De Dohle hett sogor Humor

Plietsche Vagels!

vun Antje Heßler


Se köönt de Fotos per Klick vergröttern. Trüch kaamt Se denn mit den Zurück-Knoop op de Browser-Symboolliest.

Wedder mal seet ik up mien Bank an de Traav. Dat is en wunnerboren Placken. Kannst Scheep bekieken. Aanten un Swaans liegt in de Sünn up den Rasen. Möven kreist över den Placken un all geneet se den Sünnenschien.


Mien Bank. Düt Foto lett sik nich vergröttern (Schuul vun de afbildten Personen)


Scharpes Oog un scharpe Bregen

Dor keem en Sommergast un sett sik to mi. He wickel sien Fröhstücksbrot ut un verputz dat. Dorbi full mitünner en lütten Happen up de Eer. Glieks weern de verscheden Vagels to Stell un flattern üm uns rümm. Harr ener en Happen erwischt, keem glieks en annern un jaag em den af.

Meern dormang stolzeern twee swatte Vagels. Mit ehr heesches "Kjakk" leten se up sik upmarken. Se weern wat lütter as de Kreihn.

Dat weern Dohlen. Smuck sünd de Dohlen nich graad. Aver plietsch kiekt se mit upfallend hellblage Ogen üm sik. Un immer wedder kann man dat heisere "Kjakk" hören. Dormit roopt se sik wat to.


Süht he nich ut as "Hans Huckebein, der Rabe"?


De Swaan is grötter, avers dümmer

De slauen Vagels söökt ümmer den Rasen na Foder af. Lang harr'n se rutkregen, dat an den Schippsanlegger vun Könemann dat ümmer wat to halen geev. Se müssen sehn, dat se ehr beiden Kinner satt kregen.

Siet korten brööd dor noch en Swaan an de Brüüch. De kriggt ümmer Foder vun de Spazeergänger. Un natüürlich fallt dor wat för de Dohlen af. Un nich blots för de Olen. Ok de Kinner kriegt wat af. Se söökt sik ok schon sülvst wat. Ünner Stöhl un Dische finnt se wat to'n Freten.


Ok de Pelikan, de hier so den Snavel oprieten deit, is nich de hellste, meten an de Dohl

Wi freut uns ümmer, dat hier noch Dohlen heimisch sünd. Fröher geev dat veel mehr davun. Dat is en ganz geselligen Vagel. As Poor blievt se en ganzes Leven lang tohoop. Dörch de moderne Buwies findt se hüüt blots swoor enen passenden Nistplatz. De Dohlen höört to de Kreienvagels. In dat Johr 2012 wöör de Dohl as Vagel vun't Johr utsöcht.


28.7.2013


na baven