De Kürbis is en beten schuug

Navers Kürbis

vun Anke Nissen

Nu kümmt ja wedder de Kürbis-Tiet. Aver Kürbis — wat sall een dormit doon?

In Navers Goorn, dor wasst en dicken, runnen, gelen Kürbis ran. He liggt komodig mank Kürbisranken un Kürbisbläder up weke Eerd. Dat süht ut, as rekelt he sik richtig in de warme Septembersünn. Wenn ik bedenk, dat de Kürbisse to de Beerenfrüchte tohöört, denn is Navers Kürbis en wohrlich stattlich Beer!

Wat aver sall Naver mit sien groot Beer maken, wenn de riep is? Ik meen, dat is binah en Jammer, wenn he dit Wunner vun de Natur tweisnieden deit. Man jüst dat mütt he wohl doon.

Kürbisblööt

Ik kenn vun Kinnertieden her blots, dat Mudder den Kürbis in lütte veereckig Stücke sneden un "inleggt" hett. In Mudders olt handschreven Kaakbook steiht:

• Kürbis goot waschen, afdrögen, schälen, dörchsnieden.
• Mit en sülvern (!) Lepel Kerne ruthalen.
• Fruchtfleesch in passen Stücke snieden un mit Essig övergeten.
• Na 24 Stunden ut Essig rut nehmen.
• In Water mit 1 Pund Hutzucker (Zucker vun enen Zuckerhut) un lüttsneden Zitronenschaal kaken, bet de Kürbis hell un beten wat dörchsichtig is.
• In Glääs füllen.
• Zuckersaft noch beten inkaken laten,
• denn över de Kürbisstücken in de Glääs füllen.

Disse inleggt Kürbisse smecken heel goot, wi eten de as Bispill avends to Braatkantüffel.

Kürbissupp — de ik geern mal kaak — hett Mudder wohl nich kennt.

Beten anners as Navers dicken, runnen Brummer vun Kürbis seht de Flaschenkürbisse ut. De smeckt mehr aromatisch un sööt. Ut Flaschenkürbisse maakt uns Swiegerdochter Gratin orrer ok Kürbispuffer. Se seggt, se maakt de jüst so as Kartüffelpuffer, blots staats Kartüffel nimmt se Kürbis.

De Hokkaido-Kürbis is ok teemlich schuug...

Un denn gifft dat ja noch den deep-orangen Hokkaido-Kürbis. Dor kaakt Swiegerdochter sogor de Schale mit, eenmal wegen de Farv un denn wegen de Carotine. Swiegerdochter seggt, in den Hokkaido-Kürbis sünd mehr Carotine in as in uns gode, ole Wörteln (Möhren). Se verarbeidt disse orange-rode Beer tohoop mit Hackfleesch. Ik mütt seggen, smeckt lecker! Un Supp ut dissen orange-roden Kürbis hett en wunnerbor kräftig Farv.

...aver mal kiekt he ok ut sien Blädernest vör

Hier sühst good dat Kürbisblatt

Ja, un uns Naver, wenn he sienen groten gelen Kürbis nu nich up'n mal verarbeiden kann, denn kann he ok tweisneden Kürbis in'n Köhlschapp upbewohrn. He bruukt blots de Snittflächen mit Frischhaltefolie afdecken. Bi mi hett al mal so'n Kürbisstück twee Weken lang in'n Köhlschapp legen un weer denn jümmers noch goot to bruken.

Man — noch liggt he ja in'n Goorn, de dicke gele Kürbis, lett sik de Sünn up'n Buuk schienen un dröömt vör sik hen.