 |
|
Dat ward seggt: vun Berthold Cordes So, nu hebbt wi de Schiet! Dat is luuskoolt un dat Auto springt nich an. Seker is mal wedder de Batterie all. Aver en Blick in den Motoorruum seggt mi wat anners: Dat is apensichtlich de Moort ween! Erst letzte Week hebbt wi een sehn; aver de weer doch en ganz End vun uns Huus weg, achtern in'n Woold. Wi hebbt dat neeschierige Deert doch knipst, dat kunn doch woll nich de Öveldeder ween. Un richtig, ik heff mi seggen laten, dat dat en Boommoort is, de nich de Neegte vun uns Minschen söcht.
Johr för Johr stellt Besitter vun Autos fast, dat Moorten Kavels, Släuch un Leitungen tweibiet un dordörch groten Schaden utlöst. Aver worüm doot se dat? — Steenmoorten hebbt de Schu vör Hüüs vun uns Minschen afleggt un teht mehr un mehr op en Dackbodden, Garaasch un ok in Autos. De Moort mag geern drange Ritzen un Löcker, in de se sik rindwängen köönt, un dat geiht nu mal bi Autos wunnerbar. In de Wintertiet is dat dor ok meist noch schön warm, jüst wenn de Motor vörher noch an ween is. Aver as al seggt, dorbie hannelt sik dat meist üm den Steenmoort. Worüm aver bitt he Kavels un Leitungen kaputt? Dat hingt woll mit sien Natuur tohoop, dat he as Enkelgänger all'ns, wat in sien Rebeet is, mit sien Ruch belickteken deit, üm frömde Oortgenossen aftotolen. Wenn aver liekers mal en anner Moort in sien Riek inbroken is, maakt em dat so fuchtig, dat he ut luter Brass üm sik bitt un all'ns wedder mit sien Ruuchmark kenntekend.
Doch nu noch mal to unsen Boommoort, den wi in'n Woold knipst hebbt. He dricht en düüsterbruun Fell, dat in'n Winter lang un sieden, in'n Sommer körter un ruuch is. He is grötter, aver lichter as de Steenmoort un kann sik so beter in Büsch un Bööm bewegen. He kann goot kladdern un dorbi bit to veer Meter överspringen. Boommoorten sünd meist in'n Düüstern un bi Nacht togang. Dorbi bewegt se sik meist op den Bodden un leggt bit to söben Kilometer trüch. Tja, hett nu düsse Boommoort de nullkommadree oder wat Kilometer to uns Auto trüchleggt un dat tweibeten, orr weer dat doch en Steenmoort? Eendoon — uns Auto leggt jüst keen Kilometer trüch. Danke, Moort!
Biller: Angelika Cordes 23.2.25
|
