vun Meike Balzer-Fraun Eerst veel to natt, denn veel to dröög. Man nu endlich hefft de Buern allens woller fein vörenanner kregen. Güll un Middel för Plantenschuul sprütt. Bit dicht an de Wegen ran plöögt un eggt, seit un rullt. Sünn un Regen hefft wi noog. Blöhstriepens gifft dat dit Johr nich. Is keen Geld för Subventschonen mehr dor. Blots so üm un bi twee Dutz Mahnblomen hefft an en Weegkant all de Ackeree överleevt un blöht nu ganz ahn Subventschonen as dull. Dat Glanzlicht op mien dääglich Spazeergang. Un wenn een de ’n beten passlich in’t Bild setten deit, denn maakt de düchtig wat her.
Wo schöön kunn dat doch ween, wenn dat tominnst överall langs de Wegen twüschen Feller un Wischen blöhen dörv un nich blots in beschirmte Rebeden? En över de Maten groot ümweltfründlich Nettwark kunn dat geven. Dat bruukt na mien Menen ok keen Subventschonen nich, blots goden Willen. (GG Artikel 14, „Eigentum verpflichtet“!) De Saat luert hier in’n Bodden, anners harrn wi de Planten nich in uns Goorn. Villicht warrt ok de Vagels trüch kamen, wenn de nich sogor al vun de Rode List verswunnen sünd. * Frie na Anni Heger, „Dat harr blond so eenfach ween kunnt“ 29.5.2024 |