Rosetta

Rosetta knipset!


Anklicken = Vergröttern! Bild: ESA/Rosetta/Philae/CIVA...


...affännert van Ludgerd Lüske (noch mehr Kontrastverstärkung).
Anklicken = Vergröttern!
Hier dat Originaolbild daol laoden

Rosetta knipset sik vör den Komet

16 Kilometer groot is dei Affstand van dei Ruumsonde Rosetta tau den Komet 67P/C-G, as dei Sonde dit "Selfie" mök. Dat was an den 7. Oktober 2014 un et wörd mit dei Kamera van den Landeapparaot Philae up naohmen, dei an Bord van Rosetta mitflügg un dei an'n 12. November up den Kometen landen schall. Up dat Bild süht man einen Deil van dei Ruumsonde Rosetta, ein't van dei 14 Meter langen Solarpaneelen un in'n Achtergrund den Komet. Disse is all aktiv un stött an dei schmalen Stä all Gas un Stoff aff in den Weltruum. För dit Bild wörden twei Upnaohmen, dei man mit verschiedene Upnaohmetieden mök, äöwereinanner leggt, üm den Kontrast tau verbätern, so dat man dei Details bäter seihn kann. CIVA (Comet Infrared and Visible Analyzer) hört tau dei teihn Instrumente an Bord van Philae un bestaiht ut dat bildgäben Panorama-Kamerasystem tau'n Ünnerseuken van dei Landestä un ut Mikroskope för dat Affbilden un dei Spektroskopie van dei mit den Bohrer SD2 upbohrten Materiaolproben ut den Kometenbodden.

Ein neiet Bild werd CIVA nao dat Afftrennen van Philae an'n 12. November upnähmen, wenn dei Landeapparaot noch einmaol nao dei Rosetta-Sonde trüggekieken dait.

Rosetta maoket Naohupnaohmen van Felsbrocken

Dat bildgäben System OSIRIS an Bord van dei ESA-Ruumsonde Rosetta hätt eine bedüden Ansicht van einen van dei välen Felsbrocken, dei up den Bodden van den Komet 67P/Churyumov-Gerasimenko ligget, infungen.


Naohupnaohme van Cheops dör dei OSIRIS Schmalwinkelkamera an Rosetta an'n 19. September 2014, upnaohmen, ut einen Affstand van 28,5 km. Dei Stein hätt ein maximaolet Maot van rund 45 m. Anklicken = Vergröttern! Bildherkaomen

Mit ein gröttstet Maot van bold 45 Meter hört dei tau einen van dei gröteren Felsbrocken up den Komet. Hei fallt up in einen Köppel van Felsbrocken up den glatten Grund up dei unnere Siete van den grooten Deil van 67P/CG.

Bi dissen Köppel van Felsbrocken mössen dei Forschkers an dei beneumten Pyramiden van Gizeh bie Kairo in Ägypten denken. Sei neumden den grooten Fels nao Cheops, dei gröttste van dei Pyramiden. Dat is dei groote Pyramide, dei man as Graff för den Pharao Cheops üm 2550 vör Christus bawen dö.

Cheops seehg man tau'n eiersten Maol up Fotos anfang August, as Rosetta bie den Komet anköm (süh neern, käönt Sei den Fels dor finnen?). In dei vergaohn Wäken, as Rosetta duuner un duuner an den Komet ranköm, nöhm OSIRIS disse besünnere Struktur wedder up — ditmaol aower mit eine väl högere Uplösung van 50 Zentimeter up'n Pixel.


Dei Unnersiete van den gröteren 67P/C-G-Kometendeil:
Dit Bild wörd bi dei Ankunft an'n 6. August vörstellt; et wörd ut einen Affstand van 130 km upnaohmen un dei Bilduplösung is 2,4 Meter up'n Pixel. Anklicken = Vergröttern! Bildherkaomen

Disse Strukturen mit Brockenort, dei Rosetta an väle Stäen up den Bodden van 67P/C-G fünd, hört tau dei upfälligsten un wunnerlicken Besünnerheiten. Jüst so as dei välen annern Felsbrocken, dei OSIRIS un NAVCAM van dat Ruumfohrtüg upnöhmen, steiht Cheops hochkant dor, aower nich blots gröter, sünners uck wat lechter in'n Vergliek tau den düsteren Bodden ümmetau.

Tüschken dei lechteren Kluuten up den Brockenbodden ligget sünnerbore lüttke Stäen ut düster laoten Materiaol, bold so as dat Lecht un dat Muster van den Bodden, wo disse Fels uppe ligg.
"Et lett bold so, as wenn sick dei Stoff, dei up den Bodden van den Komet ligg, sick in dei Gliemen affsetten dö. Aower natürlick is et noch väl tau freuh, üm wisse tau wän", sägg Holger Sierks (ESA-Hauptquartier). Affseihn van ehre Grötten, dei jüst dör ein nauet Ünnerseuken van dei Biller utmäten werd, sünd bold aale anner Eigenschkupen van dei Felsbrocken up 67P/C-G ümmer noch ein Raodel för dei Forschkers. Worut bestaoht dei? Wat sünd ehre physikaolischken Eigenschkupen, Dichte un Stabilität miträket?
In dei taukaomen Maonde, wenn Rosetta wiederhen up den Komet taustüert, werd dei Bodden van den Komet ünnersöcht un bekäken. Dei Forschkers werd dorbi dei Resultaote utwerten. "Tau'n Bispill, wenn dei Felsbrocken van dei Kometenaktivität off van dei Schworkraft van den Komet bewarket off verschaoben werd, schullen wi in dei Laoge wän, dit dör dei Biller tau seihn", so Sierks.

Rosetta werd mit sien naueret Ünnerseuken anfangen, wenn ein Affstand van blots noch 10 km van den Kometenbodden dor is, so käönt dei Kameras noch bäter up disse besünnern Deile kieken.


Dei fasteleggte Landestä J ligg up den Kopp van 67P/C-G. Als Reservelandestä wörd C utsöcht. Anklicken = Vergröttern! Bildherkaomen

Tautied befaotet sick dei Forschkers besünners mit dei Landestä för dei Dochtersonde Philae, dei an'n 12. November 2014 up den Komet landen schall. Mit dei extrem scharpen Biller schall et möglick wän, dei beste Stä tau'n Upsetten so nau as möglick tau finnen. Dei fasteleggte Landestä J ligg up den Kopp van 67P/C-G. As Reservelandestä wörd C utsöcht.


Oginaolartikel un Rosetta-Blog; Südollnborger Platt: Ludgerd Lüske

17.10.2014


na baven