Wat – fröher as sünst? Ja, de Kalenner seggt, dat weer noch Winter. Aver de eersten Störk sünd al ut'n Süden trüch. Un ok een vun uns Störk worr al Anfang Februor op de Weid blangen dat Storkennest sehn. Un denn, rechttiedig to'n Valentiensdag, is ok de tweete an sien Teel ankamen — un beide hebbt sik forts doranmaakt, dat Nest hertorichten. Nu, üm de Oostertiet, sünd beide Störk op dat Nest to sehn un dat schient, as weern se ok al an't  Bröden. Un dat wi uns Freid an jüm hebbt un ok en beten stolt sünd, markt een al doran, dat wi vun „uns Storkenpaar“ snackt.

Wi freit uns, dat Jahr för Jahr meldt ward, dat de Tall vun Störk in Düütschland tonimmt. In't Jahr 2024 hett man vun 13000 Poren snackt. Neddersassen weer mit 2100 teemlich vörn dorbi, dorvun worrn in unsen Landkreis Rodenboorg 100 Poren tellt. Gode 20 Johren is dat nu her, dat ok bi uns in't Dörp en Kavelmast mit en Nisthülp opstellt worr, op dat sik meist jedet Joohr en Storkenpaar daallett, dor Eier leggt un lütte Störk utbröödt, se opteht un sik naher wedder op de Reis na Afrika maakt.

Nu ward aver ok seggt, dat dörch de weken Winter jümmer minner Störk den langen un gefährlichen Weg na Afrika op sik nehmt un dorför lever in Spanien or Portugal överwintert. Dor findt se noog Nohren op Müllbargen — denn Störk hebbt jümmer goden Aptiet un nehmt dat, as de mehrsten Wilddeerten, nich genau mit de Herkumst vun de Nohren. En utwussen Stork brukt an'n Dag so wat 500 Gramm Foder, dat sünd üm de 20 Müüs or 200 Maddiks. En Jungstork bruukt meist dreemal soveel! De Stork itt aver nich blots veel, sünnern ok verschedene Saken. So stört he sik op Maddiks, Poggen, Müüs un Winnworpen, aver ok Jungvagels un Junghasen staht op sien Spieskart. In uns Rebeet is de Hauptnohren för Störk aver Müüs, Wörm un Snicken.

De Oostertied is vörbi. Nich blots de Oosterhaas hett Eier „leggt“, ok uns Störk sünd an't Bröden. Dat ward nich mehr lang duurn, denn ward de lütten Störk slüppen un jümehr Snäbel na Foder opsparrn. Nu, in de Hauoornt, seht wi dat Poor meist jeden Dag twüschen de Hauhümpels na Nohren söken.

Biller: Angelika Cordes

---