Radtouren as in twee Welten:
In Drenthe in Holland

vun Meike Balzer-Fraun

För uns eerste Radtouren in Drenthe/Holland harrn wi en „Fietskaart“ mit de Knüttpünkt (Radkarte mit Knotenpunkten) un de App dorto.

Du sühst, welk Knüttpunkt bi di in de Neegde is, un söchst den Punkt, wo du hen wullst. Nu gifft’t ja jümmers vele Weeg nich blots na Rom hen, man ok to jedeen ‚Punkt‘ in Holland. „Komoot“ wiest di den körtsten Weg, man so’n ooldmodsche Papeerkoort oppen Kökendisch is’n grote Hölp bi de Planeree. Hest en beter Översicht as op’n lütten Bildschirm: Söchst en Holt för Schadden, wullt swümmen, inköpen, Kaffe drinken, Picknick maken, dörch Dörpen, Städer oder Natschonalparks fohren? Wo gifft dat villicht Kiekmalen oder Butenmuseen? Vör allens: Wo lang schall dien Tour ween? De Koort wiest di de Kilometers twüschen je twee Pünkt.

As du dat ‚vun fröher her‘ wennt büst, kannst du de Koort nu in den Plastikbüdel op dien Lenkertasch packen un losfohren. Bruukst aver egentlich blots de Nummern vun de Pünkt op en lütten Zeddel oder dien Handrüch schrieven — dat langt!

Landschap in Drenthe: Schöön un flach — klassisch Fohrradland!

Kannst wiss ween, dat du jümmers över en fasten Ünnergrund fohrst, faken Vörfohrt oder dien egen Ampeln hest, jümmers weetst, wo dat langgeiht. Un wenn du di den Weg denn doch mal mit Autos oder Treckers delen muttst, kannst seker sien, dat de oppassen doot un Afstand hoolt. De Weeg sünd breet, un bi Gegenverkehr gifft dat en Middellien un Sporen to’n Afbögen. Kannst suutje vör di hen pedden, fein links un rechts kieken, muttst nich bang wesen för Slaglöcker, Pütten oder Sand. De Weegkanten sünd fast, un dat Gras an de Sieden is meiht.

Ganz kommodig giffst de Pünkt vun dien Tour in de App rin. Denn bruukst op de Knüttpünkt an de Wiespahlen nich so nipp un nau to achten. Wenn du mal anners as plaant fohrst, fraagt dien Smartphone di fründlich, wat du seker büst, dat du dor lang fohren wullst — anners schasst du beter 200m, 300m oder so torüch fohren.
Kümmt di buten vun Städer een inne Mööt, heet dat: Hallo!

Smucke Städer...

Wenn Rennrööd vun achtern kaamt, künnigt de Eerste de Grupp bitieden an. So as: „Kaamt noch welk!“ De Letzte bölkt: „Letzter Mann!“

Kümmst du an en Bustell, gifft dat naue Schiller un Henwiesen för de Ümleidstrecken, de du ok verstahn deist, ween du keen Hollandsch snackst.
An de Ränner vun de Binnenstäder finnst överall Parkplätz för dien Rad, faken mit Opsicht.

...un prähistoorsche Steengräver

So wiet — so goot. Allens allerbest!
Blots een lütt ‚Aver‘:
In de binnersten Delen vun en grote Stadt as Groningen to’n Bispeel gifft dat ok Radweeg, man dor muchen wi nich fohren. Asig veel Lüüd sünd so gau ünnerwegens, dat du sogor as Footgänger bannig op’n Kiwief sien muttst!

Radfohren in Drenthe — en wunnerbore Gegend.
Dat reine Vergnögen!