So weer dat Wedder in Julimoond Dat Wedderdaagbook vun Uwe Mohr.
Mit Sünnenschien, Wolken, Blitz un Donner, mit Regenschuer un düchtig Wind ut West, so treckt de Heumoond an 1. in't Land. Mit Heu, to'n Drögen op smucke Reuter, kannst keen Wiesch mehr finnen. Se ward nu dörch witte Ballen aflöst.
Gassen, Rogg, Hover, Raps un Weet ward langsom geel un wüllt döscht warn. Bald liggt wedder dat Brummen von de Meihdöscher in de Luft. Sommerwedder ward brukt!
Over mit bloots 14°, veele Wolken an Heven, knapp Sünnenschien is von Julis hitte Gloot noch nix to marken. Geiht over hüüt an 4. loos. Mit 28° meist so warm as bi't Footballspeelen in Rio! Hitte Dag, laues Speel. De Düütschen hebbt gegen de Franzosen 1:0 wunnen. An 5. noch en Sommerdag mit 29° un schwül. An Ovend lüttes Gewidder mit twee Donnersläg weer wohl Petrus Bidrag op dat 1:0 gegen Frankriek. Hüüt, trotz Wolken, de drütte Sommerdag. So wüllt wi dat geern hebben, denn: "Sall Korn un Raps good gediehn, brukt de Juli Sünnenschien."
Over nu de 8. Düütschland gewinnt gegen Brasilien 7:1. Dat hett Regentrude dorto bröcht, 31 l/m² Freudentronen to blarrn. Un Thor, de Donnergott, hett mit en grodes Füerwark ut Blitz un Donner wiest, dat he sik ok över dat Speel freut hett.
Poor Doog wieder ward mehr övert Wedder as över Football snackt. Na denn: Regenwedder hebbt wi, un bloots 16°. De Sünn mut wedder schienen, denn: "Juliregen nümmt de Oorn den Segen." Schient over, dat de lunische Sommer vörbi is. Bloots de stedige O-NO pust wieder mit dicke Backen.
Wat opfallt: de Doog ward al körter. Siet Sommeranfang föfftig Minuten. Dat hett de Kuckuck ok markt. Siet 22. röppt he nich mehr. He is op Tour no Afrika, 9200 km un flücht bloots nachts. Anfang von de drütte Dekode hett Hoch "Aymen" dat Seggen. Ölven Sommerdoog hebbt wi middewiel, un een hitten Dag. "Wenn de Nächte langen, kümmt de Sommer erst ingangen." Na nu, wat is dat? Vör luder Hunnenbellen kriggst keen Oog to. De Hundsdoog fangt an. Von 23.7. bet 23.8. bringt se de hittesten Doog in't Johr. Se hebbt ehren Nomen von Sirius, den Hundsstern.
Nu hebbt wi doch noch en beten von Deep "Paula"afkregen. Se kümmt mit feuchte Grööt ut Oosten. In de Packelaasch Regen un angenehme Afköhlung. Weer ok nödig, no de broddigen Doog. De letzte Dag in Moond lött uns buten mol nich sweten.
Wedderdoten letzte Moond (in Klammern de Doten vun'n Vörmoond):
Mehr Wedder gifft ünner hartenholmer-wetter.de. 8.8.2014
|