Wo blievt wi af?

vun Antje Heßler

Tolle Poller to'n Nisten — fies blockiert!

En Sturmmöwenpoor flöög vun Poller to Poller. Narms kunnen se enen frien Poller an de Traav för en Nest finnen. De Boots-Eegner harrn alle Poller mit Steen un Draht tomaakt. Dor harr keen Nest mehr Platz. De Eegner wullen keen Möwennest up ehr'n Fastmaker (Poller) hebben. Denn harrn se ümmer Möwenschiet up ehr Boot.

Möwen-Kriegsraad: "Wat meenst, wat schallt wi maken?"

Mööw in'n Deepfloog

Mit groot Gekriesch kreisen de Möwen an't Över vun de Traav lang. Endlich harr dat Möwenpoor noch enen leeren Poller funnen. Dat wöör ok hööchste Tiet.

Glieks güng dat an de Arbeid. De beiden ünnersöchen dat Ümfeld vun den Poller genau. Setten sik ok to Proov up den Poller. Dat kunn ehr nieges Tohuus warrn.

Besichtigen vun en Poller...

...un Proovsitten. Is komodig!

Dree Eier...

Dat duur noch en ganze Tiet, bit allens trecht weer. Eerst müssen noch de Eier leggt warrn. Meistens weern dat dree Eier — ok bi uns Poor hier. Up de Eier müß een vun de Möwenöllern tominnst fiefuntwintig Daag sitten. Een vun de beiden kreeg de Upgaav, de Eier to dreihn. Denn slupen de Küken eerst ut dat Ei. — Dat müssen wi doch mitkriegen!

...mööt bebröödt...

...un ümdreiht warrn. Bloots denn warrt se gar!

De Öllern lösen sik bi dat Bröden af. Se harrn dat glieke Utsehn, harrn dat glieke Fedderkleed an. Du kannst se nich uteenanner hollen. Up düssen Poller wullen de Möwen blieven.

Denn wöörn se ok noch enen Fischkutter wies. Dat weer Heringstied. De Kutter keem jüüst von See.

Wedder goot hensetten!

Fischkutter! Dat Middageten kümmt!

An Bord wöörn de Heringe al sauber maakt. De Innereen smeten de Fischer eenfach över Bord. Dat weer denn ümmer en richtig Festeten för de Möwen!

Nu sitt se satt to tweet op ehrn Poller!

Möven

vun Heinz Großmann

So af un an sitt ik an Diek un drööm so vör mi hen,
kiek, wat de Wulken mi vertellt, woneem se fleegt amenn.
Villicht na en groot Wulkenslott, wor jümmers lacht de Sünn,
un in en weken Wulkenbett seil ik in 'n Heven rin.

Foto ML

Rein niedsch bün ik, wenn ik denn seh, wo fix un elegant
de Möven stolt un majestätsch fleegt över See un Land.
Se seilt vörbi ahn Flögelschlag, laat von den Wind sik dregen,
eerst sweevt se licht, denn stört se daal. Dor leeg woll wat to'n Freten.

Man af un an, denn arger ik mi över disse Möven,
wenn se as Wecker morgens fröh den Dag könnt nich aftöven.
De Sünn pliert jüst över de Kimm, to Enn is 't denn mit Slaap.
De grelle Kriescheree, de hört den ganzen Dag nich op.

"Kriesch!" Foto Antje Heßler

Hest di mal 'n Ies gönnt op de Fuust un geihst an Strand spazeern,
mit 'n driesten Störtfloog suust se daal, dor kannst di woll verfehrn.
Un denn as Dank för 't lecker Ies kriggst du 'n swartwitten Placken
op diene nee witte Jack, wenn 't leeg kummt, ok in 'n Nacken.

Schiet vun baven! Foto Antje Heßler

Man use Möven groot un lütt, nöömt Emma un Ottilie,
hört, dat is kloor, al jümmers to us Waterkant-Familie.
Sünd use flegen Müllafföhr, freet allens sogor Aas,
an ehr Ahn-Möh-Kunst-Flegeree, dor hebbt wi usen Spaaß.