De Sünnschienkieker in'n Christmaand wiest: De Dannboom Boom von dat Johr 2004 |
||
|
Weißtanne de Dannboom De Dannboom, ja jüst de Dannboom is to den Boom von't Johr 2004
köört worrn! Kennt wi in Noorddüütschland
eentlich 'n richtigen Dannboom? Wat wi hier hebben, is ja meist de
Rootdann, dat heet de Fichte; nau seggt, vondaag hefft wi ok de Noordmannsdann,
de ut den Kaukasus kümmt, oder de Blaufichte. |
|
|
||
|
De Dann verlangt veel von den Bodden un von ehr Ümwelt Se will tominnst 600 mm Regen in't Johr hebben, nich to warm un nich to kolt, dat se sik wohl feuhlt, un ok rieklichen, nich to suurn lehmigen bit tonigen Bodden för ehr langen, deep rieken Wotteln. Wo se de Bedingen nich findt, gifft dat keen Dannenbööm. Dorüm wasst se an leevsten, as se von oole Tieden her wennt is, an de nich so warmen Noord- un Westsieden von de Middelgebirgen in Europa. Dor hett se den richtigen Bodden un noog köhlen Nevel un Natt. Aver se is bannig wat övelnehmsch för Schaadstoffen in'e
Luft, suren Regen un so. So gifft dat hüüttodaags nich mehr
veel grote Dannenwälder in Europa. De Dannenbööm wassen
beter in Mischwoold. Letzte Tiet hett man nu Dannen in Noorddütschland, England un Dänemark as Mischwoold ünner Fichten un Böken anplant. Mit goden Gewinn. In Noorn sünd bi uns weck in Sleswig-Holsteen un in Neddersassen, aver von Natuur her sünd se hier Uutlänner. De meisten stahn nu maal in Mittel- un Süüd-Europa, so as dat op de Landkoort to sehn is un dat woll al lange Tieden. So'n Dannenwald is wat Fienes. Alleen de Duft von de Dannen is eenmalig. Un wat groot de warrn! Dor is'ne Böök oder'ne Fichte 'n lütten Keerl gegen. Ik denk ok an den fienen Dannenhonnig. Keen Minsch hett wat von Fichtenhonnig heurt, nee. Gifft keene groten Dannen mehr Aver so recht warrt dat nix mehr mit de Optucht. De Luft is to un
to dreckig, un de scheunen ollen, groten Dannen hefft de Lüü
sowoso afslagen. Oder mag een noch 500 Johr täuven, bit he en
Dann afsagen deit? Ne, de Lüü bruukt Holt to'n Buen, för
Papier, för Tüüg un all so'n Saken. Dor kann keen Grootvadderdann
mehr in Woold wassen. Wenn de Dann blöht... De Dannen wassen in de Hööcht, aver se blöhn nich!
Ja worüm denn nich? Dat duert nömlich 30 - 50 Johr, bit
se so wiet sünd. Dor kann 'n düchtigen Keerl 'n olen Mann
bi warrn, bit baben in de Dannen de eersten Zappen un Blöden
kamen. |
|
|
|
|
Baben:
Stamm von de Dann; Zappen jung; riepe Zappen; Flögelsamen von
de Dann |
||
|
In Winter Aver de Dann, se steiht prächtig un piel dor un reckt sik in
de Hööcht. Nu kann de Snee kamen, den kann se goot verdregen. In Winter kamen de Holtlüü un slagen Bööm, ok
Dannen. De Wiehnachtsboom! Aver ik mutt nu immer an denken: Frohe Wiehnachten! wünscht Se Ehr Sünnschienkieker. |
|