All de Vagels sünd al — weg?!

Vagels maakt ok mal Ferien

vun Berthold Cordes

Seker hest du dat ok al mal höört. Morgens kort vör Klock veer geiht dat los. Meist is dat de Amsel, de mit en luut Trallern, Schülpen un Zirpsen dat Konzert in Gang bringt. Annere stimmt lansam mit in. So geiht dat op den Morgen to. Na'n Fröhstück kickst du in den Goorn un dor is Leben in de Bood. Överall jiepelt dat, de Rasen ward vun all Sieten dörchsöcht, wat dor nich jichtenswo noch en Meggn oder Ruup to finnen is.

"Surf Shop" steiht an dat Huus — dor weet een ja glieks, wat de Bewahners in'n Sinn hebbt!

Welke sünd ieverig dorbi, Saken tohooptokleihen, de för en Nestbo to bruken sünd: Moos, Stroh, lütte Stöcker, Twiegen, Feddern un männich anneret ward so an en Steed brocht, de se sik al nipp un nau utsöcht hebbt. Dor sünd denn de Snabelwarker togang, dat Nest to boen. De Amseln söökt sik meist en Steed in de Büsch oder Hecken. Un is dat denn na'n poor Daag fardig, ward ok al Eier rinleggt, de denn flietig un mit Utduer utbrüüt ward. Annere Vagels as Mesen, Lünen un Spreen nehmt ok geern en Vagelkassen. Meist veerteihn Daag brüüt de Öllern de Eier ut, bit de Lütten ut dat Ei slüppen doot.

In grote Iel slept nu Mudder un Vadder Foder ran. Dat is gor nich so eenfach, de hungerigen Snabels satt to kriegen. Wörm, Kävers, Botterlicker, Maden un Spinnen slukt de Lütten so snell weg, dat een kuum so gau kieken kann. Un jümmer wedder sparrt se den Snavel op.

Düt is ja nu ehrder de rustikale Smack!

Insektenhotel: Hier wahnt dat Foder!

Düt is ja meist vun't Design her en Ferienhus!

Na goot twee Weken is dat denn so wiet. De lütten Vagels versöökt, dat Nest to verlaten, un denn kummt ok bald de eerste Versöök to flegen. Blots een schient sik nich so recht to troen. He kickt sien Geswister lang na. Lannbahn is meist de Rasen. De Öllern passt op, dat keen Unglück passeert. Wo licht kunn en Katt üm de Eck kamen un sik op de Lütten störten.

Siet en poor Daag is dat verdächtig rohig. Ik besluut, mi doch mal in'n Goorn ümto-kieken. Toeerst achtern bi'n Goorntuun, wo in de Büsch Amseln ehr Tohuus hebbt. Sünst sparrn de Lütten jümehr Snäbel wiet op oder duken sik, dat jüm nüms to sehn kreeg. Nu aver weern de Nester leer. Ok de Vagelkassen blangenan möök nich den Indruck, dat dor Leven in wöör. De fiene Wahnung en Huus wieter schien ok nich mehr bewohnt to ween. Wo sünd de blots all bleven? An de Garaasch hangt ok en Vagelhuus; dat süht ut as'n Wahnwagen, ok leer. Wahnwagen?! Nu geiht mi en Licht op. Dat is Ferientiet — un worüm schull'n nich ok Vagel na so en anstrengen Tiet mal Ferien maken?

Un dat Schöönst: Se köönt mit goden Geweten Floogreisen maken — is allens vull öko!

De Vagels, de hier wahnt, sünd wiss ut Holland!