De Taschensee, en Idyll

Versteekte Schöönheiten

vun Antje Heßler

De Taschensee hett al jümmers mien Ogenmark up sik trocken. Wenn wi mit Auto vun Tramünn in de Richt vun Eutin föhrt, liggt to de linke Siet vun de Straat deep in't Taal en lütten See. He liggt dor so richtig fien mang de Hügel. Meist as wenn he sik en Bett maakt hett. Aver dat weer wull doch de Iestiet, de düsse Moränenlandschaft maakt hett!

De See liggt wirklich as in en (iestiedlich) Tasch

De Taschensee (in'n grönen Krink)

Up de anner Siet vun de Straat is en hogen Woold, de Stubbenbarg. An den See kannst blots över Feller un dörch Knicks kamen.

Villicht kann man vun de anner Siet an den See kamen. Dor staht Hüser, dat kunn man sehn. Dat müss doch to maken sien. Ik heff de Landkorten studeert un heff wohrhaftig enen lütten Feldweg funnen. De güng vun de Straat "Am Redder" an den lütten Pönitzer See na de Hundemöhl! Un de Hundemöhl leeg an den Taschensee!

Nu weer keen Hollen mehr, de Fohrt güng los. Ik harr mien Fründin bi mi.

Bald harrn wi de Straat an den lütten Pönitzer See funnen. An en groten Hoff mit den Naam Schmiedekamp vörbi föhr'n wi langsam an den See lang. Endlich wöörn wi dat Stratenschild "Hundemühle" wies. Dat geev also würklich enen Oort Hündemühle! Nich to glöven!

Woans kümmst da ran, an dat lütt Juwel?

Wi föhr'n in den Feldweg. Achter uns geev dat en grote Stoffwulk. Vör uns kunnen wi en poor Hüser utmaken. Dor achter güng dat bargdaal, dor müß de Taschensee liggen. He blenker al dörch de Büsch.

Över enen Hoff kemen wi an en Rick. Hier weer de Welt för uns un uns Auto to Enn. Aver en fründlich Fru hett uns dat Rick upmaakt. To Foot kemen wi den endlich an dat Över vun den Taschensee.

Wat dünn sik dor för en Blick vör uns up! Mank Binsen un Schilf keken wi över den blanken See. Up de anner Siet leeg Gronenbarg in'n Sünnenschien.

As'n Droom

Sommervagel up de Waterminze

Dat Water vun den See weer glaskloor. An'n Grund kunnst Slammsnicken grasen sehn. En Pogg seet mank dat Wöttelwark vun de Waterplanten.

De Ruuch vun Pepermint trock uns in de Nees. To Fööt vun de Binsen harr sik Waterminze breet maakt. Dat weer en richtig lütt Paradies.

Waterminze — dat duft!

Nanu?! Watersnicken! So sööt!

Un eerst de lütt Pogg!

Dor snickt se rüm, de söte Snick!

Un denn wöörn wi eerst de wunnerboren rosa Blötendolden up de slanken grönen Halme wies. De Bloom wuss in't Water. An jeden Kopp seten bit to dörtig enkelte Blöden. Se erinner uns an Blöden vun Lauchgewächse. Wi hebbt de Bloom beide to'n eersten Mal sehn.

To Huus heff ik den glieks nakeken, wat dat för en Bloom weer. Se harr verscheden Naams: Schwanenbloom, Waterliesch, Blomenbins, Waterviol un Doldige Schwanenbloom. Se is de eenzige Plant ut de Familie Schwanenbloom, de Gattung Butomus. Se wasst as Sumpplant an't Water vun Seen un in feuchte Rebeets.

De Blötendold is en richtig Kunstwark. De enkelt Blööd vun en Dold besteiht ut tweemal dree Blödenhüllbläder. De eersten Hüllbläder hebbt de Farv vun gröön bit witt un düsterrosa. De neegsten Hüllbläder sind gröter un rosa. Ok de gelen Stoffbläder sünd tweemal in Kreis üm den Fruchtknoten rüm. Jede Blööt steiht up enen fief bit tein Zentimeter langen Stööl. Alltohoop sünd se in de Meern to en Dold tosamen wussen. De Blööt is wohrhaftig en Kunstwark. Un düt Wark steiht up enen langen Stööl, de bit to dörtig Zentimeter ut dat Water kiekt.

Wi hebbt Glück hatt. De Blöötiet vun de Schwanenbloom is vun Juni bit in den August. Un de lütteTaschensee hett uns ok sien Schöönheit wiest!

Waterminze tohuus in de Vaas