vun Thomas Seemann un Marlou Lessing

De Sommer geiht op den Rest, un de letzten Sünnenblomen sünd en beleevte Spies för en grote Tall Vagels. Sühst ja ok an Vagelfoder, dat Sünnenblomenkarns en grote Deel dorvun sünd, denn se hebbt nich bloots Fette un Kahlenhydrate — also Energie —, sünnern ok Vitamine un Mineraalstoffen, sünnerlich veel Magnesium. Düsse Geschenke för de Vagels sünd en Deel vun de Strategie vun de Natuur, sik uttobreden: Dormit belohnt de Sünnenbloom de Vagels, de mit ehr Karns ok ehr Arvgood opnehmt un wiederverbreidt — so dat annerwegens neegst Johr miteens ok Sünnenblomen wassen doot, de Kinner vun de Bloom, de freten warrt.

All de Leevwesen, de för ehr Vermehrung op anner Deerten anwiest sünd, mööt solk "Tuuschgeschäften" maken. Mennig vun de Blödenplanten, de för ehr Bestöven Insekten bruukt, "belohnt" de nich bloots mit Pollen, sünnern ok mit Nektar. De Nektar is för de Plant nix nütt, bloots dat he Insekten anlockt. — Tja, allens hangt mit allens tosamen in de Natuur!

De Kolleeg, de hier so mit Besitterstolt op en halv opfreten Sünnenbloom sitt, kann ok en Kollegin ween, denn he un se seht meist liek ut. Dat is en Ravenkreih, bi uns de an'n mehrsten vörkamen Ravenvagel, den wi dat hele Johr lang bi uns andreept. Se warrt knapp 50 cm lang un sünd dörchgahns glänzen swatt farvt. Se sünd överall antodrepen, in Woolden, apen Landschap un ok in Dörpen un Städer. Denn de kloken Vagels sünd "Kulturfolger", dat heet, se hebbt rutfunnen, woans se vun de Minschen un de Zivilisaschoon profiteern köönt. Vun Natuur ut "Allensfreter", freet se Karns, Beeren, Aavt un Samen liekso as Insekten, Worms un lütte Wirbeldeerten, avers ok Eier un de Gelege vun anner Vagels. Bito hebbt se klookkregen, dat Affallemmer un Müllhalden grote Fretens-Reserven beden doot un dat dat in de Neegde vun Minschen liekso Fleesch as ok vegetaarsche Saken to finnen gifft.

Ravenvagels sünd aktuell de plietschesten Vagels op de Eer, ehr Plie kümmt neeg an de vun Apen. Se köönt bet 30 tellen, Gesichter vun Kreihn un Minschen erkennen, Warktüüch bruken, üm Probleme to lösen, un afstrakt denken. Se leevt soschaal, in grote Koppels, slaapt tohoop in Bööm un dreiht ehr Runnen mit ludes Kreihn — utnahmen de Tied, wenn se för Nawuss sorgt: Paare hebbt en Revier, sünnert sik vun de Swarms af un treckt ehr Brood 8 bet 9 Weken lang groot. Dorna leevt se wedder in Kolonien tosamen. Dat düsse Vagels al heel vigeliensch mit'nanner kommunizeern köönt, versteiht sik. Vun de Evoluschoon her sehn, sünd Vagels eh dorbi, Spraken to billen. Tööv man noch poor Runnen (also poor Johrteihndusende), denn sünd de Ravenvagels ganz vörn dorbi.

All Ravenvagels hebbt sowat, wenn se di ankiekt, denkst du, de weet Bescheed un hebbt so ehr egen Gedanken över di. Dat is de Intelligenz, de wi as Minschen foorts erkennt. In de ole nordische Sagenwelt sünd Raven hillige Vagels, de Raven Hugin un Munin versinnbildlicht dor Erinnern un Plie. Anners as uns lütte Singvagels, de faken bloots een, twee Johr oolt warrt, köönt Ravenkreihn bet 20 Johr oolt warrn — nich in Gefangenschap, sünnern frie. Se kennt even uns Welt — meist as wi Minschen.