So weer dat Wedder in Aprilmoond

Dat Wedderdaagbook vun Uwe Mohr.
All Biller: Uwe Mohr

"Opa", röppt mien Enkel, "bi Wolfgang sünd eben von' Steeg dree Iesvogels in Diek dückert!" "Sünd se noch dor?" — "Nee, over hüüt is de eerste April!"

Doog mit Winterwedder wesselt rasch mit Wedder, dat no Fröhsommer rüükt. Kann over an nächsten Dag mit Schietwedder Fröhlingsgedanken verdrieben. "Wohl hunnertmol sleit dat Wedder üm, dat is Grasmoonds Egenoort."

Wischenschlötelbloom

Mit Frost an Morgen geiht da nu op Oostern to. De Enkel hebbt Oosternester buut un hoopt, dat de Oosterhoos kümmt. An Heven wesselt sik Blau mit Wulken un Sünnenschien af. Wat fehlt, is Regen. Hoch "Ostra" hett ehr Arbeit doon un treckt af. Bit Nomeddag allerbest Butenwedder. Mit eenmol düstere Wolken, Regenschuer, starke Böen, afweihte Twiegen. Deep "Roland" is indropen. Bit to'n Ovend hett sien Spijökenkroom duert. Dorto Wind ut W-NW.

För anner Wedder hett sik Hoch "Padma" meldt. Unstedig geiht dat in de ni'e Wuch.

Siet güstern hüppt de Rootsteert över't Goornland. Meern in Aprilmoond trudelt de Wietfleger as Fröhlingsbott wedder in. Hüüt, an 14., is Kuckucksdag. Schon hört, ob he al dor is? An Dag von Tiburtius mutt de Kuckuck ropen!

Een vun de eersten Bottervagels in't Johr

Mit Sünn de ganze Dag, 18° Warms, treckt "Padma" gen Oosten. Deep "Udo" lött düstere Wulken un kolen Wind weihn.

Hüüt is Oostersünndag. De Sünn schient von blauen Heven, as wull se de Oostereier in de Nester anwarmen. To schön, dat Lachen un Högen, wenn de Lütten wat in't Ness funn hebbt. Wieder geiht dat Söken, wat bi so'n Oosterwedder besünners Spooß mookt. — Ostermoondag ok Wedder to'n Eierlegen. De ganze Dag Sünnenschien, un de Oosterhoos hett sien Arbeit mookt. Lampe kümmt in 2 Sekunnen op 50 km/h. He kann 3 m hoch un 7 m wiet springen. Keen Wunner, dat Oostereier ok mol in en Boomtweel liggen! — Nu verpuust he sick bit anner Johr.

En Oosterei in'e Astgavel! Foto ML

En kotte Arbeitswuch start mit grauen Heven, ohn Sünn un dröög. — Good so: "Regent dat in de Oosterglocken, ward de Planten in Sommer stocken." Von Frankriek treckt Hoch "Ostra" övert Land. Nich slecht! Blaue Heven, wenig Wulken, Fruu Klara in beste Luun, schüfft de Temperatuur von dree op achtteihn Grood.

Hüüt is Wüppsteert bi uns ankomen. Stolt löppt he övern Rosen, pickt no Foder un freut sik op fründliches Wuchenendwedder. — Mitmol sünd wi al in de 3. Dekode. Unverännert höllt sik dat Wedder. Von de Nordsee mookt sik Hoch "Quila" bemarkbor. Leider ohn Regen in de Packloosch! Liekers, Bööm un Strücker blöhen — dat eerste Blattgrön bringt Fröhlingskulöör in de Natur. "De April mookt de Blööm, de Mai deit sik dormit röhm."

Huflattich is en gode Hölp gegen Hoosten

No teihn Doog mit wenig Wulken, over veel Sünnenschien, an Wuchenend bedeckte Heven. Af Meddag fallt nödige, suutje Landregen. Eben heff ik de Kuckuck eerstmol düt Johr ropen höört.

Na nu, wi hebbt de drütte Dag mit bedeckten Heven, wenig Sünn, poor lütte Regenschuer. Hüüt, to Walpurgisnacht, seggt de Aprilmoond adüüs, mit Regenschuer, Wulken, kolen Wind un ok mol Sünn. En veel to drögen April gifft dat Wedder an Wonnemoond Mai. "Regen op Walpurgisnacht hett jümmers een good Johr in Weddersack."

Fröhblöhers in Woold un Holt

Wedderdoten letzte Moond (in Klammern de Doten vun'n Vörmoond):

• Dörchsnittstemperatur in 2 m Höchte +7,8°C (Vörmoond +5,14°), dat sünd 0,18°C över't Middel.
• De höchste Temperatur mit +19,7 C (16,4°) harrn wi an 11. De deepste mit -2,9°C (-3,6°) weer an 7.
• In'n Dörchsnitt harrn wi 20 cm in de Eer +8,6°C (6°) un 5 cm över de Eer 8,4°, de deepste Temperatur mit -4,4°C an'n 7. (-8,3°).
• De Sünn weer recht fliedig. 242 Stünn (145) weer se to sehn, sünd 26% övert Soll.
• De Solorstrohlung keem in Dörchsnitt op 338 W/m² (211). Se weer an hööchsten mit 1051 W/m² (891) an 30.
• An 11 Doog (12) hebbt wi flaue 22 l/m² (62) Nedderslag kregen.
• Dörch Evapotranspiration sünd 55 l/m² (36) wedder aftrocken. De Bodden is also netto bannig dröger worrn.
• De Wind hett an düllsten mit 38 (78) km/h ut W-NW pustet un keem mit 63% ut W-NW.
• De Moond harr 9 Frostdoog (T_min < 0°C), 3 Kole Doog (T_max < 10°C) un 2 Warme Doog (T_max >= 18°C).

Löwentähn

Mehr Wedder? hartenholmer-wetter.de.