So weer dat Wedder in Aprilmoond Dat Wedderdaagbook vun Uwe Mohr
Na Heinrich Seidel, Plattdüütsch: Uwe Mohr
Nu löst Hoch "Linus" Hoch "Kai" af, de uns over ok mit Sünnenschien verwöhnt. He mookt op Fröhling mit Warms. Dat gifft al Sommerdoog, over ok Doog mit Winterwedder, Snee un Hogelschuer. Gau sünd de Fröhlingsgeföhle wedder verswunnen. Ohle Nomen för April sünd: Oostermoond, Knospen-, Grasmoond un Launing. Nich to vergeten dat In-den-April-Schicken, wohl dorüm, wiel he so luunsch is. "Kiek mool, Hannes, dor flüch en Storch mit hölten Been!" Gern worn ok de Lütten no'n Höker schickt, üm een Tüüt mit "Hau mi blau" to köpen.
An föfften un sössten keem endlich dat Woter von boven, op dat wi al so bannig luert hebbt. He hett ok de piesackende Oostwind de Pust afdrückt. Nu geiht dat wedder von kohle 5-7°C no boven. Mit Regentrude in Slepp geiht dat to'n Enn von de eerste Dekode mit knapp Sünnenschien, düster un Regenschuer wieder. Dat freut de Planten, Buern, uns all. "De April tellt 30 Doog. Regent dat an 31 Doog, wöör't ok nich schoden."
An 13. is Stormdeep "Olivia" över't Land trocken. Mit Stormböen ut W-NW speelt se sik op un wiest uns driest ehr kohle Schuller. Keen Wunner, bloots good 9°C in Dörchsnitt, dorto swatte Wolken, de Fru Klara utspart. Worüm "Klara"? Heet so veel as: Lüchtend, hell un schöön. Wokeen dormit meent is, is uns all klaar: uns leve Sünn. Mit Regenschuer, Hogel un kohlen Pusterich mookt dat Wedder wieder. "Geihst du in April bi Sünnenschien rut, loot nich de Regenschirm to Huus!" Brrrrr, wat is dat? -1,7°C Luftfrost un 5 cm över de Eer -2,8°C! Liekers, an Dag weer de 16. recht bruukbor.
Oostern liggt nu achter uns. Bi veel Sünnenschien un bit to 19°C an 1. Oosterdag harr de Oosterhoos düchtig Lust to'n Eierversteken un de Kinner veel Spooß bi't Söken. An 22. ovends hett Thor sien Oostertour mookt. Hier is he over sachten mit sien Wogen övern Heven rumpelt, ok Blitze hett he bloots wenig smeten. Üm so mehr hett sik Regentrude mit düchtig Gewidderschuern anstrengt.
De Rapsfeller lüchten, un de Obstbööm blöht. Masse Arbeit för de Immen! Dank Hoch "Quinlan" hebbt wi sünniges Fröhlingswedder. Bloots de kohle Wind ut Oost mookt so'n beten Speelverdarber.
Den Aprilmoond hebbt wi achter uns. In de Walpurgisnacht susen de
Hexen wedder op ehr Bessen no'n Brocken hoch un droopt dor Beelzebub.
Weet de Düvel, wat dor besnackt ward! Ännern künnt
se de Tied ok nich; morgen geiht dat los mit Wonnemonat Mai! Wedderdoten letzte Moond (in Klammern de Doten vun'n Vörmoond):
Mehr Wedder gifft dat hier: hartenholmer-wetter.de. 2.5.2014
|