van Ludgerd Lüske

Eine Delta IV-Schworlast-Rakete bring mit ein Bruusen Läben in den Weltruum-Start-Komplex 37 up dei Cape Canaveral Air Force Station in Florida. Dei Lastrakete bring dat Nasa-Orion-Ruumschipp för ein Testfleigen in den Eerdümloop. Affhäwen dö dei Apparaot an'n Freidag, den 05. 12. 2014, üm 7:05 EST (Eastern Standard Time).

Un wenn Sei in dit Bild nau henkieket, flügg vörn doch wohrhaftig ein Kiel Väögels dör't Bild! Na, dei belävet wat! Sei denket woll, dor bräck ein Vulkaon ut.

Klick = Vergröttern! Bilddaoten: NASA / Sandra Joseph und Kevin O'Connell

Ein Vulkaon is dat nich. Aower wat is dei ORION-Mission?

Dei Mission

Ein Ruumfohrtüg, för Menschken bawet, verlätt den leegen Eerdümloop an'n Freidag, dat eierste Maol in dei leßten 42 Johre. Dei eierste ORION-Kapsel van dei NASA steeg up eine Hööchte van 3604 Meilen äöwer dei Eern un köm ein poor Stünnen läöter gaut wedder trügge, nao dit best affloopen Testfleigen för dat NASA-Reiseprojekt nao den Mars.

"Wi sünd dorför maoket, dei Menschen wieder rut in dat Sünnensystem tau drägen, un dit is dei eierste Tratt", sägg Bill Gerstenmaier, dei NASA associate administrator for the Human Exploration and Operations Directorate. "Dat was eine dägete Manschupssleistung."

Eine Kamera achter dat Fenster van dei ORION-Kapsel wiest dei Eern bi dat unbemannte Testfleigen
in den Eerdümloop. Bilddaoten: NASA TV

Dat was nau dei Missionsaffloop up den dei NASA haopen dö, wobi man dei heele Tiel wüss, dat bi dei eierste Mission van ein Ruumschipp faoken orige Störungen upträen käönt. Dat passeierde ditmaol aower nich groot. Dei ORION mit Kägelform flög twei Touren dör den Van-Allen-Straohlenkring. Dornao köm dat fürige Daolstiegen in dei Atmosphäre un dat natte Landen ünner dei drei wippen Fallscherme.

Dei Testaffloop

"Auf geht's!", as dei Hoochdüütschen seggt: Dei Delta IV-Rakete van dei ULA mit dei baobenup monteierte NASA-Ruumkapsel ORION häwt aff. Klick = Vergröttern! Bilddaoten: NASA / Bill Ingalls

An'n 05.12.2014 zündeten dei drei Motoren van dei United Launch Alliance Rakete nau üm 07:05 Uhr EST, un et geef ein wuunerboret Upstiegen in dat All. Nao dat Afftrennen van dei Boosters dreef dei tweide Raketenstufe ORION in dei Utgangsbaohn. Dor sprengden sick dat Start-Rettungsystem un dei Verkleedung van dat noch nich warken Versorgungsmodul as plaont aff. Dat wören twei wichtige Systemtests för dat neie Ruumschipp.

Dei wichtigeren Deile van dit Unnernähmen kömen wat läöter, don as dei wedder zündete tweide Stufe dei ORION-Kapsel 3604 Meilen (~5800 km) äöwer dei Eern häwde, in eine Höchte, 15-maol höger, as dei ISS-Ruumstation flügg. Dei Ruumsonde flög up den Hen- un Trüggeweg dör dei starke Straohlung van den Van-Allen-Kring, aower ehre Systeme hüllen dat gaut ut. Dat Ruumschipp schickde Videos, upnaohmen dör ehre twei Fensters, wecke dei Ansicht van dei Eern ut disse Höchte wieset.

Dei hier so bedripst kieket, is William H. Gerstenmaier, NASA Associate Administrator for the Human Exploration and Operations Directorate. Credit: NASA/Bill Ingalls. Bilddaoten

Dornao köm dat fürige Daolstiegen dör dei Atmosphäre, ORION donnerde mit 20000 Meilen (~ 32000 km) in'ne Stünn up dei Luftschicht, drocke naug, för den Upbau van eine Plasmalaoge mit 4000 °F (~2200 °C; http://www.metric-conversions.org/de/temperatur/fahrenheit-in-celsius.htm ) üm dat Ruumschipp. Dissen Test plaonde man extrao so dütlick: wenn dei Ruumschippe van dei Maondbaohn trüggekaomt sünd sei dröcker as bi ein Trüggekaomen ut den eerdnaohen Ümloop. So wullen dei Ingenieure dei ORION-Utrüstung so reaol as et güng testen.

ORION lande eine Meile (~1,6 km) kägen dei plaonte Landestä (270 Meilen (~434 km) westlick van Baja California). Dei Ingenieure werd nu aale Daoten utwerten, dei dei Boddenstation un dei ORION-Bordsysteme upnöhmen. Dortau kaomt dei Mät-Daoten van 1200 Sensoren van dat Besatzungsmodul. So will man mit disse Daoten mehr Details äöwer aale Elemente van ORION un äöwer ehre Leistung kriegen. "Dei eierste Blick up dei faotden Daoten süht worhaft gaut ut", sä Gerstenmaier.

"Wi warket all an dei tweide Kapsel", sä Mike Hawes, dei Lockheed-Martin-Orion-Programm-Baos van dei Unnernähmen, dei ORION för dei NASA bawden un flögen. "Wi werd orig väl ut dat lern, wat wi vandaoge dön."

Natte Landung: Dei ORION-Kapsel güng in den Pazifischken Ozean daol,
rund 600 Meilen südwestlick van San Diego. Bilddaoten: NASA TV

Dat taukaomen Ruumschipp werd bawed för dei Forschkungs-Mission-1 (EM-1). Et werd uck aohne Astronauten an Bord fleigen, aower dat schall väl länger duuren. Dorbi flügg dei Kapsel mit ein warken Servicemodul för dei Stromversorgung un et schall dei eierste Test wern van dei orig groote Startrakete, an dei noch plaont werd. Wenn uck dei Delta-IV-Schworlastrakete dei ORION in einen hogen Eerdümlopp bringen kunn, so werd för dei Kapsel up den Maondkurs dei Kraft van dei gröttere SLS-Rakete (Space Launch System) bruuket.