Crew Dragon mit Crew bi dei ISS ankaomen!

van Ludgerd Lüske



Dei Ruumkapsel staiht hier noch in dei Warkstäe. Bild-Daoten: NASA

Dei Ruumkapsel Crew Dragon flög al tau'n tweiden Maol nao dei ISS. Eiersmaols wören veier Lüe an Bord un sei kreegen eine neie Technik mit. Siet 2011, sietdat dei Ruumfähr Space Shuttle ut den Deinst naohmen woor, sünd dormit tau'n eiersten Maol wedder Minschen van dei USA ut in't All flaogen.

Finanzeiert van dei NASA, hebbt Boeing un SpaceX as eierste Privaotünnernehmen Ruumkapseln entwickelt, dei jümmer wedder bruukt warrn kunnen. Dat harr na johrenlanges Forschen ein deegten Konkurrenz-Wettloop geven, över den wi al bericht hebbet. Upstunns hätt SpaceX, dei Firma van den Tesla-Grünner Elon Musk, dei Näsen vörn. Bithertau hett Boeing kienen Flug mit Crew an Bord taurechtkrägen.


Binnen in dat Ruumfohrtüg. Bild-Daoten: NASA


Dei veier Astronauten-Lüe vör den Start. Bild-Daoten: NASA

Dei veier Commercial Crew Astronauten (vördere Riege van lünks) Shannon Walker, Victor Glover, Michael Hopkins un Soichi Noguchi sünd säker in dei ISS ankaomen. In dei achtersten Riege van lünks sünd dei NASA-Astronautin Kate Rubins un dei Kos-monauten Sergej Ryschikow un Sergej Kud-Sverchkov.


Bild-Daoten: NASA

S'morgens an'n 16. November flög mit dei Ruumkapsel Crew Dragon eine neie Astronauten-Mannschkup nao dei Internationaole Ruumstation (ISS) un köm dor nao 27 Stünnen an. Dei Start was wägen leipet Weer einen Dag läöter; dei löp aower süß as vörseihn aff.

Dei Mannschkup schall seß Maonde up dei ISS blieben. Dit is nu dei tweide Insatz van disse Ruumkapsel, dei van dei US-amerikaonischke Firmao SpaceX bawt werd. Disse SpaceX-Mission, bi dei tau'n eiersten Maol regulär Menschken mit ein kommerziellet Ruumschip nao dei ISS flögen, is wichtig för ein wiederkaomen in dei Ruumfohrt.

Dei vörige Start van Crew Dragon in'n Mai 2020 gellt immer noch as ein Test. Mit dissen tweiden Start schall nu ein neiet Kapitel in dei amerikaonischen Ruumfohrt anfangen. Mit disse Kapsel hätt dei NASA nao 40 Johre wedder ein neiet Ruumfohrtüg taulaoten. Nu kann mit dissen Start dei neie bemannte US-Ruumfohrt wedder staodig un mit Routine affloopen.


Hier geiht dei Reis hen: ISS

Eine grote Entwicklung is, dat dei Ruumkapsel för veier Lüe Platz hätt. Tau disse Mission hört eine US-Astronautin, twei US-Astronauten un ein japaonschken Astronaut. Dei russischken Sojus-Kapseln, mit dei vörher immer dat Personaol nao dei ISS hen- un herflög, käönt blots drei Lüe mitnähmen. Dei Apollo-Kapseln in dei 1960er un 1970er Johre harn uck nich mehr Platz.

Nao dissen eiersten "regulären" Flug mit dei Crew-Dragon-Kapsel bruukt man den Transport mit dei russischken Ruumfohrtüge nich mehr. Dat is för dei NASA van dei Kosten her väl günstiger.


Originaol-Nasa-Artikel: süh hier
SO-Platt: Ludgerd Lüske


18.11.2020


na baven