Wo wi nu en poor Johren dröge Sommer hatt hebbt, kunn een dissen Sommer vele vun jüm sehn: Snicken. Afsünnerlich de eekligen Naaktsnicken weern överall togang, in'n Gemüsegoorn, in'n Salaat, aver ok op'n Weg kunn een al de sliemige Spoor sehn — un den Schaden, den de Slieker an de mit veel Mööh optagenen Planten nalaten hebbt. Dat Vörjohr weer wunnerbar för de Snicken, de in disse Tiet snell wassen un dorwegen ok veel freten doot.

As de Kuckuck den Nestbu verlehrt hett, so hett de Naaktsnick
ehr Huus in'n Verloop vun de Evolutschoon afleggt

Anners as de Wienbargsnick or annere, lüttje Snicken, hebbt Naaktsnicken schienbor keen Huus, in dat se sik verkrupen köönt. Schienbor, denn ok de hebbt vör unendlich lange Tiet ehr Huus mit sik rümsleept. Dörch de Evolutschoon hett sik de Anlaag, en Huus to schapen, mehr un mehr minnert, so dat nu meist nix mehr dorvun to sehn is.

Utloopmodell vun'e Evolutschoon? Dat Snickenhuus

Wat ik nu aver sehn heff, kümmt mi doch spaansch vör: Dor sünd doch dree vun disse swarten un brunen Naaktsnicken över Nacht en meist dree Meter hogen Pahl piel hochkladdert, op den baven op en Vagelhuus anbrocht is. De Meesen, de dor veer Lüttje utbrocht hebbt, sünd al lang utflogen un de Kassen is leer. Schöllt disse Spaanschen Wegsnicken woll Huusbesetter ween — or worüm schullen se woll anners so hooch rut wüllen?

Aver ok de Snicken mit Huus sünd ganz scharp op so'n Vagelhuus!

Oha — viellicht wöllt se sik ok blots vör miene Jäger, de beiden Loopaanten, in Sekerheit bringen. De hebbt jüm al lang op'n Kieker!

Wohrt ju weg, Snicken! Sünst warrt ji to'n Fröhstück!

Biller: Angelika Cordes

---