So weer dat Wedder in Septembermoond Dat Wedderdaagbook vun Uwe Mohr Goldene Welt In September is allens ut Gold: Na Georg Britting, Plattdüütsch Uwe Mohr "So wi dat Wedder an Ägidius (1.) ward de ganze Harvst wull sien." Sünd jo nich so goode Utsichten, denn de eersten Septemberdoog weern wohrhaftig harvstlich. Dat schall uns over nich dorvon afbringen, op noch een Reeg von warme un sünnige Doog to hopen, denn de September is egentlich de schönste Harvstmoond. Nich ümsünst ward von "Mai in Harvst" sproken.
Nu sünd de letzten Kornfeller afdöscht, Kantüffeln ut de Eer, Appeln, Birn un Plumm plöckt. Muhltrecker (Schlehen), Nööt, Hogebutten, Eckeln, Fleder- un Brummelbeeren mookt dat von de Natur leverte Angebott an Früchten vullständig.
Wie de Harvst sien kann, hebbt wi in de eersten Doog erlevt. Kann nur beter warn, seggt de Metereologen, denn Hoch "Hamich" verjogt de Regenwonlken. So wünscht wi uns de Oltwieversommer. Schön to sehn in't Gras, bi uns in de Sandkuhl. De Noom hett jo nix mit ohle Frunslüüd todoon. Ne, dat sünd de Spinnfoden, de dörch de Luft sweven, un de kunstvullen Spinnennetze, in de Dau wi Perlen blinkern. Hüüt, an föfften, hebbt wi Niemoond un allerbestes Wedder: "Wi in September de Niemoond de Dag vörfind, so ward dat Wedder de ganze Harvst bestimmt."
Over, dat ward wohl nix, denn nu jogt Deep "Obama" uns schönen Hochsommer torüch in de Wööst. Mit Regen, de wi over ok nödig bruken, bloots 5,8°C an Morgen, geiht dat mit Harvstwedder wieder. Noch hebbt wi over Loodsommer. Af 20. bit Anfang Oktobermoond nehmt hoffentlich de Oltwiever dat Wedder in de Hänn. Hier un dor liggen al geele Bläder, un wenn Glück hest, hörst an Ovend de Hirsche röhren. Intwischen mookt Deep "Schorsch" sik en Vergnögen mit Schuern, Stormböen un maue Temperaturen twischen 5,3 un 17°C. He mutt over oppassen, denn Hoch "Jette" smitt sik bannig in de Boss. Villicht sorgt se för weniger Regen, un mehr Warms. Hüüt, an 22. is astronomische Harvtstanfang. Sommer atschüüss! De Harvst is de drütte Johrstied, is de Övergang twischen Sommer un Winter. Mit Sünn satt, leider kohle Temperaturen un kohlen Wind ut O-SO, in de letzten dree Doog, geiht dat nu in en bestimmt Golden Oktobermoond.
De Pusterich hett am meisten mit 28% ut WNW pustet. Un am stärksten
mit 44,6 km/h (6 Bft). De Moond harr een Kohlen Dag (Tmax<10°C),
twee Sommerdoog (Tmax>= 25°C), un negen Warme Doog (Tmax >18°C).
Wedderdoten Moond:
Mehr Wedder gift dat ünner: hartenholmer-wetter.de. 3.10.2013
|