Pageluun

vun Anke Nissen

Bi unsen Söhn leevt ene Pageluun-Familie. Wat sünd dat eenmal för prächtig un staatsche Vagels! Besünners Herr Pageluun gefallt mi. Wenn he sien Rad upstellt un sik dreiht un vun alle Sieden wiest — to schöön! Sien Blaag, sien türkisisch Gröön, dat lüüch man so! Würklich, för miene Ogen is dat en reine Freud.

Noch liggt de Pracht dal. Süht aver ok good ut!

Herr Pageluun maakt sik paraat för de grote Show

Anners is dat för unsen Söhn. För em is disse Vagel keen so grote Freud. Lieden mag he em natürlich ok, so vun buten. Man wenn sik en Pageluun mit sienen Harem graad in dienen Goorn so richtig wohl föhlt, denn süht dat doch en beten wat anners ut. Överall kann man grote Kuhlen in de Blomenbeete sehen, dor hett Herr Pageluun sik dat komodig maakt, dor hett he sik richtig gemütlich inschunkelt. Un denn röppt he na siene Damen un de lagert sik malerisch üm em rüm. Elkeen vun siene Damen wöltert sik en egen Kuhl — ja, un an'n End sünd all de schönen Blomen daldrückt, tweiwöltert. Herr Pageluun flüggt aver ok up Emily ehre Schaukel, up ehr Klettergerüst, de ganze Familie scharrt in Emilys Sandkist, stolzeert över den Rasen, schietert överall hen.

Un... take-off! De Pracht warrt hoochfohrt!

De Show löppt! Woans gefall ik juuch?

En End vun disse Pageluun-Invasion is nich in Sicht. Pageluuns sünd "standorttreu", as de Hoochdüütschen seggt. Un so'n Vagel kann bet to 30 Johr olt warrn. De Pageluun höört to de Familie vun de Fasanenvagels. För mi is dat en bannig dekorativen Vagel, so'n Ort Ziervagel. Dat süht ut, as weern up siene langen Steertfeddern Ogen up maalt. Irisierend Ogen. Ik heff leest, de süllt Fiende afhollen, süllt afschrecken. Op de anner Siet warrt seggt, dat de prächtige Steert de Damens anlocken schall. Beid kann ja woll nich stimmen — entweder anlocken orr afschrecken?!

Akustisch kann Herr Pfau op jeden Fall teemlich goot afschrecken. He kann mit disse bet to 1,50 m langen Feddern rascheln, scheppern. Höört sik komisch an. He kann aver ok enen luten, krieschen Ton utstöten. Dat deit he, wenn he Gefohr süht. Un flegen kann he ok, de Pageluun, Wo sull he anners ok up dat Klettergerüst un de Schaukel vun Lütt-Emily rupkamen.

Naaa, sünd dor Damens dor buten? Hüüt avend al wat vör, Söte?

En Fründ hett fraagt: "Segg mal, wahnt juuch Söhn in't Himmelriek, wenn he sogoor Pageluuns in'n Goorn hett?"
Ja, en Paradies is dat wohl — en Paradies, mit allens, wat dor tohöörn deit.

Vun de Achtersiet is doch eher Afschrecken meent