So weer dat Wedder in Oktobermoond

Dat Wedderdaagbook vun Uwe Mohr

Brrrrr, kohle 3,6° an Morgen. So treckt de Goldene Oktober in't Land. Over nu, an Dag, süht dat al wedder anners ut. Hoch "Karin" bringt Sünnenschien, over ok kohlen Wind ut SO. Wer de Tied hett, eenfach de Sünn geneten, denn en düstere Johrstied steiht uns bevör. Ok wenn se noch warme Strohlen schickt, op hohe Temperaturen köönt wi nich mehr hopen. Bit to'n Dag von de Düütsche Eenheit hebbt wi nu al meist dörtig Stünn Sünnenschien von blauen Heven hatt. Liekers is dat Thermometer bloots bit 13° kladdert. Deep Werner is op Tour. He schüfft düstere Regenwolken för de Sünn. Mookt nix, denn: "Oktoberregen versprickt en Johr vull Segen."

To'n Trost, Hoch "Liana" will uns besöken. Villicht kümmt de Sünn nu wedder dörch. Hüüt, an föfften, ganz liesen Wind mol wedder ut W-NW. Batz hebbt wi snuckelige 15,4°. Dat högt uns, Astern, Anemonen, Dahlien un noch vele anner smucke Planten.

Nu is ok de Tied, wo de Oktober sik mit Farvputt un Pinsel op Tour mookt. As vergnögte Wandersmann pinselt he Bööm, Strücker un Büscher an. To Oorndankfest güng dat an Morgen mit Nevel in de Dag, dann keem over de Sünn. Sogor mien Immen hebbt flogen. Dank Hoch "Karin" un Oldwieversommer weern de eersten teihn Doog von Moond meist sünnig. Feines Wedder, üm in Goorn to werkeln, un för de Buern to'n Maishäckseln. Ok de eersten Bläder mööt tosomenharkt warn. Noch sünd over de meisten an Büscher un Bööm. Goot so, denn: "Wenn dat Blatt an de Twiegen blifft, is de Winter noch recht wiet."

Nu, kort för'n twintigsten, sühst wiet un breet Oktobergold. Smuck antosehn de Landschop. Wiel de Doog nu al recht körter sünd — siet Sommeranfang goot söven Stünn — hörst ok keen Vogel mehr quinkeleren. "Mit St. Hedwig un St. Gall (16.) is dat schöne Wedder all."

Smuck in Korf, smackhaft in de Pann: de Oktobermoond bringt Pilzpracht. Bild Uwe Mohr

Richtig, nix mehr mit Warms un Sünnenschien. Dree Doog hebbt wi nu al Regen, rugen Pusterich un swatte Wolken. So geiht dat, dorför over mit mollige 17°, wieder in de drütte Dekade. Düt Wedder bringt Pilze in Wold to'n Wassen, un masse Lüüd, de Poggenstöhl söken wüllt. Mit Korf un lütt Messer in de Hand loopt se twischen de Bööm un hebbt de Ogen bloots an'n Wooldborrn.

Dat letzte Oktoberdrüttel wiest sik dank Hoch "Nastassja" recht mild. Twüschen 15° un 19° legen de Temperaturen. Nu, to'n Enn von Moond, is dat vörbi mit Gollenoktober. Stormdeep Christian will uns wiesen, dat he ok Harvststorm in sien Windbüddel hett. Mit schworen Storm ut sien dicke Backen hett he veer Stünn Strom afstellt, Däcker afdeckt un veele Bööm op de Sied leggt. Sien Orkanpusten hole mit Sirenenhulen de Füerwehr. Mit Tatütata sust se an 28. to'n Grootinsatz. Mien Renate un ik hebbt de Tied ohn' Strom mit Lesen tobröcht. De Petroleumlamp mit Glöhstümp hett uns helles Licht spendert. Dat weer ganz kommodig. Chrischan plegt nu sien Muskelkoter in de Backen. An Larm von de Kedensogen hörst, wat för'n Schoden he mookt hett. Nu is dat düster, de Reformationsdag is üm, Halloweenkinner stoht vör de Döör. Oktober adjüüs, morgen geiht dat Johr hoffentlich mit wenig November-Grusel-Wedder wieder.

Wedderdoten letzte Moond:

• Dörchsnittstemperatur in 2m Hööchte 10,7°C, dat sünd 1,5°C övert Middel.
• Höchsttemperatur an 22. mit 19,2°C un de deepste an 19. mit 0,3°C.
• 20 cm in de Eer harrn wi in Dörchsnitt 11,3°C, un 5 cm över de Eer de deepste an 19. mit -1,1°C.
• Sünnschien 117 Stünn, dat sünd 112,8%.
• Solorstrohlung in Dörchsnitt 154 W/m². Hoch weern an 31. ümmerhin 626 W/m².
• Regent hett dat an 20 Doog 58,4 l/m² , dat sünd 84,3%. Aftrocken sünd dörch Evapotranspiration 22,5 l/m².
• De Pusterich hett am meisten mit 34% ut WSW pustet, an stärksten mit 92,6 km/h (10 Beaufort) ut de sölve Richtung.
• De Mond harr 2 Warme Doog (T_max >= 18°C).

Mehr Wedder? Hier: hartenholmer-wetter.de.