Eier an'n Boom...

...orr wenn Oostern un Wiehnachten op een Dag fallt

vun Karl-H. Nissen


"Dat hett, glööv ik, letzt Nacht en beten weiht. Af un to slöög wat gegen dat Finster, ik kunn gor nich recht slapen."
"Wat! En beten weiht, seggst du? Dat weer en ganz dullen Storm. Ik dach meist, dat Dack wull wegflegen", kreeg ik vun Anneke to hören.
Un se harr wohl Recht. Unsen Naver sien willen Plummenboom weer afbraken. De leeg över den Tuun röver in unsen lütten Goorn. Disse Plumm blöht nu in't Fröhjohr fein rosa, man sünst süht se dat ganze Johr düüster ut un gifft veel Schatten.

Nu weer Luft. Uns Naver keem un keek, uns Jung keem mit en Motorsaag un mit siene dree Kinner. Dat duur nich lang, un de Boom weer in Stücken saagt. De Jung nehm sik dat dicke Holt mit för sienen Kamin, de dünnen Telgen legen an de Siet. Allens harr gau wedder sien Ordnung.
Ene rode Glaskugel weer twei, de Kinner harrn de lütten Oosterklocken un anner Fröhjohrsblomen dalpett un weren mit ehre schietigen Schooh in Grootmudder ehr Stuuv rümlopen.
Man sünst weer dor keen groten Schaden bi.
"Wat, keen Schaden, nu kiek di dat an! De Boom hett mien lütt Wichel dalhaut!"
Anneke weer ganz benaut. Disse Wichel, up hoochdüütsch seggt een "Weide" dorto, de weer en Geschenk to enen runnen Geburtsdag west.
Se weer goot anwussen, un nu weer se baben afbraken.

Dat weer ok noch nich so leeg. So'n Wichel kümmt gau wedder in'n Gang. Man twee Daag vörher harr Anneke ehre bunten Oostereier dor anbummelt, un de legen nu all up un in de natte Eerd.
Tja, un nu?

Nu heff ik de Wichel kort afsneden, se is för bunte Eier dit Johr nich mehr to bruken. De Smetterlingsboom is ok al trüchsneden, man Anneke wüß sik to helpen. Se hett nu ehre Eier an den lütten Dannenboom hangt, de in de Eck steiht.
Süht fein ut, so'n Oosterdannenboom.

Un wenn een nu noch bedenkt, dat dat Hoochdruckrebett, wat uns düsse Oostern 2004 dat schöne Wedder maakt, doch wohraftig "Nikolaus" heten deit, denn fallt Oostern un Wiehnachten düt Johr würklich op een Dag, nich? — Naja, tominnst binah.



na baven