So weer dat Wedder in Augustmoond

Dat Wedderdaagbook vun Uwe Mohr.
All Biller: Uwe Mohr

Mit en richtigen Sommerdag, 27° C, doch an Morgen bloots mit frische 13°, leggt de letzte Sommermoond los. Sien Nomen hett he von'n römischen Kaiser Augustus. Ole Nomen sünd Oorn-, Flegen- un Wüppenmoond.

An'n 3. speelt Deep "Susanne" sik op. Von de Nordsee kümmt se mit broddige, hitte Luft, 28°! An Morgen lichtes Donnergrollen, over leider bloots een lütten Schuer Regen. O hauhaueha: "Fangt de August mit Donner an, kann he dat eenfach bit to'n Sluss nich loten". Over, wi is dat, tellt de 3. egentlich noch to'n Anfang? Trotz Hochsommer kladdert de Sünn nich mehr ganz so hooch. An Enn von Moond sünd de Nächte bald twee Stünn länger — de Warms nümmt langsom af.

Rainfarn, Augustsmuck an'n Strotenrand. Klick op to'n Vergröttern!

An 4. mol keen Sommerdag. Bi meist bedeckten Heven moie 19,3° in Dörchsnitt. Bi 24,4° stünn de Quecksülversüül. Intwischen steiht Deep "Bertha" vör de Döör. Bannig frische Augustmorgen un Nevel hett se an End von de eerste Dekode bröcht.

Dörch dat warme Sommerwedder ward nu langsom de Tuunfrücht riep. Hasselnööt ward bruun. — Gau plöcken, sünst geiht de Katteker dormit af! Ok Fleder-, Vogel-, Him- un Brummelbeeren un noch veele annere Tuunfrüchte warrt riep.

Nich bloots Katteker, ok Lütt un Groot smeckt Hasselnööt alltied goot.
Klick op to'n Vergröttern!

Anfang 2. Dekode is an Heven allerhand to sehn. Von 10. bit 14. fallt veele Steernsnuppen, de Perseïden, de heet so, wieldat dat schient, as kemen se ut dat Steernbild "Perseus" (dat is over veel to wiet weg, de Snuppen kaamt ut uns egen Sünnensystem, bloots ut desülvige Richt, in de Perseus liggt). Villicht bringt se uns Glück un erfüllt Wünsche! De Heven mutt over kloor sien, sünst sühst nix von de glitzernde Pracht, un ok keen Vullmoond. An 10. is he de gröttste Vullmoond in't Johr, denn de Moond is opstünns dichter an de Eerd as sünst.

De gröttste Vullmoond in't Johr

Von Wedder her wesselt sik Sünn un Wolken af. Mit Regenschuern, Donnergrollen, over ok köller, geiht dat in de tweete Wuch von Moond. De swüle Luft is verswunnen. Bi bloots 10 bit 18 Graad kannst buten al good en Jack antrecken, wenn ok dorvon snackt ward, de Spätsommer kümmt. Vunwegen — nix mit Spätsommer, dat is en verfröhte Harvstanfang!

Nu will uns ok noch Deep "Wilma", de in Ogenblick över Island küselt, besöken. Wat bringt de Tante mit? Richtig, statt Sünn düstere Wolkenwalzen, böigen Wind ut W-SW, Regen, de wi jo ok nödig bruken, un koles, düsteres Wedder. Fröhstücken ohn' Lamp
an, dat geiht nich. To Tied hett dat Wedder nix mit Sommer an' Hoot. De Hochsommer hebbt wi achter uns.

Düüstere Wulken an Heven

Ok in de drütte Dekode geiht dat mit wesselhaftes, windiges un koles Wedder Richt Harvst. Noch blifft dat beständig unbeständig. Dorför sorgt nu Deep "Xiomara", de nu de Rull von "Wilma" övernümmt.

Hüüt, an 23. sünd de Hundsdoog to Enn. Siet 15. bellt se al nich mehr. Keen Wunner, bi bloots 3,1° in de Nacht liegt se lever in de warme Hütt. Over nu, de 23., en moie Spätsommerdag. Beten Wind, veel Sünnenschien un sogor hento 22° güng de Warms!

Ok dat Veh geneet de Warms. Rotbunte mit Hörner, dat gifft dat noch!

An letzten Sommersünndag ok nich recht wat mit Sommerwedder. Deep "Angelika" is ünnerwegs! Dat heet: frische Luft von de Nordsee, wenig Sünn, wesselhaft mit veel Wolken, Schuern un Gewidder. Mit op un dol Wedder geiht dat nu in' eersten Harvstmoond.

Vagelbeeren lüchen in de Tuuns

Wedderdoten letzte Moond (in Klammern de Doten vun'n Vörmoond):

• De Dörchsnittstemperatur harr in 2 m Höchte 16°C (Vörmoond 24°), dat sünd 1,05°C ünnert Middel.
• De Höchsttemperatur mit 28,1°C (30,6°) harrn wi an 3., un ok de deepste mit 3,1°C (7,1°).
• In'n Dörchsnitt harrn wi 20 cm in de Eer 17,3°C (19,4°) un 5 cm över de Eer de deepste Temperatur mit 3,3°C (6,1°).
• De Sünn hett sik recht torüchhol'n. Bloots 196 Stünn (214) stünn se an Heven.
• De Solorstrohlung keem op 301 W/m² (358). Se weer an hööchsten mit 1042 W/m² (1162) an 22.
• Regen an 24 Doog (15) hett 90 l/m² (83,4) bröcht. 9,4% övert Middel.
• Dörch Evapotranspiration sünd 76 l/m² (99) wedder aftrocken.
• De Wind hett mit 56 km/h (6Bft) an düllsten ut W-SW pustet un keem mit 49% ut W-SW.
• De Moond harr 4 Sommerdoog (T_max > 25°C) un 21 warme Doog (T_max > 18°C).

Mehr Wedder? hartenholmer-wetter.de.