So weer dat Wedder in Februarmoond

Dat Wedderdaagbook vun Uwe Mohr.
All Biller: Uwe Mohr

Mit en Winterdag treckt de letzte Wintermoond in't Land. Ruchriep an Bööm, Twiegen un Strücker — en Winterdroom! Bloots, to Middag: allens wedder kohl. "De Februar is en egen Kauz — wenn't nich freert, denn daut't."

Winterlinge in'n Snee

Nu geiht de düstere Johrstied ehr End' entgegen. Dat ward heller, un de Sünn kladdert höher. Siet Winteranfang is de Dag al een Stünn länger. Ok de fedderten Frünn ward unruhig. Se sünd al düchtig an't Quinkeleren. "Röppt de Grönspecht schon in Februar, is de Lenz bald dor."

"Mal kieken, warrt dat al Tied, sik üm en Quartier to kümmern? Düt nehm ik!"

In Goorn lüden de ersten Sneeglöckchen, un Krokusse kannst ok al sehn. "Hüppen in Februar Katteker un Finken, sühst du bald de Blöhtied winken." Over an 4. morgens, mit -6°, is eher Bibbern anseggt! Hoch "Gabriele" bringt Hochdruckwedder.

Grau in grau un köller geiht dat wieder. Denn nich bloots Wolken, ok Nevel schüfft sik för de Sünn. Verwunnert plierst op dat Thermometer. Nachts -4,2°, nomeddags +4,8° . "Wenn de Februar dat sachte mookt, bringt dat Fröhjohr Frost bi Nacht." — Wat is mit Snee? De kümmt as Luxussnee rünner un rümt sik sogor sölbst wedder weg.

Krokusse mit Immenbesöök

Friedag, de 13.? De Dag höllt sik lever ut Bang, den ganzen Dag ünner Hochnevel un Nevel verkroken. Bangbüx? Wer weet? "Friedag, de 13., geiht alles scheef!" Allens Tüünkraam! Na unsen gregorianischen Kalenner fallt de 13. veel öfter op en Friedag as op jeden annern Wekendag. Dat kannst ok utreken. Friedag de 13. is en Allerweltsdag! Over t.B. Mittwuch de 13. is roor!

Mit Nevel an Morgen, Wolken un Sünnenschien, geiht dat an 14. in Valentinsdag. "Hett Valentin veel Regenwetter, ward de Fröhling üm so mehr von Regentrude goten." Valentin is uk de Dag, wo de Geschäftslüüd besünners gern op hinwiest. — Ludden sall sien Leevste en Geschenk moken. Dor freut sik, an Dag von de Verlevten, sien Fruu Tutti. Noch mehr de Kooplüüd un Blomenhöker, wiel dat in de Kass knistert un klappert.

Hamamelis, de Zaubernuss

Middewiel sünd wi in de drütte Dekode landet. Mit Sneegriesel, Nieselregen, graue Wolken un Temperaturen mit lichten Frost geiht de Winter to Enn. Hoch "Steffen" löt de Muskeln speelen — un höllt de Grippeviren in Swung. Over ok in Büscher, Bööm un Twiegen fangt dat sachten an to knospen. An 24. heet dat: "Sankt Matthias, de hett Krafft, denn he gifft de Boom sien Saft."

Sünndag, an meteorologischen Fröhlinsanfang, is Aprilwetter in März. Schon mol wat von Quatemberdag hört? Dat is de eerste Dag von en Vierteljohr. Bi de Kathoolschen is he over ok en bestimmte Fastendag. So to'n Bispeel an düssen Mittwuch von de eerste Fastenwuch.

Nu geiht dat mit Regenwedder in' Lenzmoond März.

Märzenbeker

Wedderdoten letzte Moond (in Klammern de Doten vun'n Vörmoond):

• Dörchsnittstemperatur in 2 m Höchte +1,7°C (Vörmoond +2,5°), dat sünd 0,22°C över't Middel.
• De höchste Temperatur mit +15°C (11,7°) harrn wi an 26. De deepste mit -7,3°C (-4,7°) weer an 6.
• In'n Dörchsnitt harrn wi 20 cm in de Eer +3,2°C (3,9°) un 5 cm över de Eer de deepste Temperatur mit -8,3°C (-6,7°).
• De Sünn weer 58 Stünn (22) to sehn, sünd 60% von't Soll.
• De Solorstrohlung keem op 106 W/m² (53). Se weer an hööchsten mit 608 W/m² (425) an 22.
• An 17 Doog (22) hebbt wi 13 l/m² (109) Nedderslag kregen.
• Dörch Evapotranspiration sünd 11,5 l/m² (7,6) wedder aftrocken.
• De Wind hett an düllsten mit 53 (76) km/h (7 Bft) ut W-SW pustet un keem mit 21% ut W-SW.
• De Moond harr 2 Iesdoog (T_max < 0°C), 16 Frostdoog (T_min < 0°C) un 28 Kole Doog (T_max < 10°C).

De Sünn is al dor, schafft se dat ok?

Mehr Wedder ünner hartenholmer-wetter.de.