Sünnenuhren "tickt" anners

vun Heiner Starken

Een Sünnenuhr an de Huuswand kannst du meist as so'n lütt "Solaranlaag" ansehn. Wenn se ok keen Energie levert, bruukt se doch keen Batterie as anner Wanduhren. Mien sülven maalt Sünnenuhr löppt nu all siet 25 Johren un is in all de Tiet ohn Uhrmaker utkamen.

Dat Ümstellen up de Wintertiet is komplizeert...

Problemen gifft dat blots tweemol in't Johr bi't Ümstellen up de Winter- oder Sommertiet. Dor laat sik nich gau mol de Wiesers trüch- oder vördreihen. Bi de Sünnenuhr is de "Polstab", wo dat heet, fast monteert un astronomisch genau na Süden utricht. Sodenni lött de an'n Häven vörbitrecken Sünn sien smalen Schatten över't halfrund Zifferblatt wannern — un du kriggst een Oog dorför, de Tiet up fief Minuten genau aftolesen.

Wenn nu aver Sünndag bi de Twölf up de Sünnenuhr de Klock jo nu erst ölven is, mutt de Twölf even üm een Stünn na rechts versett warrn — un allns kümmt wedder in't Lot. Dorto mutt ik denn mol wedder de groot Ledder hoch, üm dat Zifferblatt to ännern.

Bi gries Regenwedder weer jo keen Iel nödig, denn wo keen Sünnschien is, kann ok keen Schatten wannern. Denn gellt aver düss Riemel:

Een Sünnenuhr, de uns begegent, smückt dat Huus — ok wenn dat regent.