So weer dat Wedder in Märzmoond

Dat Wedderdaagbook vun Uwe Mohr

Winter adjüüs, seggt de Meteorologen. An 1. fangt bi de Wedderexperten dat Fröhjohr an. De März is de Brüch von Winter no't Fröhjohr. He is de erste Fröhjohrsmoond. Ohle Nomen sünd Lenz-, Fröhjohrs- un Knospenmoond.

Maja op Wichelketteln bi't Pollensammeln. Foto Uwe Mohr

De März ward von't Wedder her schon ümmer mit Vörsicht beluert. "Mit Märzen is nich goot spoßen." Los leggt hett he mit Nevel un -3°C. "So veel Nevel in Märzen stiegen, so veel sik in Sommer Wetter wiesen."

Wi sünd jo al een goot Enn lang. Liekers, dat kann noch kohlt warn un ok Snee geven. Wenn denn over an 20. de Fröhling kümmt, freut wi uns över dat Opwoken in de Natur.

De März sall nich to warm, windig un dröög sien. He sall komen as en Wulf un gohn as en Lamm.

Orr as dree Lämmer, meent düsse dree Grazien. Mit den Wulf nehmt se dat op! — Foto Uwe Mohr

Siet Anfang de Wuch hett Deep "Christine" dat Ruder in de Hand. Mit veel Sünnenschien, blauen Heven un kohlen Wind ut O-SO geiht dat in de nächsten Doog. Allerdings mit düchtig Nevel, de sik meist bit Meddag höllt. Nohmeddags denn over feines Fröhlinswedder. Dorto de Buernspruch von sössten: "Üm de Dag von Fridolin / treckt de letzte Winter hin."

Mit de nu warme Temperaturen koomt ümmer mehr Planten in Blötensmuck un lockt Immen, Hummeln un anner Insekten to'n Naschen un Bestöven an. Hasselnütt un Wicheln hängt vuller Ketteln (Kätzchen). Nix för Heusnuppler, over de veelen Summer un Brummer gefallt dat. Ok Bottervogels as Zitronenfalter, Voss un Dagpfauenoog sünd ünnerwegs.

Koppstand bi de Nektaroorn. Foto Uwe Mohr

De Fröhling dreiht op, un de Immen mookt Koppstand in bunte Krokusse. Von Wichelketteln ward Pollen un ok al Nektar insammelt. Hoch "Guido" bringt Warms, 19°C, Sünnenschien un blauen Heven — Billerbookwedder de ersten twölf Doog in Moond.

Hasselnööt sünd eenhüüsig op een Plant, boben de
Blööt. Dörch de gelen, männlichen Ketteln kümmt dat, mit Hülp
von Wind, to Sülvstbestäubung. — Foto Uwe Mohr

An twölften heet en Buernspruch: "Gregor wiest de Landmann an, op he in't Frie seien kann." Kann he! Denn gestern, 11., harrn wi mit 205,1°C de Grönlandtemperatur foot. (Vörjohr 22. 4.) Dat heet, de Vegetationstied fangt an. Rein tofällig sünd bi uns de "Leddernjungs" (Dicke Bohnen) in de Eer komen. Hoch "Ingo" sorgt mit veel Sünnenschien för Warms, dormit se gau kiemen. Leider treckt "Ingo" af. Mit Pusterich, grauen Heven un Regen geiht dat wieder.

Wat is denn de Grönlandtemperatur?

Nee, mit de kohle Insel Grönland hett dat nix to doon. "Grönland" heet hier: gröön Land. De Grönlandtemperatur warrt so utrekent:

• Vun'n Johrsanfang an warrt all positiven mittleren Dags-Mitteltemperatuurn tosamentellt...
• ...un denn mit en Faktor malnahmen:
  • In'n Januarmoond is de Faktor 0,5
  • In'n Februarmoond is de Faktor 0,75
  • Vun Märzmoond an is de Faktor 1.
• Wenn düsse Summe op den Weert 200 stegen is, snackt wi vun Vegetationsbeginn.

In de verleden Johrn sehg dat mit de Grönlandtemperaturen (°C) un den Vegetationsbeginn so ut:

De kalendorische Fröhlingsanfang is dor! Paßlich bringt uns Hoch "Johannes" 19°C Warms, Sünnenschien un nur sachten Wind. Wat seggt de Buernspruch to düssen Dag? "Wi dat Wedder an Fröhlingsanfang, blifft dat de ganze Sommer."

Na dat sünd ja schöne Utsichten, meent dat Dagpfauenoog bi't Sünnen. Foto Uwe Mohr

Batz, sünd wi doch al merrn in de drütte Dekode ankomen. Eben heff ik de eerste Goornrotsteert sehn. An 25. is denn ok Wippsteert indropen. Dank Hoch "Kai" seggt de Märzmoond mit veel Sünnenschien, Warms un frische Nächte adjüüs.

Wedderdoten letzte Moond:

• De Dörchsnittstemperatur harr in 2 m Höchte 6,6°C, dat sünd 2,4°C övert Middel.
• Höchsttemperatur mit 18°C harrn wi an 9. un de deepste mit -3,7°C an 12.
• In'n Dörsnitt harrn wi 20 cm in de Eer 6,6°C, un 5 cm över de Eer de deepste mit -5,0° an 12.
• De Sünn hett dat recht good mit uns meent. 180 Stünn hett se an Heven stohn, sünd 58 Stünn över't Middel.
• Solorstrohlung keem op 228 W/m² un weer an hööchsten mit 788 W/m² an 29.
• Regen an 12 Doog hett bloots 29,4 l/m² geven. Dat sünd 47,4% von't Soll. Is over nich verwunnerlich, denn de Fröjohrsmoonde sünd de nedderslagärmste Tied in't Johr in Sleswig-Holsteen.
• Aftrocken sünd dörch Evapotranspiration 29 l/m².
• De Pusterich hett an meisten mit 17% ut W-NW weiht un an düllsten mit 61,2 km/h (8 Beaufort) ok ut W-NW an 15.
• De Moond harr söven Frostdoog (T_min < 0°C), ölven kohle Doog (T_max < 10°C) un twee warme Doog (T_max > 18°C).

Mehr Wedder gifft dat hier: hartenholmer-wetter.de.