In de letzten Daag hett uns de Sünn en Söten geven. Mien Archimedes — dat steenern Gesicht — sünd dree Lichten opgahn. Dat sünd natüürlich Solaarlichten. Opstunns kriggt de Natuur graad den Regen, op den se al lang töven deit, man dorna warrt Archimedes wedder von sien Lüchten erhellt: Dat Weder schall wedder sünnig warrn.

Wenn de Sünn sik wedder höger un höger över'n Horizont schuuvt, wacht allens as ut en Doornröschenslaap op — en beten so, as weern wi all Reptilien, de sik toeerst in de Sünn warmen mööt, ehrdat se sik richtig rögen köönt. So warmt sik dat ole Fohrrad un fangt in de Sünn rein an to strahlen, slenkert mit sien witte Melkkann, as wull dat jeden Momang losfohrn, Melk halen. Dat töövt bloots, dat de Prinz Dornröschen sien' Söten gifft.

Un siet hüüt hebbt wi ok wedder Sommertied. Ik meen de Tied op de Klock. Dat gifft ja Minschen, de de Sommertied afschaffen wüllt, wieldat de Ümstelln to stressig is för mennig Minschen, de an en ganz fasten Stünnenplaan wennt sünd. Ik höör nich to de, ik bün en Nachtuul un kann to jede Tied slapen. Aver liekers mag ik de Sommertied.

Nu schall de Sommertied also afschafft warrn, un twoors vun de EU. Dor gifft dat twee Mööglichkeiten: torüch to de permanente Wintertied — orr alltied Sommertied. Kiekt wi de mal an.

De Sommertied heet op Ingelsch "daylight saving time", also Daglicht-spor-Tied. Ik heff en Grafik funnen, de wiest, woso. De Minsch is ja geern bi Daglicht waak, un arbeiten geiht bi Daglicht sowieso beter. Nehmt wi an, wi arbeit vun morgens Klock 9 bet nameddags üm fief. In de Grafik nerrn (Anklicken = Vergröttern!) is links wiest, woans dat bi Alltied-Wintertied utsüht: In de Wintermaande liegt de letzten Arbeitsstünnen (orange) denn al güntsiets dat Daglicht (geel).

In de Midd is wiest, woans dat opstunns löppt: De Sommertied rückt dat Sünnlicht in de Sommermaanden schienbor een Stünn na later trut. Dat bedrippt avers meist bloots de Frietied, denn in'n Sommer hebbt wi sowiso noog Licht in de Arbeitstied. In'n Winter dorgegen blifft dat in de letzten Arbeitsstünnen duuster. — Nu is dat twoors en feine Saak, in'n Sommer bet Klock ölben buten to sitten un to grillen, avers dorför woor de Sommertied ja nich maakt, oder?

Ok de Boomschieven-Igel lett sik de Sünn op de Nees schienen!

Denn avers de rechte Variante: alltieds Sommertied. Hier sühst, dat denn ok de Arbeitstied in'n Winter miteens dörchgahns Daglicht hett. Also is de Sommertied in'n Winter eentlich veel nödiger as in'n Sommer! Un sommers hebbt wi bavento den Vördeel vun de langen Avende. — De Morgende sünd noch lang noog, denn nich vele Minschen staht vör Klock fief op, oder? Mien kiebige Draak jedenfalls kriggt üm de Tied noch nich mal een Oog op!

Also, wenn de EU sik för een Modell entslütt, hööpt de Draak un ik, dat dat dat drütte is: alltied Sommertied. Man sachs kann de EU mal wedder nich op een Bredd kamen — is ja nich to'n eersten Mal so. So lang slöppt de Draak eenfach wieder. Un Archimedes ok.

---