Spectrum: Start lückt, Floog nich

van Ludgerd Lüske

Dei Ruumfohrt geiht in uns Daoge mehr un mehr in privaote Hand över, un taugliek versöökt aale Länner, sik unafhängig van dei USA to maoken. Ok Isar-Aerospace is ein privaotes europäischkes Ruumfohrt-Ünnernähmen. Dat sitt duune bi München. An'n Sönndag, den 30. März, üm 10:30 Uhr UTC mök Isar-Aerospace den eiersten Verseuk tau'n Affhäwen van dei tweitornigen Spectrum-Rakete. Dei Rakete sülwest befünn sik up dei Startramp in Norwägen; dat Leit lägg bi Isar-Aerospace in Bayern.

Dei Spectrum-Rakete is noch nich tauenn entwickelt, sei is noch in't Probeerstadium. Sei schall laoter neie Satelliten in'n Orbit draogen. Lanng wier dei eierste Starrt plaont wäst un woor väälmaols afseggt. Nu schulll dat eernst warrn. Daoge dorvör sä man den Start tweimaol aff; et geef tauväl Wind.

Dei Spectrum-Rakete häwt taun eiersten Maol aff van den europäischken Bodden.
Bild-Daoten: nasaspaceflight

Dortau giff et hier Videos.

At dei Rakete dei Startrampe ünner sick löt, füng sei an mit dat Kippen in dei Orbit-Baohn. Dorbi güng dei Kontrolle äöwer dat Ruumfohrtüg flüschk — un dei Rakete füllt trügge up den Bodden. Nauer seggt, nich up den Bodden — dei Rakete füllt nao 30 Sekunnen in't Meer. Isar Aerospace geef dat Flug-End bekannt. Dat Start-Rampen-Wark is woll bi dei Aktion heile bläben.

Dei Mission, "Going Full Spectrum" neumt, is dei eierste orbitaole Start-Verseuk van Norwägen un Kontinentaol-Europa ut, wenn man dorbi England un Russland nich räket.

Dei Spectrum-Rakete bestaiht ut twei Torns, dei mit eine Mischkung ut Käöhlenstoff-Faoser-Kunststoff maokt werd. Dei Rakete is 28 Meter hoch un hätt einen Dörmäter van 2 Meter. Sei schall bit 1000 kg Last in einen leegen Erd-Ümmloop un 700 kg in sünnen-synchrone Ümloop-Baohnen drägen. Utleggt is dei Rakete för tweipadd groote Last-Schaolen.

Nägen Fleitstoff-Driewwarke, "Aquila" neumt, driewt den unnersten Raketen-Torn mit 675 kN an. Wenn ein Motor utfallt, flügg dei Rakete nao Plaon wieder. Eine Vakuum-Bauort van dat Driewwark driff den bäöweren Torn mit 94 kN an. Dat kann uck faökener wedder anspringen. So werd uck komplexe Baohnmanöver stüert, wenn man mehr Satelliten achternanner in annere Ümmloop-Baohnen affsetten will. Dei Driewwarke loopet mit Propan un fleiten Suurstoff.

Hier kann man Biller van dei Fabrikrüme bekieken: Technologie — Isar Aerospace.

Isar Aerospace häwt aff bi't eierste Utprobeiern van eine orbitaole Drägerrakete.
Bild-Daoten: isaraerospace

Nu süht dat Ganze mit dei affstörten Rakete för'n Laien ut as eine düre Pleite, aower Isar Aerospace süht dat nich so un verkünnnt aopentlich in dei Medien, sei harrn Masse gaude Daoten mäten kunnt, dör dei se klauker wüürn. Wat dat so is, warrt wi sehn, wenn dei neegsten Starts anstaoht. Glück up!