SLIM kümmt kort in Gang

vun Marlou Lessing

De Maan, uns Eerd-Trabant, is för de Ruumfohrt eentlich en Thema vun gistern; de Ruumfohrtagentuurn fixeert ehrn Blick al lang op den Mars un noch feernere Telen. Avers op den Maan kannst all de Techniken vervullkaamnen, de bi de grötteren Telen bruukt warrt. De USA, Russland, toletzt China un ok Indien hebbt al Reedschapen (de USA ok Minschen) na'n Maan schickt; nu ok Japan.

De japaansche Ruumfohrtagentuur heet JAXA, un se hebbt nu en Maandlander afsett. De Maandlander heet SLIM för "Smart Lander for Investigating Moon", op Platt also "Plietsche Lander to'n Ünnersöken vun'n Maan" — afkört PLÜM. Dat hett twoors ok sienen Reiz, avers wi blievt mal bi den Naam SLIM. "Slim" bedüüdt op Ingelsch ja ok "slank", un de Sonde is wirklich teemlich licht un kompakt.

Modell vun SLIM. He süht nich slank, sünnern ehrder mollig ut

De Landemechanismus vun SLIM is besünners plietsch: Dat hett en extra Kamera an Bord, de dörch Musterafgliek mit Fotos vun de Maandöverflach nau faststelln kann, woneem de Kapsel jüst sweevt. Wenn dat Muster mit de plaante Landestee övereenstimmt, warrt de Landung ingang sett. — So is dat ok aflopen, un de Sonde is wohr un wohraftig bloots 50 m vun de plaante Landestee — den lüttjen Maankrater Shioli neegbi den Maand-Äquator — sacht opkamen. Dat is Rekord. Betherto weerst froh, wenn du in 1 km vun't Teel lannen kunnst.

Leider is dorbi wat anners mallöört, un en Landedüse full af. So keem dat, dat de ganze Reedschap bi't Lannen teemlich op de Siet kippt is — meist koppöver. Klingt nich tragisch, is dat avers, denn ehr Solarzelln legen miteens in'n Schadden! Nu müss dat vun sien Batterie leven. Anner Energiequelln hett dat Ding nich. Dorwegen hett sik dat na'n Tied sekerheitshalver afschalt. De Batterie harr dor noch 12% Ladung.

SLIM harr twee lütte Extra-Sonden an Bord, de sik sülvststännig över den Maan bewegen köönt — so nöömte "Rover". Bi de Landung kunnen se foorts afsett warrn un hebbt ok glieks Daten na de Eer schickt. De Beschrieven vun düsse Rovers klingt as ut japaansche Anime-Filme: Beid Rovers beweegt sik dör Hüppen, se jumpt man so op'n Maan rümmer; de een is kugelföörmig, kann avers sien Foorm verännern — en Gestaltwandler. Düt geniale lütte Ding is man bloots so groot as en minschliche Hand! Woans dat entwickelt woor, hett de JAXA hier beschreven. Dat maakt vör allen Fotos, wieldess de anner Rover Temperatuur un Strahlung meten deit.

De Rover LEV-2 süht kugelig ut, kann sik avers uteneenschuven un verwanneln

De Wahl för de Landestee full op den Krater Shioli, wieldat dat oginaale Maandgesteen hier blank liggen schall; dor muttst nich dicke Stoffschichten afkratzen, dat Gesteen to ünnersöken. Nu is dat avers so, dat düsse Gegend vun morgen af an för länger Tied in'n Schadden fallt. För SLIM is denn na korte Tied Sluss. An'n 28. Januar kunn dat mit en beten Sünnlicht wedder ingang kamen, un sietdat hett de JAXA vele Daten opfungen. Man nu tickt de Klock. Mehr as 10 Daag weern för de Mission eh nich inplaant. — So en korte Levensduur för so'n schöne Maschien! Wüllt höpen, dat sik dat lohnt hett.