van Ludgerd Lüske

Dei Mars-Orbiter is eine Ruumsonde van dat indischke Ruumföhrtamt ISRO, dei mit mit eine PSLV-Rakete up den Weg nao den Mars güng.

Affloop van dei Mission

Dei Start was an'n 05. November 2013 üm 09:08 UTC (dat is dei koordineerte Welttied, süh nerrn) mit eine PSLV-XL-Rakete up dat Satish Dhawan Space Centre in Andhra Pradesh. Taueiers güng dei Sonde in einen Ümloop üm dei Eern. (Woso? Kiek hier!) An'n 30. November 2013 verlöt sei denn mit einen 22 Minuten duuren Brennstoot van dat Hauptdrievwark ehren Ümloop un nöhm Kurs up den Mars. Sei köm an'n 24. September 2014 bi den Mars an un is dor in einen orig elliptischen Ümloop mit 500 x 80.000 km äöwergaohn. Bi den Äöwergang in den Mars-Ümloop wörd dei Sonde üm 07:17 Uhr nao indischke Tied van eine Geschwinnigkeit van 22,2 Kilometer in dei Sekunne up 4,4 Kilometer in dei Sekunne affbremset, so flügg dei Sonde nu in 3,2 Eerndaoge einmaol üm den Mars. An'n 25. September 2014 äöwerdrög dei Mars Colorkamera (MCC) ut rund 8449 km Höchte ein eierstet Farwfoto van dei Mars-Atmosphäre.

MOM up den Weg nao'n Mars. Klick up to'n Vergröttern!

Dei Missionsstä

Dei Hauptupgaobe van dei Mission was dei Äöwergang in einen stabilen Ümloop üm den Mars. Eine wiedere Upgaobe is dat Utprobeiern van dei Deipruumkommunikation un -navigation, dat Plaonen un Dörföhren van eine interplanetore Mission un uck dat Inbawen van autonome Funktionen van dei Sonde tau'n Äöwerstaohn van Notfalltaustänne.

MOM schall woll tauminnst seß Maonde lang üm den Mars ümtaufleigen un mit siene Instrumente in'n Solarbedriew dat Weer van den roden Planeten ünnerseuken. Taudem räket dei indischken Forschkers dormit, dat sei wat äöwer dat vörmaols fleiten Waoter up den Bodden un äöwer dat in dei Atmosphäre vörkaomen Methan tau wäten krieget.

Dei Technik

Dei Upbau van dei Marssonde geiht trügge up dei Künne mit IRS/INSAT/Chandrayaan-1 un wörd an dissen Updrag anpasset. Dei Zentraolzylinder bestaiht ut Aluminium un mit Käöhlefaosern stabilmaokten Kunststoff (CFRP), dei Paneele ut Metallwaoben un CFRP. Dei Strukturbaudeile wörden van Hindustan Aeronautics (HAL) in Bangalore herstellt, monteiern dö man dei Grundstruktur un dei Unnersysteme van den Marsorbiter in dat ISRO Satellite Centre (ISAC) in Bangalore, wo man uck dei Wätenschkup-Nutzlast inbawde. Üm den middig inbawden Driewstofftank un dat Hauptdriewwark verdeilt sick acht Stürdüsen, jedeine hätt 22 Newton Schuuwkraft, veier Reaktionsröer för dei Laogeregelung, dei dreideilige Solarpaneele un immer eine Mittelgewinn- (MGA), Hochgewinn- (HLA) und TT&C-Antenne (HGA).

Chandrayaan un siene Anlaogen. Klick up to'n Vergröttern!

Dei HGA-Antenne mit einen 2,2 m dörmäten Reflektor kommunizeiert in dat S-Band un empfang un sendet Telemetrie- un TTC-Daoten van/tau't Indian Deep Space Network (IDSN). Dei Sensorik werd immer dör einen Star Sensor, Solar Panel Sun Sensor un Coarse Analogue Sun Sensor vullstännig maoket. Dei Systeme sünd för einen autonomen Bedriew utleggt. Dei MAR31750 Prozessor is dei Karn van dat Stürsystem Attitude and Orbit Control (AOCE). Dat 440 Newton starke Haupdriewwark (Liquid Apogee Motor) van dei Marssonde is recht robust utleggt: För Driewstoffdrücke van 0,9 bis 2,0 MPa, Driewstofftemperaturen von 0 bis 65 °C, Brennstoff-Oxydator-Mischkungsverhältnisse von 1,2 bis 2,0 un Spannungen van 28 bit 42 Volt. Dat Driewwark kann man fäökener zünden, et kann eine Stünn lang unner vulle Last brennen un et wörd up dei 10 Maonde duuren Reise nao'n Mars bruket för den Äöwergang in den Marsümloop. Andräwen werd dat Haupt- un dei Laogedriewwarke mit eine hypergole Driewstoffkombination ut MMH un N2O4, woför man den Driewstoffvörraot van 852 Kilogramm, dat sünd 390 Liter, mitnöhm.
Dei Stromversorgung löpp äöwer dei drei Solarpaneelen, einkeln mit 1,8 x 1,4 m, dei för eine Leistung van 840 Watt in den Marsümloop utleggt sünd. Eine Li-Ion-Zelle spiekert 36 Ampèrestünnen. Dei Startmasse was 1337 Kilogramm; dei för dei Wätenschkup-Nutzlast nödige Masse möß man wägen dat Gewicht up rund 14,5 Kilogramm runnersetten.

Dei Instrumente

Dei Nutzlast van 14,5 kg verdeilt sick up fief Instrumente:

Mars Color Camera (MCC)
Dei 1,27 kg schwore Kamera faotet dreifarwige Biller mit den Fokus up dei Boddenstrukturen un dat Tausaomesetten van den Marsbodden un kontrolleiert dynaomischke Begäbenheiten un dat Weer. MCC schall uck Upnaohmen van Phobos un Deimos un Vergliekdaoten för dei annern Wätenschkupsinrichtungen maoken. All an'n 19. November 2013 mök dei Kamera kort nao den Start ein Foto van dei Eern. Dei eierste Upnaohme ut den Marsümloop geef et an'n 25. September 2014. Dorbi mök dei Upnaohme van einen Stoffstorm up den roden Planet an'n 28. September 2014 in dei internationaole Presse einen grooten Indruck.

Thermal Infrared Imaging Spectrometer (TISM)
TIS (3,2 kg) mätt dei thermischke Emission an einen Marsdag. Dei eigen Spektraollinien van Mineraolien un Boddentypen läwert Daoten äöwer dat Taosaomesetten van den Bodden un äöwer dei Mineralogie.

Methane Sensor For Mars (MSM)
MSM (2,94 kg) mätt, woväl Methan in dei Marsatmospäre is. Dör dat Mäten van dat trüggestraohlte Sünnenlecht krigg man eine Äöwersicht van dat Methanherkaomen un dei Andeilschwankungen in Ruum un Tied.

Mars Exospheric Neutral Composition Analyzer (MENCA)
MENCA (3,56 kg) is ein veierpol-Massenspektrometer tau'n Mäten van dat relaotive Upträen van dei neutraolen Bestanddeile.

Lyman-Alpha-Photometer (LAP)
Dat Photometer (1,97 kg) mätt dat relaotive Upträen van Deuterium un Waoterstoff in dei bäöwersten Schichten van dei Atmosphäre. Ut dat Verhältnis van dit Upträen kan man den Verlust van dat Waoter trüggeräken.

MOM un siene Anlaogen. Klick up to'n Vergröttern!

Dei Plaon
Mylswamy Annadurai warket as Programmdirektor, S. Arunan as Projektbaos un SK Shivkumar as sien tweide Mann. Dat Tausaomebawen van dei Systemdeile mit dei PSLV-XL Rakete passeierde aff den 05. August 2013 bi dat ISRO Satellite Centre in Bangalore, Karnataka, und dei Sonde wörd an'n 02. Oktober 2013 up dat Startgelände nao Sriharikotta in den Bundesstaot Andhra Pradesh bröcht. För dat Entwickeln van dei Sonde brukde man 15 Maonde. An den 19. Oktober 2013 verkünnde K. Radhakrishnan, dei Baos van dei ISRO, dat man den Start wägen dat taulaotekaomen Telemetrie-Schipp up siene Reise nao dei Fiji-Inseln up den 05. November 2013 verschuben möß. Dei Mission süht aff den Start eine Duur van rund 16 Maonde vör.

Ein Vergliek mi dei annern Mars-Missionen

Dei indischke ISRO is dei veierde Weltruumorganisation, dei nao dei Sowjetunion, dei USA un Europa (ESA) eine Sonde mit Erfolg nao den Mars senden kunn un is dei eierste Nation weltwiet, dei dat forts mit dei eierste Mission henkreeg. Dei MOM-Orbiter köm bold tau dei süftige Tied mit dei US-amerikaonischke MAVEN-Mission bi den Mars an, dei ähnlicke Missionsvörgaoben hätt, aower mit einen teihnfachen högeren Finanzupwand. Mit dei plaonten Kosten van ümmeräket rund 57 Millionen Euro gellt dei indischke Mission as recht günstig. Ehre Sensoren för dat Ünnerseuken sünd woll nich so utfielt, Indien kann dormit aower bewiesen, dat et so eine Mission in den interplanetoren Ruum taustanne bringen kann.

Weblinks

Dei Wikimedia Commons to dei Mars Orbiter Mission.
Dei Mission bi dei ISRO un ok hier.

Glossar tau dei Fachspraak

UTC Dei UTC is tausaomesettet ut dei Uhrtied un dat Kalennerdaotum tau ein vullstänniget UTC-Daotum. Bi nationaole off regionaole Tiedzonen staiht meist dei Henwies, üm woväl Stünnen disse van dei UTC affwieket, bispillswiese is UTC+1 dei middeleuropäischke Tied (MEZ) un UTC+2 dei middeleurropäischke Sommertied (MESZ) un uck dei oosteuropäischke Tied. Dei beiden Tiedzonen westlick un östlick van dei Daotumsgrenze, dei beide eine üm 12 Stünnen van dei UTC versette Uhrtied häbbet, wo aower dat lokaole Daotum verschieden is, werd mit UTC-12 un UTC+12 angäben. Deipruum-Kommunikation FEC4Space - Forward Error Correction Coding für Near-Earth und Deep Space Kommunikationsverbinnungen In dat Projekt gaiht et üm Design un einen Ansatz tau ein Standardiseiern van dei neien Vörrutfählerkorrektur-Codes för optischke eerdnaohe und Deip-Ruum-Daotenverbinnungen (Deep-Space-~) un uck för HF-Deip-Ruum-Daotenverbinnungen. Dei neien Vörrutfählerkorrektur-Mechaonismen, dei up LDPC-Codes baseiert, verspräket eine verbäterte Fählerkorrektur un minnere Komplexität. Disse verbäterte Leistung mök högere Daotenraoten off alternativ ein Insporen an Sendeleistung mit minneren Upwand möglick. Besünners dei för dei Ruumkommunikation insporte Sendeleistung is eine wichtige Saoke, denn dorvan hang dat Design van dat heele Ruumschipp off den Satellit aff (tB. lüttkere Solaranlaogen, minneret Volumen un minnere Masse, einen lüttken HF-Verstärker, lüttke Keuhlanlaogen). LDPC-Codes Low-Density-Parity-Check-Codes, uck LDPC oder Gallager-Codes neumt, sünd lineare Blockcodes för eine Fählerkorrektur. Hypergolität is eine Eigenschkup van manke Raketendriew-stoffe, wobi dei ehre Bestanddeile aohne ein Taudaun miteinanner reageiert, wenn dei tausaomebröcht off mischket werd. Dat Wort Hy-pergole stammt van den Dütschken Wolfgang Carl Nöggerath (1908-1973), dei dissen Naomen för sükke sülwszünden Driewstoffmischkungen as t. B. bi dei Messerschmitt 163B tau'n eiersten Maol bruken dö.

Hypergolität is eine Eigenschkup van manke Raketendriewstoffe, wobi dei ehre Bestanddeile aohne ein Taudaun miteinanner reageiert, wenn dei tausaomebröcht off mischket werd. Dat Wort Hypergole stammt van den Dütschken Wolfgang Carl Nöggerath (1908-1973), dei dissen Naomen för sükke sülwszünden Driewstoffmischkungen as t. B. bi dei Messerschmitt 163B tau'n eiersten Maol bruken dö. Dei Bestanddeile van hypergole Driewstoffe sünd meist starke Oxidations- un Reduktionsmiddel, dei sick bi Kontakt forts, deils mit Explosion, entzündet. Dei Driewstoff reageiert forts nao dat Insprütten in dei Brennkaomer un brennt, so kann et malläwe nich tauväl Driewstoff in dei Brennkaomer gäben, vördem dat Driewwark zündet werd. Dat Zünden passeiert up jeden Fall, wat wichtig is för Kriegsysteme as Interkontinentalraketen un Bäöwerstufen van Drägerraketen. Distickstofftetroxid (N2O4) Dat is bi eine Temperatur äöwer 21 °C ein Gas, dat ätzet un eine stark oxideiern Kraft hätt. Dit farwlose Distickstofftetroxid steiht in ein chemischket Gliekgewicht mit dat rotbruune Stickstoffdioxid (NO2). In dei Gasphaose fallt ein Molekül N2O4 in twei Moleküle NO2 uteinanner. Affhängig van den Druck träet dei Gase in verschiedene Andeile taueinanner up. MMH und N2O4 Et werd bit nuhen faoken ein System ut Monomethylhydrazin (MMH) und Distickstofftetroxid (N2O4) bruket, tau'n Bispill in dat Space Shuttle. Disse beiden Stoffe wiest woll einen hogen spezifischken Impuls*, sorget aower an den Arbeitspunkt van ehren maximaolen spezifischken Impuls uck för eine orig hoge Brennkaomertemperatur. So mutt man däget keuhlen, dormit dei Brennkaomerwände nich schmeltet. * Dat is ein Kenn-Maot van Raketenmotoren un et beschriff dei effektive Geschwinnigkeit van dei Driewgase bi den Uttritt ut dei Düse. TT&C Dat is dat englischke Affkörten för Telemetry, Tracking and Command, mangers uck Telemetry, Tracking and Control, Telemetry, Telecontrol and Ranging(TT&R), up Plattdütschk: Stüern un Bahnverfolgung van Satelliten. Dat Wort faotet dei Operationen tausaome, dei eine Boddenstation för dei Kontrolle un den Bedriew van einen Statellit maoken mutt.