Neiwind* fägt up den Mars

van Ludgerd Lüske

Ein Bild, upnaohmen van dei Armkamera (Mahli) up dat Marsfohrtüg Neiwind, wiest den Placken up einen Stein, dei bi den den ersten Insatz van den Stoffbössel (DRT) frei fägt wörd. Dit Warktüg an'n End van den Roverarm is ein rundloopen Draohtbösselpoor, dat ein Motor andriff (Bild 1 un 1a).

Bild 1: Stoffbössel (DRT2) Urhäver: NASA/Honeybee Robotics

Bild 1a: Stoffbössel (DRT2), Urhäver: NASA/Honeybee Robotics, Utschnitt.

Disse eierste Insatz passeierde an'n 150. Marsdag, of sol 150, sietdem dit Unnernähmen löpp. Mit einen Afstand van 25 cm knipsde dei Apparaot disse freiputzte Stäe an den Felsen mit den Naomen EKWIR-1 (Bild 2). Disse freileggte Felsplacken is 47 Millimeter breit un 62 Millimeter lang. Dei insette Maotbalken wiest tau'n Verglieken dei Längte van einen Zentimeter. Disse freiputzte Stäe van EKWIR-1 wörd uk mit einen Afstand van einen Zentimeter upnaohmen (Bild 3). Man süht so Rillen, witte Aodern, lüttke Kuhlens un dunkle Körnkes up den Fels un uk äöverbläben Klutens un Stoffkörnkes. Dei Maotbalken wiest twei Millimeter an.
Wenn dei Mars uk heel wiet van us af is, so stötet dei Nasa-Lüe optischk bold mit dei Näsen up den Marsfelsen.

Bild 2: EKWIR-1, Urhäver: NASA/JPL-Caltech/MSSS

Bild 3: EKWIR-1: Upnaohme mit 1 cm Afstand, Urhäver: NASA/JPL-Caltech/MSSS

Dör dit Warken werd dei Steingrund för ein Unnerseuken praot maoket. Dorbi kann man uk fastestellen, of dei Unnergrund pass is för ein Unnerseuken mit den Bohrer.

Verklaarn:

MAHLI = Mars Hand Lens Imager; bawed van Malin Space Science Systems, San Diego

DRT = Dust Removal-Tool, bawed van Honeybee Robotics, New York, N.Y.

Dei 150. Marsdag, of sol 150, weer dei 06.01.2013.

Dei Mars-Lüe vergliekt dei drei Sonden. Je jünger, je grötter — kann dat angahn?