Mien ole Schuufkoor

vun Meike Balzer-Fraun

Mien leve ole Schuufkoor,

steihst dor un töövst op de anner Tour na't Oosterfüer. Wat schull ik blots ahn Di maken? Wo kunn ik düssen sworen Stamm vun den olen Plummenboom wegkriegen?

Vun Anfang an büst Du mien gröttste Hölp in'n Goorn. Bargen vun Heers un Queek heff ik mit Di över dat nie'e Grundstück schaven. Sand, Kies, Koppsteen un Klinker, nix weer Di to veel.
Plaastern do ik nu nich mehr, un so ganz vull pack ik Di ok nich mehr — wi sünd ja beide wat öller worrn.

Kannst Di noch besinnen, wat wi uns afrackert hefft, as ik domals de twee oorolen dicken sandsteenen Scheedsteen midden oppen Acker ‚funnen' heff? In en Nacht- un Nevelakschoon hefft wi de an't Huus haalt. Anners weren se ünnerplöögt worrn. Wörr doch schaad üm wesen. Maakt sik goot in'n Goorn! Un dank GPS bruukt keen Buer hüüt noch Scheedsteen!

Annerletzt heff ik woller Goorneer un olen Kompost in Dien dicken Buuk vermengeleert. Allerbest Blomeneer för de Pött. Den Kompost hefft wi op de Grööntüüchbeten bröcht, un nu spazeert wi mit all den Rosen- un Heckensnitt kommodig dörch't Dörp na't Oosterfüer hen.

Tokamen Week kannst Di verhalen! Bruukst blots 'n beten Regenwater in Dien Buuk to sammeln.
Denn mööt wi den Sommer över noch mal Stroh vun'n Buern halen un Grassnitt oppen Kompost bringen. Dat's ja keen Arbeit nich. Allens sinnig. Fein warrt't, wenn de eersten Kantüffeln in Dien Buuk inne Sünn afdrögen köönt.

In'n Harvst büst woller wat gauer ünnerwegens. Denn kaamt de Jungs un stapelt Füerholt. De packt Di noch mal so richtig vull un suust mit Di üm't Huus ümto.
Den Winter över af un an 'n beten Holt an't Huus halen, Regenwater sammeln, Loof fohren. Nix doon.

Ik hööp, dat ik noch mal'n Poor nie'e Handgrepen för Di finnen do. De sünd 'n beten gammelig. Anners büst ja noch goot in Schööt, mien leev oll Maat.