holt arbeitet weniger.

Wintertied — Holtoorntied

Hüüt is de letzte Sünndag in't ohle Johr. Kohlt, over schön. Dat freut de Kinner. Se luern op mehr! Vergewens. Ut graue Wolken fallt Regen. Natt, ohn' Sünnschien over mit Fröhjohrstemperaturen is 2014 anfungen. Mit düstere Wolken, oh'n Sünnschien, mit Nieselregen, Wind ut W un +7°C geiht dat Johr to Enn. Glocken lüden, Knaller blitzt un ballert.

"Prost Niejohr - Schiet an't ohle Johr!" Ganz fuhle Snacker bringt noch en "Frohes Neues" över de Tung.

De Christroos leevt de Küll

Wedderdoten letzte Moond (in Klammern de Doten vun'n Vörmoond):

• Dörchsnittstemperatur in 2 m Höchte 2°C (Vörmoond 6,5°), dat sünd 0,32°C över't Middel.
• De höchste Temperatur mit 10,9°C (19°) harrn wi an 10., de deepste mit -5,8°C (-2,1°) an 28.
• In'n Dörchsnitt harrn wi 20 cm in de Eer 4,8°C (9°) un 5 cm över de Eer de deepste Temperatur mit -6,7°C (-1,7°).
• De Sünn weer 21,4 Stünn (35) to sehn, sünd 60% von't Soll.
• De Solorstrohlung keem op 45W/m² (73). Se weer an hööchsten mit 294 W/m² (408) an 25.
• Regentrude weer ganz fliedig. An 24 Doog (17) sünd 174 l/m² (26,4) ut ehrn Rock fullen.
• Dörch Evapotranspiration sünd 5 l/m² (8,12) wedder verdunstet.
• De Wind hett an düllsten mit 73 km/h (8 Bft) ut W-SW pustet un keem mit 37% ut düsse Richt.
• De Moond harr 5 Iesdoog (T_max < 0°C), 11 Frostdoog (T_min < 0°C) un 28 Kole Doog (T_max < 10°C).

Kerzen ut Immenwachs

Mehr Wedder ünner hartenholmer-wetter.de.

Dotentorüchblick 2014

• Höchsttemperatur in 2m Höchte an 19. August +30,6°C (2013: 32,5°), de deepste Temperatur in 2m Höchte -13°C (-14,6°) an 26. Januar.
• De Dörchsnittstemperatur leeg mit +10,26°C (8,6°) +0,6° övert Middel.
• 20 cm in de Eer harrn wi in Dörchsnitt +11,2°C (9,8°) un 5 cm över de Eer +10,3°C (+8,7°).
• Nedderslag an 217 Doog hett 782 l/m² bröcht (750).
• De hööchste Nedderslag full mit 39,4 l/m² an 22. Dezember.
• 1712 Stünn (1674) weer uns Sünn to sehn, an längsten an 26. Mai mit 14 Stünn (13 an 11.August).
• De Wind keem mit 19% ut WSW un harr an 22. Dezember de höchste Böe mit 73 km/h (8 Bft).
• Iesdoog harr dat Johr 17 (T_max < 0°C) (26), Frostdoog 50 (T_min < 0°C) (96).
• Kohle Doog 111 (T_max < 10°C) (152), Sommerdoog 27 (T_max >= 25°C) (23), Hitte Doog 1 (T_max >= 30°C) (3), Sehr kohle Doog 2 (T_min <= -10°C) (4), Warme Doog 127 (T_max >= 18°C) (112).
• Letzte Frost in't Johr: 03.05.14 mit -2,2°C Klock 6:00.
• Eerste Frost in't Johr: 30.10.14 mit -0,2°C Klock 7:35.
  

Wat is de Heven so rot, dat sünd de Engel, de backt dat Brot. Un dat Johr seggt Adjüs!